ధృవ నక్షత్రం: ఏడేళ్ళ తర్వాత విడుదలకు సిద్ధమైన విక్రమ్ సినిమా
చియాన్ విక్రమ్ హీరోగా గౌతమ్ వాసుదేవ్ మీనన్ దర్శకత్వంలో 2016లో ధృవ నక్షత్రం సినిమా ప్రారంభమైంది. సినిమా మొదలైనప్పటినుండి అన్నీ అడ్డంకులే వచ్చాయి. విక్రమ్ కెరీర్ లోనే అత్యధిక బడ్జెట్ తో రూపొందిన ఈ సినిమాకు ప్రముఖంగా బడ్జెట్ సమస్యలు వచ్చాయట. అనుకున్న దానికంటే బడ్జెట్ పెరిగిపోవడంతో సినిమా చాలా రోజులు ఆగిపోయింది. ఇలా దాదాపు ఏడేళ్లు గడిచిపోయాయి. ఇక ధ్రువ నక్షత్రం సినిమా విడుదల కాదని అందరూ ఫిక్స్ అయిపోయారు. ఇలాంటి సమయంలో చిత్రబృందం ధృవ నక్షత్రం విడుదల తేదీని ప్రకటించింది. సినిమా మొదలైన ఏడేళ్ల తర్వాత విడుదలకు రెడీ అవ్వడం మొదటిసారి కావడం గమనార్హం.
నవంబర్ 24న విడుదల కానున్న ధ్రువ నక్షత్రం
ధృవ నక్షత్రం సినిమాను నవంబర్ 24వ తేదీన పాన్ ఇండియా లెవెల్ లో రిలీజ్ చేయబోతున్నట్లు చిత్ర బృందం అధికారికంగా ప్రకటించింది. ఈ మేరకు ట్రయల్ బ్లేజర్ అనే ఒకానొక యాక్షన్ వీడియోను రిలీజ్ చేశారు. ఈ వీడియోలో పూర్తిగా యాక్షన్ అంశాలే ఉన్నాయి. హరిస్ జయరాజ్ సంగీతం అందించిన ఈ సినిమాను గౌతమ్ వాసుదేవ్ మీనన్ సొంత బ్యానర్ ఓండ్రగా ఎంటర్టైన్మెంట్ సంస్థ నిర్మించింది. ఈ సినిమాలో రీతూ వర్మ హీరోయిన్ గా కనిపించింది. ఇతర ప్రధాన పాత్రల్లో రాధాకృష్ణన్ పార్తీబన్, ఆర్ రాధికా శరత్ కుమార్, సిమ్రాన్, వినాయకన్, దివ్య దర్శిని కనిపించనున్నారు.
