జీ తెలుగు అందిస్తోన్న సరికొత్త సీరియల్ 'సీతే రాముడి కట్నం.. ఎప్పటి నుండి ప్రసారం కానుందంటే
ఆసక్తికరమైన మలుపులు, అదిరిపోయే ట్విస్ట్లతో సాగే సీరియల్స్ను అందిస్తున్న జీ తెలుగు... మరో ఆసక్తికరమైన అంశంతో సాగే సీరియల్ను తన అభిమాన వీక్షకులకు అందించేందుకు సిద్ధమైంది. ఆసక్తికరమైన కథ, కథనంతో అత్తాకోడళ్ల మధ్య సాగే సరికొత్త సీరియల్ 'సీతే రాముడి కట్నం'. ఈ సీరియల్లో అత్తాకోడళ్ల మధ్యనున్న ప్రత్యేకమైన బంధాన్ని కొత్తకోణంలో చూపించనున్నారు. అనుకోకుండా ముడిపడే సీతారాముల బంధం, సహజమైన అందంతో ఆత్మసంతృప్తికి ప్రాధాన్యమిచ్చే కోడలు, ఆకర్షించే బాహ్యసౌందర్యమే ప్రధానమైనదని భావించే అత్త మధ్య సాగే ఈ కథలోని మలుపులు సీరియల్ని మరింత ఆసక్తికరంగా మారుస్తాయి. అనూహ్యమైన కథతో రానున్న 'సీతే రాముడి కట్నం' అక్టోబర్ 2న ప్రారంభం అవుతుంది.
మద్యాహ్నం 12:30గంటలకు ప్రసారమయ్యే సీరియల్
సోమవారం నుంచి శనివారం వరకు ప్రతిరోజు మధ్యాహ్నం 12:30 గంటలకు ప్రసారం అవుతుంది. ఈ సీరియల్ కథ నిరాడంబరత, నిష్కల్మషమైన మనసుతో నిజాయితీగా జీవించే సీత అనే సాధారణ అమ్మాయి చుట్టూ తిరుగుతుంది. నిజాయితీ పరుడైన రామ్ పోలీస్ కావాలని కలలు కంటూ.. తన తల్లి మహాలక్ష్మి ఆదేశం మేరకు తమ కుటుంబపరమైన వ్యాపారాన్ని చూసుకుంటూ ఉంటాడు. మహాలక్ష్మి కి ఎన్నో వ్యాపారాలు ఉన్నా, కాస్మెటిక్ కంపెనీ అంటే చాలా ఇష్టం. అందానికే మొదటి ప్రాధాన్యం ఇచ్చే వ్యక్తి మహాలక్ష్మి(రామ్ తల్లి). తానెంతగానో ప్రేమించే తన కొడుక్కి అందమైన అమ్మాయినిచ్చి పెళ్లి చేయాలని ఆశపడుతుంది.
సీరియల్ లో నటించే నటీనటులు
అందంగా లేని దేన్నైనా ద్వేషించే మహాలక్ష్మి, తనకు ఎంతమాత్రం నచ్చని సీతను కోడలుగా పొందుతుంది. మరి సీత తన అత్త మహాలక్ష్మిని ఎలా మెప్పిస్తుంది? అనేది తెలుసుకోవాలంటే జీ తెలుగులో ప్రసారం కానున్న 'సీతే రాముడి కట్నం' సీరియల్ తప్పకుండా చూడాల్సిందే. ఈ సీరియల్లో సీతగా వైష్ణవి, రామ్గా సమీర్ నటిస్తున్నారు. మహాలక్ష్మిగా బలమైన పాత్రలో పలు సీరియళ్లతో తెలుగు ప్రేక్షకులకు బాగా చేరువైన మంజుల పరిటాల నటించడం విశేషం. ఇక, సీత తండ్రి శివకృష్ణ పాత్రలో ప్రముఖ నటుడు ఇంటూరి వాసు కనిపించనున్నారు. వీరి మధ్య సాగే సరికొత్త కథను మీరూ మిస్ కాకుండా చూడండి.
