తిరుపతి: గోవిందరాజస్వామి ఆలయం సమీపంలో భారీ అగ్నిప్రమాదం
తిరుపతిలోని గోవిందరాజస్వామి దేవాలయం సమీపంలోని లావణ్య ఫోటో ఫ్రేమ్ షాపులో శుక్రవారం భారీ అగ్నిప్రమాదం సంభవించింది. ఆ మంటలు పక్కనే ఉన్న దుకాణాలకు వ్యాపించడంతో భక్తులు భయాందోళనకు గురయ్యారు. సమాచారం అందుకున్న అగ్నిమాపక సిబ్బంది ఘటనాస్థలికి చేరుకుని మంటలను అదుపులోకి తెచ్చేందుకు తీవ్రంగా శ్రమిస్తున్నారు. మరోవైపు మంటలు భారీగా ఎగసిపడుతున్నాయి. అగ్నిప్రమాదం నేపథ్యంలో మాడ వీధుల్లో భక్తుల రాకపోకలను అధికారులు నిలిపివేశారు. అయితే ఫోటో ఫ్రేం షాపులో పని చేస్తున్న వారు బయటకు వచ్చారా లేదా అనేది తెలియాల్సి ఉంది. సహాయక చర్యలు ఇంకా కొనసాగుతున్నాయని అధికారులు వెల్లడించారు.
