Air India: గాల్లోనే 7 గంటలు… చివరకు దిల్లీకే తిరిగొచ్చిన ఎయిరిండియా విమానం
ఈ వార్తాకథనం ఏంటి
దేశ రాజధాని దిల్లీ నుంచి లండన్ కు బయల్దేరిన ఎయిర్ ఇండియా విమానం ఊహించని ఘటనతో వార్తల్లో నిలిచింది. ఈ విమానం దాదాపు ఏడుగంటల పాటు గాల్లో ప్రయాణించి, చివరకు తిరిగి దిల్లీకే ల్యాండ్ కావాల్సి వచ్చింది. సాంకేతిక సమస్య కారణంగా సౌదీ అరేబియా గగనతలం నుంచి విమానాన్ని వెనక్కి మళ్లించినట్లు సమాచారం. ఈరోజు ఉదయం 6:13 గంటలకు దిల్లీ నుంచి బయల్దేరిన ఈ ఫ్లైట్, లండన్లోని హీత్రో విమానాశ్రయంలో ల్యాండ్ కావాల్సి ఉంది. అయితే సౌదీ గగనతలంలోకి ప్రవేశించిన కొద్దిసేపటికే సమస్య తలెత్తడంతో, పైలట్లు వెంటనే విమానాన్ని తిరిగి దిల్లీ వైపు మళ్లించారు. మధ్యాహ్నం సుమారు 1 గంట సమయంలో ఈ విమానం సురక్షితంగా దిల్లీలో దిగింది.
వివరాలు
ఫ్లైట్రాడార్ డేటా ప్రకారం 3,300 కిలోమీటర్లు ప్రయాణించిన విమానం
ఫ్లైట్రాడార్ డేటా ప్రకారం, ఈ విమానం అప్పటికే దాదాపు 3,300 కిలోమీటర్లు ప్రయాణించింది. సాధారణంగా సౌదీ నుంచి లండన్ చేరడానికి మరో 6 నుంచి 7 గంటల సమయం పడుతుంది. అయితే సాంకేతిక లోపం కారణంగా ప్రయాణం మధ్యలోనే ఆపాల్సి వచ్చింది. ఈ ఘటనపై ఎయిరిండియా స్పందిస్తూ, "భద్రతా ప్రమాణాలను పూర్తిగా పాటిస్తూ విమానాన్ని సురక్షితంగా ల్యాండ్ చేశాం. ప్రస్తుతం విమానంపై సాంకేతికంగా పూర్తి స్థాయి తనిఖీలు కొనసాగుతున్నాయి. అవి పూర్తవడానికి కొంత సమయం పడుతుంది" అని వెల్లడించింది.
వివరాలు
సాంకేతిక సమస్యలే కారణం
విమానంలో అసాధారణ శబ్దాలు వినిపించడంతోనే ఈ నిర్ణయం తీసుకున్నట్లు తెలుస్తోంది. ఇదే విమానం గతంలో కూడా ఇలాంటి సమస్యను ఎదుర్కొన్నట్టు సమాచారం. మార్చి 15న దిల్లీ నుంచి న్యూయార్క్కు బయల్దేరిన విమానాన్ని ఐర్లాండ్ కు మళ్లించారు. ఆ సమయంలో కూడా సాంకేతిక సమస్యలే కారణమని సంస్థ తెలిపింది.