Jammu and Kashmir: జమ్ముకశ్మీర్‌లోని సోపోర్‌లో కాల్పులు.. గాయపడిన ఇద్దరు ఆర్మీ జవాన్లు
జమ్ముకశ్మీర్‌లోని సోపోర్‌లో ఉగ్రవాదులు, భద్రతా బలగాల మధ్య శుక్రవారం జరిగిన ఎన్‌కౌంటర్‌లో తాజా కాల్పుల్లో ఇద్దరు ఆర్మీ జవాన్లు గాయపడ్డారు. నిన్నటి నుండి ఈ ప్రాంతంలో కొనసాగుతున్న ఈ ఎన్‌కౌంటర్‌లో ఒక ఉగ్రవాది మరణించగా, ఒక పౌరుడు కూడా గాయపడ్డాడు. కొద్దిసేపు విరామం తర్వాత కాల్పులు మళ్లీ ప్రారంభమయ్యాయి. నౌపోరా ప్రాంతంలో ఉగ్రవాదులు ఉన్నారనే సమాచారం అందుకున్న పోలీసులు, ఆర్మీ సంయుక్త బృందం నౌపోరాలో సెర్చ్ ఆపరేషన్ ప్రారంభించింది. పోలీసులు, ఆర్మీ సంయుక్త బృందం అనుమానాస్పద ప్రదేశానికి చేరుకోవడంతో, దాక్కున్న ఉగ్రవాదులు బలగాలపై కాల్పులు జరిపారు. లష్కరే తోయిబాకు చెందిన ఒక టాప్ కమాండర్ అతని సహచరుడితో కలిసి ఈ ప్రాంతంలో చిక్కుకున్నట్లు భావిస్తున్నారు. పరిస్థితిని అంచనా వేసేందుకు పోలీసులు రంగంలోకి దిగారు.
