Trisha : త్రిషపై మన్సూర్ అలీఖాన్ వివాదాస్పద వ్యాఖ్యలు.. మహిళా కమిషన్ సీరియస్‌
ప్రముఖ దక్షిణాది నటి త్రిషపై నటుడు మన్సూర్ అలీఖాన్ అభ్యంతకరమైన వ్యాఖ్యలు చేశారు. దీంతో జాతీయ మహిళా కమిషన్ ఈ విషయాన్ని సీరియస్‌గా తీసుకుంది. ఈ అంశాన్ని సుమోటోగా స్వీకరించిన ఎన్‌సీడబ్ల్యూ, మన్సూర్‌పై కేసు నమోదు చేయాలని తమిళనాడు పోలీసులకు ఆదేశాలిచ్చింది. ఆయన వ్యాఖ్యలు పట్ల బాధపడుతున్నట్లు చెప్పిన మహిళా కమిషన్, మహిళల గురించి అలాంటి అసభ్యకరమైన వ్యాఖ్యలు చేస్తే సహించబోమని అల్టిమేటం జారీ చేసింది. ఈ క్రమంలోనే త్రిష కృష్ణన్‌ను ఉద్దేశించి మన్సూర్ అలీఖాన్ వ్యాఖ్యలను మహిళా కమిషన్ తరఫున ఖండిస్తున్నామని స్పష్టం చేసింది. నిందితుడిపై IPC సెక్షన్ 509 B (ఎలక్ట్రానిక్‌ మీడియాలో లైంగిక ఆరోపణలు)తో ఇతర సంబంధిత సెక్షన్లపై కేసు నమోదుకు డీజీపీకి ఆదేశాలు జారీ చేస్తున్నట్లు వెల్లడించింది.
మన్సూర్ అలీఖాన్ ఏమన్నాడంటే ..
మహిళలపై హింసను ప్రేరేపించేలా ఉన్న ఇటువంటి వ్యాఖ్యలను తీవ్రంగా పరిగణిస్తామని మహిళా కమిషన్ తేల్చి చెప్పింది. అసలేం జరిగిందంటే : ఇటీవలే ఓ ఇంటర్వ్యూలో పాల్గొన్న మన్సూర్ అలీఖాన్, 'లియో'లో త్రిషతో ఓ సీన్‌'కు సంబంధించి అభ్యంతరకర వ్యాఖ్యలు చేశారు. గతంలో తాను ఎన్నో చిత్రాల్లో రేప్ సీన్లలో నటించానని, 'లియో'లోనూ అలాంటి సీన్‌ ఉంటుందని భావించానన్నారు. రేప్ సీన్‌ లేకపోవడం బాధగా అనిపించిందని మన్సూర్ అన్నారు.ఈ వ్యాఖ్యలపై స్పందించిన త్రిష, తీవ్రంగా ఖండిస్తున్నానన్నారు. ఇటువంటి వారి వల్లే అందరికీ చెడ్డపేరు వస్తుందని, అతడితో కలిసి స్క్రీన్‌ షేర్ చేసుకోకపోవడం ఆనందంగా ఉందన్నారు. ఇదే సమయంలో మన్సూర్ వ్యాఖ్యలపై సినీ ప్రముఖులు సైతం మండిపడుతున్నారు. అభ్యంతరకరమైన వ్యాఖ్యలు మంచిది కాదని హితవు పలుకుతున్నారు.
