Andhra pradesh: ఏపీలో ఐదు కొత్త వైద్య కళాశాలలు.. రూ.1,091 కోట్లకు కేంద్రం అంగీకారం
ఈ వార్తాకథనం ఏంటి
ఆంధ్రప్రదేశ్‌లో కొత్తగా ఐదు వైద్య కళాశాలల నిర్మాణానికి కేంద్ర ప్రభుత్వం ఆర్థిక సహాయం అందించేందుకు ముందుకొచ్చింది. రాష్ట్ర ప్రభుత్వం ప్రభుత్వ, ప్రైవేటు భాగస్వామ్య (పీపీపీ) విధానంలో అమలాపురం, బాపట్ల, నర్సీపట్నం, పాలకొల్లు, పెనుకొండలో ఏర్పాటు చేయనున్న వైద్య, నర్సింగ్ కళాశాలలతో పాటు బోధనాసుపత్రుల నిర్మాణానికి రూ.1,091.11 కోట్ల నిధులు అందించేందుకు కేంద్రం సూత్రప్రాయంగా అంగీకరించింది. ఈ మొత్తాన్ని వయబిలిటీ గ్యాప్ ఫండింగ్ (వీజీఎఫ్) కింద సమకూర్చనుంది. ఈ విషయాన్ని వెల్లడిస్తూ కేంద్ర ఆర్థిక మంత్రిత్వ శాఖ రాష్ట్ర వైద్యారోగ్య శాఖకు లేఖ రాసింది. ఈ నెల 9న జరిగిన సాధికార కమిటీ సమావేశంలో ఈ ప్రాజెక్టులపై చర్చించిన అనంతరం నిధుల మంజూరుకు సూత్రప్రాయంగా అంగీకరించినట్లు కేంద్రం తన లేఖలో పేర్కొంది.
వివరాలు
30 శాతం నిధులను వీజీఎఫ్ కింద సమకూర్చేందుకు ఆమోదం
రాష్ట్ర ప్రజలకు అత్యాధునిక వైద్య సేవలను మరింత చేరువ చేయాలనే లక్ష్యంతో ఐదు ప్రాంతాల్లో పీపీపీ విధానంలో వైద్య కళాశాలలు,నర్సింగ్ కళాశాలలు,బోధనాసుపత్రులను నిర్మించాలని ఏపీ ప్రభుత్వం నిర్ణయించింది.
ఈ ప్రాజెక్టుల అమలుకు అవసరమైన వీజీఎఫ్ నిధులు అందించాలని గతంలోనే కేంద్రాన్ని కోరింది.
ఇందులో భాగంగా ఆంధ్రప్రదేశ్ వైద్యసేవలు, మౌలిక సదుపాయాల అభివృద్ధి సంస్థ (ఏపీఎంఎస్‌ఐడీసీ), వైద్యవిద్య శాఖ అధికారులతో కూడిన బృందం గత నెలలో ఢిల్లీ వెళ్లింది.
అక్కడ కేంద్ర వైద్యారోగ్య శాఖ, ఆర్థిక శాఖతో పాటు నీతి ఆయోగ్ అధికారులకు ప్రాజెక్టులకు సంబంధించిన సమగ్ర నివేదికను అందజేసింది.
ఈ ప్రతిపాదనలను పరిశీలించిన కేంద్ర ప్రభుత్వం పీపీపీ ప్రాజెక్టుల మొత్తం విలువలో 30 శాతం నిధులను వీజీఎఫ్ కింద సమకూర్చేందుకు ఆమోదం తెలిపింది.
వివరాలు
ఏ వైద్య కళాశాలకు ఎంత నిధులు?
కేంద్ర ప్రభుత్వం సూత్రప్రాయంగా అంగీకరించిన రూ.1,091.11 కోట్లను ఐదు వైద్య కళాశాలల నిర్మాణానికి కేటాయించనుంది.
ఇందులో బాపట్ల వైద్య కళాశాలకు అత్యధికంగా రూ.242.41 కోట్లు అందనున్నాయి.
పాలకొల్లు వైద్య కళాశాలకు రూ.225.85 కోట్లు, నర్సీపట్నం వైద్య కళాశాలకు రూ.219.61 కోట్లు, పెనుకొండ వైద్య కళాశాలకు రూ.215.37 కోట్లు, అమలాపురం వైద్య కళాశాలకు రూ.187.87 కోట్లు వీజీఎఫ్ కింద కేంద్రం సమకూర్చనుంది.
వివరాలు
ఒక్కోచోట 625 పడకల బోధనాసుపత్రి
ఈ ఐదు ప్రాజెక్టుల నిర్మాణం పూర్తయితే ఆయా ప్రాంతాల్లో అత్యాధునిక వైద్య సదుపాయాలు అందుబాటులోకి రానున్నాయి.
ఒక్కో ప్రాంతంలో 625 పడకల సామర్థ్యంతో బోధనాసుపత్రిని ఏర్పాటు చేయనున్నారు.
అలాగే ఒక్కో వైద్య కళాశాలలో 150 అండర్ గ్రాడ్యుయేట్(యూజీ) సీట్లు,24 పోస్టు గ్రాడ్యుయేట్(పీజీ) సీట్లు అందుబాటులోకి వస్తాయి.
వీటితో పాటు ఒక్కోచోట 60 సీట్ల సామర్థ్యంతో నర్సింగ్ కళాశాలను కూడా ఏర్పాటు చేయనున్నారు.
ఈ ఐదు వైద్య కళాశాలలు పూర్తిస్థాయిలో అందుబాటులోకి వస్తే మొత్తం 3,125 ఆసుపత్రి పడకలు, 750 యూజీ సీట్లు,120 పీజీ సీట్లు,300 నర్సింగ్ సీట్లు అందుబాటులోకి వస్తాయి.
దీంతో ఆయా ప్రాంతాల్లో వైద్యవిద్య అవకాశాలు పెరగడంతో పాటు ప్రజలకు మెరుగైన వైద్య సేవలు అందించేందుకు అవసరమైన మౌలిక సదుపాయాలు ఏర్పడనున్నాయి.