Telangana: అంగన్‌వాడీ కేంద్రాలను ప్లేస్కూళ్లకు దీటుగా తీర్చిదిద్దుతాం: సీతక్క
ఈ వార్తాకథనం ఏంటి
తెలంగాణ రాష్ట్రంలోని అంగన్‌వాడీ కేంద్రాలను నాణ్యమైన ప్లేస్కూల్‌ల స్థాయికి చేరేలా అభివృద్ధి చేయనున్నట్టు శిశు సంక్షేమశాఖ మంత్రి సీతక్క తెలిపారు.
3 నుంచి 6 ఏళ్ల వయసున్న చిన్నారులు అంగన్‌వాడీ కేంద్రాల ద్వారా ప్రాథమిక విద్యను పొందేలా 'అమ్మ మాట-అంగన్‌వాడీ బాట' అనే కార్యక్రమాన్ని మరింత విస్తృతంగా అమలు చేయాల్సిన అవసరం ఉందని ఆమె స్పష్టం చేశారు.
కొత్త విద్యాసంవత్సరానికి ముందుగానే అంగన్‌వాడీ కేంద్రాలను పూర్తిస్థాయిలో సిద్ధం చేయాలని మంత్రి అధికారులను ఆదేశించారు.
గురువారం సచివాలయంలో జరిగిన సమీక్ష సమావేశంలో శిశు సంక్షేమశాఖ కార్యదర్శి అనితా రామచంద్రన్, కమిషనర్ కాంతి వెస్లీతో కలిసి జిల్లా స్థాయి అధికారులతో మంత్రి చర్చలు నిర్వహించారు.
వివరాలు
85 అంగన్‌వాడీ కేంద్రాల పనులను వెంటనే ప్రారంభించాలి
ఈ సందర్భంగా ఆమె మాట్లాడుతూ, "అంగన్‌వాడీ కేంద్రాల్లో అవసరమైన మౌలిక సదుపాయాలను కల్పించాలి. సదుపాయాల లేమి ఉన్న చోట్లలో సమీపంలోని ప్రభుత్వ భవనాల్లోకి ఈ కేంద్రాలను తాత్కాలికంగా తరలించాలి" అని తెలిపారు.
ఇప్పటివరకు నిర్మాణంలోకి రావాల్సిన 85 అంగన్‌వాడీ కేంద్రాల పనులను వెంటనే ప్రారంభించాలని అధికారులకు ఆమె సూచించారు.
అంగన్‌వాడీ మినీ కేంద్రాల్లో పనిచేస్తున్న ఉపాధ్యాయులకు పెరిగిన వేతనాన్ని జమ చేసినందుకు మంత్రికి మినీ అంగన్‌వాడీ టీచర్స్ అసోసియేషన్ రాష్ట్ర అధ్యక్షురాలు వరలక్ష్మి కృతజ్ఞతలు తెలిపారు.