Electricity Bill Arrears: విద్యుత్‌ బిల్లుల బకాయిలకు ఓటీఎస్‌.. 2027 జూన్‌ వరకు అవకాశం
ఈ వార్తాకథనం ఏంటి
విద్యుత్‌ బిల్లుల బకాయిలు, ఇతర కారణాలతో విద్యుత్‌ సరఫరా నిలిచిపోయిన, నెలవారీ బిల్లుల జారీ ఆగిపోయిన సర్వీసుల వినియోగదారులు, పరిశ్రమలకు ఏపీ విద్యుత్‌ నియంత్రణ మండలి (ఏపీఈఆర్‌సీ) ఊరటనిచ్చింది. పెండింగ్‌లో ఉన్న విద్యుత్‌ బిల్లులను వన్‌టైమ్‌ సెటిల్‌మెంట్‌ (ఓటీఎస్‌) పద్ధతిలో చెల్లించేందుకు అవకాశం కల్పిస్తూ ఉత్తర్వులు జారీ చేసింది. డిస్కంలలో పెద్ద మొత్తంలో పేరుకుపోయిన విద్యుత్‌ బిల్లుల బకాయిలను పరిష్కరించేందుకు మరోసారి ఓటీఎస్‌ అవకాశం కల్పించాలని డిస్కంలు ఏపీఈఆర్‌సీని కోరాయి. గతంలో అమలైన ఓటీఎస్‌ విధానం 2022 డిసెంబరు 31తో ముగిసిందని.. ప్రస్తుతం విద్యుత్‌ వినియోగదారులకు మరోసారి ఈ అవకాశం కల్పించాలని కమిషన్‌కు సమర్పించిన పిటిషన్‌లో పేర్కొన్నాయి.
వివరాలు
ఓటీఎస్‌ పథకాన్ని అమలు చేసేందుకు అనుమతి ఇచ్చిన ఏపీఈఆర్‌సీ
ప్రైవేటు సంస్థలకు సంబంధించిన విద్యుత్‌ బిల్లుల బకాయిలను అన్‌సెక్యూర్డ్‌ క్రెడిటార్‌గా పరిగణించాల్సి వస్తోందని డిస్కంలు వివరించాయి.
దీంతో వాటిని వసూలు చేసుకోవడం కష్టంగా మారుతోందని తెలిపాయి.
ఇలాంటి సంస్థలకు సంబంధించిన కేసులు నేషనల్‌ కంపెనీ లా ట్రైబ్యునల్‌ (ఎన్‌సీఎల్‌టీ) ద్వారా పరిష్కారమైనప్పుడు వసూలయ్యే మొత్తాలు.. వాస్తవంగా ఉన్న బకాయిలతో పోలిస్తే చాలా తక్కువగా ఉంటున్నాయని పిటిషన్‌లో పేర్కొన్నాయి.
డిస్కంలు సమర్పించిన ప్రతిపాదనలను పరిశీలించిన ఏపీఈఆర్‌సీ.. పెండింగ్‌ విద్యుత్‌ బిల్లులను పరిష్కరించేందుకు ఓటీఎస్‌ పథకాన్ని అమలు చేసేందుకు అనుమతించింది.
వివరాలు
ఓటీఎస్‌ పథకం ఎవరికి వర్తిస్తుంది?
2027 జూన్‌ వరకు అమలు: ఏపీఈఆర్‌సీ ఉత్తర్వులు జారీ చేసిన తేదీ నుంచి 2027 జూన్‌ వరకు ఓటీఎస్‌ పథకం అమల్లో ఉంటుంది.
ఎల్‌టీ, హెచ్‌టీ వినియోగదారులకు అవకాశం: ఉత్తర్వులు జారీ చేసే సమయానికి ఏడాదికి పైగా విద్యుత్‌ బిల్లుల జారీ నిలిచిపోయిన ఎల్‌టీ, హెచ్‌టీ వినియోగదారులకు ఈ పథకం వర్తిస్తుంది.
బకాయిలు చెల్లిస్తే సరఫరా పునరుద్ధరణ: పెండింగ్‌ బకాయిల వ్యవహారం ఓటీఎస్‌ ద్వారా పరిష్కరించుకున్న తర్వాత డిస్కంలు ఎలాంటి ఛార్జీలు వసూలు చేయకుండా విద్యుత్‌ సరఫరాను తిరిగి పునరుద్ధరిస్తాయి.
వైరు తొలగించి ఉంటే ఛార్జీలు: సంబంధిత విద్యుత్‌ సర్వీసుకు చెందిన వైర్‌ను ఇప్పటికే తొలగించి ఉంటే.. కనెక్షన్‌ను మళ్లీ ఏర్పాటు చేసేందుకు అవసరమైన ఛార్జీలను డిస్కంలు వినియోగదారుల నుంచి వసూలు చేస్తాయి.
వివరాలు
ఓటీఎస్‌ పథకం ఎవరికి వర్తిస్తుంది?
ఎన్‌సీఎల్‌టీ కేసులకు వర్తించదు: విద్యుత్‌ బకాయిలకు సంబంధించిన కేసులు ఇప్పటికే నేషనల్‌ కంపెనీ లా ట్రైబ్యునల్‌ (ఎన్‌సీఎల్‌టీ) పరిధిలో పెండింగ్‌లో ఉంటే.. ఆ బకాయిలను ఓటీఎస్‌ పథకం కింద చెల్లించేందుకు అనుమతి ఉండదు.