Pawanraje Nimbalkar: కాంగ్రెస్ నేత హత్య కేసు.. 20 ఏళ్ల తర్వాత నిర్దోషులుగా తీర్పు
ఈ వార్తాకథనం ఏంటి
మహారాష్ట్ర కాంగ్రెస్ నేత పవన్రాజే నింబాల్కర్ హత్య కేసులో కీలక పరిణామం చోటుచేసుకుంది. దాదాపు 20 ఏళ్ల పాటు సాగిన విచారణ అనంతరం ముంబై ప్రత్యేక సీబీఐ కోర్టు శనివారం ఈ కేసులోని నిందితులందరినీ నిర్దోషులుగా ప్రకటించింది. ఈ కేసులో మాజీ ఎన్సీపీ ఎంపీ పద్మసింగ్ పాటిల్తో పాటు పలువురు నిందితులపై విచారణ సాగింది. 2006 జూన్ 3న పవన్రాజే నింబాల్కర్ (41)తన డ్రైవర్ సమద్ ఖాజీతో కలిసి ముంబై నుంచి అప్పటి ఉస్మానాబాద్ (ప్రస్తుతం ధారాశివ్) వెళ్తుండగా నవి ముంబైలోని కలంబోలీ వద్ద ఇద్దరు దుండగులు వారి కారును అడ్డగించి కాల్పులు జరిపారు. ఈ ఘటనలో ఇద్దరూ అక్కడికక్కడే మృతి చెందారు. ఈ హత్య రాష్ట్ర రాజకీయాల్లో తీవ్ర సంచలనం రేపింది.
వివరాలు
కోర్టు ఆదేశాల మేరకు కేసు సీబీఐకి అప్పగింత
ఈ కేసులో నింబాల్కర్ బంధువు, మాజీ ఎన్సీపీ ఎంపీ పద్మసింగ్ పాటిల్ ప్రధాన నిందితుడిగా ఆరోపణలు ఎదుర్కొన్నారు. ఆయనతో పాటు వ్యాపారవేత్త సతీష్ మండాడే, మాజీ బీజేపీ కార్పొరేటర్ మోహన్ శుక్లా, పరస్మల్ జైన్, శశికాంత్ కులకర్ణి, కైలాష్ యాదవ్తో పాటు కాల్పులు జరిపినట్లు ఆరోపణలు ఎదుర్కొన్న దినేష్ తివారీ, పింటూ సింగ్, చోటే పాండే కూడా నిందితులుగా ఉన్నారు. ప్రారంభంలో నవి ముంబై పోలీసులు దర్యాప్తు చేపట్టినా, దానిపై అసంతృప్తి వ్యక్తం చేసిన నింబాల్కర్ కుటుంబం బాంబే హైకోర్టును ఆశ్రయించింది. దీంతో కోర్టు ఆదేశాల మేరకు కేసును సీబీఐకి అప్పగించారు. 2009లో సీబీఐ దాఖలు చేసిన చార్జిషీట్లో పద్మసింగ్ పాటిల్ను ప్రధాన కుట్రదారుడిగా పేర్కొంది.
వివరాలు
ఉస్మానాబాద్ జిల్లాలో రాజకీయ ఆధిపత్య పోరే ఈ హత్యకు కారణం
సీబీఐ దర్యాప్తు ప్రకారం,ఉస్మానాబాద్ జిల్లాలో రాజకీయ ఆధిపత్య పోరే ఈ హత్యకు కారణమని ఆరోపించింది. నింబాల్కర్ పెరుగుతున్న ప్రజాదరణ తన రాజకీయ భవిష్యత్తుకు ముప్పుగా మారిందని భావించిన పద్మసింగ్ పాటిల్,రూ.30లక్షల సుపారీ ఇచ్చి హత్యకు కుట్ర పన్నినట్లు దర్యాప్తు సంస్థ పేర్కొంది. అలాగే టెర్నా షుగర్ ఫ్యాక్టరీ వ్యవహారాల్లో నింబాల్కర్ వ్యతిరేకత కూడా ఇందుకు కారణమై ఉండొచ్చని తెలిపింది. అయితే పద్మసింగ్ పాటిల్ ఈ ఆరోపణలను ఎప్పటికప్పుడు ఖండించారు. 2011లో విచారణ ప్రారంభమైన ఈ కేసులో మొత్తం 128మంది సాక్షులను కోర్టు విచారించింది. ప్రముఖ సామాజిక కార్యకర్త అన్నా హజారే కూడా సాక్ష్యమిచ్చారు.
వివరాలు
కేసును విచారించిన ప్రత్యేక సీబీఐ కోర్టు
విచారణ సమయంలో పరస్మల్ జైన్ చేసిన వాంగ్మూలంలో అన్నా హజారేపై కూడా హత్యాయత్నానికి సుపారీ ఇచ్చినట్లు ఆరోపణలు రావడంతో ఆయన పేరు ఈ కేసులో ప్రస్తావనకు వచ్చింది. అదనపు సెషన్స్ న్యాయమూర్తి సత్యనారాయణ నవందర్ ఆధ్వర్యంలోని ప్రత్యేక సీబీఐ కోర్టు ఈ కేసును విచారించింది. పలు పత్రాధారాలు, సాక్షుల వాంగ్మూలాలు, ఇరు వర్గాల వాదనలను పరిశీలించిన అనంతరం నిందితులందరినీ నిర్దోషులుగా ప్రకటించింది.
వివరాలు
ప్రత్యేక సీబీఐ కోర్టు నిందితులందరికీ విముక్తి కల్పిస్తూ తీర్పు
పవన్రాజే నింబాల్కర్ ఉస్మానాబాద్ జిల్లాకు చెందిన ప్రముఖ కాంగ్రెస్ నాయకుడు. తొలినాళ్లలో పద్మసింగ్ పాటిల్ మద్దతుతో రాజకీయాల్లో ఎదిగిన ఆయన, అనంతరం సొంత రాజకీయ బలాన్ని పెంచుకోవడంతో ఇద్దరి మధ్య విభేదాలు తలెత్తినట్లు విచారణలో వెల్లడైంది. నింబాల్కర్ కుమారుడు, ప్రస్తుతం శివసేన (యూబీటీ) ఎంపీ ఓంరాజే నింబాల్కర్ కూడా తన తండ్రి, పద్మసింగ్ పాటిల్పై పోలీసులకు ఫిర్యాదులు చేసినట్లు కోర్టుకు తెలిపారు. దాదాపు రెండు దశాబ్దాలుగా మహారాష్ట్ర రాజకీయాల్లో చర్చనీయాంశంగా నిలిచిన ఈ కేసులో చివరకు ప్రత్యేక సీబీఐ కోర్టు నిందితులందరికీ విముక్తి కల్పిస్తూ తీర్పు వెలువరించింది.