Boy Rape: హైదరాబాద్‌లో దారుణం.. అమాయక బాలుడిపై లైంగిక దాడి, హత్య
ఈ వార్తాకథనం ఏంటి
హైదరాబాద్లోని ఉప్పల్‌లో దారుణ సంఘటన వెలుగుచూసింది. ఓ కామాందుడు ఆడుకుంటున్న ఐదేళ్ల బాలుడిని లైంగిక దాడి చేసి, అనంతరం హత్య చేశాడు. ఈ నెల 12న(గురువారం)బాలుడు కనిపించకుండా పోవడంతో కుటుంబం ఆందోళన చెందగా, మరుసటి రోజు (శుక్రవారం) బాలుడి మృతదేహం లభించింది. అనంతరం పోలీసులు నిందితుడిని అదుపులోకి తీసుకుని అరెస్టు చేశారు. బాలుడి మృతదేహాన్ని సికింద్రాబాద్ గాంధీ ఆసుపత్రికి తరలించి పోస్టుమార్టం నిర్వహిస్తున్నారు. పోలీసుల సమాచారం ప్రకారం రామంతాపూర్‌లోని టింబర్ డిపోలో పనిచేస్తున్న ఛత్తీస్‌గఢ్‌కు చెందిన కుటుంబం ఈ ప్రాంతంలో నివాసం ఉంటోంది. ఆ కుటుంబంలోని ఐదేళ్ల బాలుడే ఈ ఘటనలో బలయ్యాడు. బాలుడి తండ్రి పనిచేస్తున్న అదే టింబర్ డిపోలో బిహార్‌కు చెందిన కమర్‌ అనే వ్యక్తి కూడా ఉద్యోగం చేస్తున్నాడు.
Details
కేసు నమోదు చేసుకున్న పోలీసులు
ఈ నెల 12న బాలుడు కనిపించకపోవడంతో తండ్రి ఉప్పల్ పోలీసులకు మిస్సింగ్ కంప్లైంట్ ఇచ్చాడు. పోలీసులు సమీపంలోని సీసీ కెమెరాల ఫుటేజ్‌ను పరిశీలించగా కమర్‌ అనుమానాస్పదంగా కనిపించాడు. వెంటనే అతడిని అదుపులోకి తీసుకుని విచారణ జరిపితే, అసలు నిజం బయటపడింది. విచారణలో కమర్‌ చెప్పిన వివరాల ప్రకారం - బాలుడిని మాయమాటలు చెప్పి సమీపంలోని చెట్ల పొదల్లోకి తీసుకెళ్లి లైంగిక దాడి చేశాడు. అనంతరం బాలుడు స్పృహ తప్పడంతో గొంతు నులిమి చంపేశాడు. ఈ విషయం అతడు పోలీసుల ఎదుట అంగీకరించాడు. ప్రస్తుతం పోలీసులు కమర్‌పై కేసు నమోదు చేసి దర్యాప్తు కొనసాగిస్తున్నారు. అమాయక బాలుడి హత్యతో తల్లిదండ్రులు కన్నీరుమున్నీరుగా విలపిస్తున్నారు.