Baz Battalions: భవిష్యత్ యుద్ధాలకు భారత్ సిద్ధం.. డ్రోన్ల కోసం 'బాజ్ బెటాలియన్లు'
ఈ వార్తాకథనం ఏంటి
భవిష్యత్ యుద్ధ అవసరాలను దృష్టిలో పెట్టుకుని డ్రోన్లు, మానవరహిత వైమానిక వ్యవస్థలను సమర్థంగా వినియోగించే ప్రత్యేక 'బాజ్ బెటాలియన్ల' ఏర్పాటుకు భారత సైన్యం సిద్ధమవుతోంది. ముఖ్యంగా ఆపరేషన్ సిందూర్ సందర్భంగా డ్రోన్లు పోషించిన కీలక పాత్రను విశ్లేషించిన అనంతరం ఈ కొత్త యూనిట్ల రూపకల్పనకు ప్రాధాన్యం ఇచ్చింది. ఆధునిక యుద్ధాల్లో డ్రోన్ల ప్రాధాన్యం రోజురోజుకూ పెరుగుతున్న నేపథ్యంలో ప్రభుత్వం కూడా వాటి వినియోగాన్ని మరింత విస్తరించాలని నిర్ణయించింది. నిఘా సమాచార సేకరణ, అత్యంత కచ్చితత్వంతో లక్ష్యాలపై దాడులు, యుద్ధ వ్యూహాల అమలులో డ్రోన్లను కీలకంగా వినియోగించనున్నారు.
వివరాలు
సైన్యానికి మేధో కేంద్రాలుగా డ్రోన్ బెటాలియన్లు
ప్రత్యేకంగా ఏర్పాటు చేయనున్న బాజ్ బెటాలియన్లు శత్రు భూభాగంలోకి చొచ్చుకెళ్లి కీలక సమాచారాన్ని సేకరించడం, సరిహద్దు ప్రాంతాలను దీర్ఘకాలం పర్యవేక్షించడం, సైనిక లక్ష్యాలను గుర్తించడం వంటి బాధ్యతలు నిర్వర్తించనున్నాయి. రష్యా-ఉక్రెయిన్ యుద్ధంతో పాటు ఇటీవల పశ్చిమాసియాలో నెలకొన్న సంక్షోభాలు భవిష్యత్ యుద్ధాల స్వరూపాన్ని పూర్తిగా మార్చేశాయని ప్రభుత్వం భావిస్తోంది. సంప్రదాయ ఆయుధాలు, సైనిక బలగాలతో పాటు డ్రోన్లు, ఇతర మానవరహిత వైమానిక వ్యవస్థలు కూడా యుద్ధ విజయాన్ని నిర్ణయించే కీలక సాధనాలుగా మారనున్నాయని అంచనా వేస్తోంది. ఈ నేపథ్యంలో ఏర్పాటు చేసే డ్రోన్ బెటాలియన్లు సైన్యానికి మేధో కేంద్రాలుగా పనిచేస్తాయని విశ్రాంత మేజర్ జనరల్ ఏకే సివచ్ తెలిపారు.
వివరాలు
'భార్గవాస్త్ర' డ్రోన్
సైన్యంలో ఉపయోగిస్తున్న అన్ని డ్రోన్ వ్యవస్థల కార్యకలాపాలను ఒకే కేంద్రం నుంచి సమన్వయం చేయడంతో పాటు పర్యవేక్షించే బాధ్యత కూడా వీటికే ఉంటుందన్నారు. అదే విధంగా ఎంక్యూ-9బీ వంటి దీర్ఘశ్రేణి మానవరహిత వైమానిక వాహనాల ద్వారా లభించే సమాచారాన్ని విశ్లేషించి, పరిస్థితులకు అనుగుణంగా అవసరమైన చర్యలు తీసుకునే సామర్థ్యం కూడా ఈ బెటాలియన్లకు ఉంటుందని ఆయన వివరించారు. మరోవైపు మానవరహిత యుద్ధ సామర్థ్యాన్ని మరింత బలోపేతం చేసుకోవడంతో పాటు దేశ వైమానిక భద్రతను కట్టుదిట్టం చేయాలంటే 'భార్గవాస్త్ర' వంటి డ్రోన్ వ్యతిరేక వ్యవస్థలను కూడా విస్తృతంగా ఏర్పాటు చేయాల్సిన అవసరం ఉందని ఏకే సివచ్ స్పష్టం చేశారు.