LK Advani: పాకిస్థాన్‌లో పుట్టి.. భారతరత్నగా ఎదిగి.. అద్వానీ రాజకీయ జీవితంలో కీలక పరిణామాలు ఇవే
Bharat Ratna LK Advani: బీజేపీ దిగ్గజ నాయకుడు ఎల్‌కే అద్వానీకి కేంద్రం దేశ అత్యున్నత పౌర పురస్కారం 'భారతరత్న'ను ప్రకటించింది. భారత రాజకీయాలపై ఎల్‌కే అద్వానీ తనదైన ముద్రవేశారు. బీజేపీ నేడు తిరుగులేని శక్తిగా ఎదగడానికి అద్వానీ ఎనలేని కృషి చేశారు. దశాబ్దాల రాజకీయ పార్లమెంటరీ కెరీర్‌లో హోం మంత్రి, ఉప ప్రధానమంత్రి, ప్రసార మంత్రి ఎన్నో కీలక పదవులను నిర్వహించి.. తన మార్కును చాటుకున్నారు. డిసెంబర్ 6, 1992న బాబ్రీ మసీదు కూల్చివేతకు తనను తానే 'రథసారథి'గా అభివర్ణించుకున్నారు. అయోధ్య రామమందిర నిర్మాణలో బాబ్రీ మసీదు కూల్చివేత కీలక పరిణామం అని చెప్పాలి. పాకిస్థాన్‌లో పుట్టి.. భారతరత్నగా ఎదిగిన ఎల్‌కే అద్వానీ జీవితంలో కీలక పరిణామాలను ఓసారి గుర్తు చేసుకుందాం.
1927లో పాకిస్థాన్‌లో జన్మించిన అద్వానీ
నవంబర్ 8, 1927: ప్రస్తుత పాకిస్థాన్‌లోని కరాచీలో కిషన్‌చంద్, జ్ఞానీదేవి అద్వానీలకు ఎల్‌కె అద్వానీ జన్మించారు. 1936 -1942: కరాచీలోని సెయింట్ పాట్రిక్స్ స్కూల్‌లో చదువుకున్నారు, మెట్రిక్యులేషన్ వరకు ప్రతి తరగతిలో మొదటి స్థానంలో నిలిచారు. 1942: ఆర్‌ఎస్‌ఎస్‌లో స్వయంసేవక్‌గా చేరారు. 1942: క్విట్ ఇండియా ఉద్యమంలో దయారామ్ గిడుమల్ నేషనల్ కాలేజీ, హైదరాబాద్‌లో చేరారు. 1944: కరాచీలోని మోడల్ హైస్కూల్‌లో ఉపాధ్యాయుడిగా ఉద్యోగం చేశారు. సెప్టెంబర్ 1947: విభజన సమయంలో ఆయన దిల్లీకి వచ్చారు. 1947-1951: కరాచీ శాఖకు ఆర్ఎస్ఎస్ కార్యదర్శిగా అల్వార్, భరత్‌పూర్, కోట, బుండి, ఝలావర్‌లలో పని చేశారు. 1957: అటల్ బిహారీ వాజ్‌పేయికి సహాయం చేయడానికి అనంతరం ఆయన తన మకాం మళ్లీ దిల్లీకి మార్చారు.
1970లో తొలిసారి చట్టసభలోకి అడుగపెట్టిన అద్వానీ
1958-63: దిల్లీ రాష్ట్ర జనసంఘ్ కార్యదర్శిగా నియామకమయ్యారు. 1960-1967: జనసంఘ్ పొలిటికల్ జర్నల్‌లో అసిస్టెంట్ ఎడిటర్‌గా చేరారు. ఫిబ్రవరి 1965: కమల అద్వానీని వివాహం చేసుకున్నారు. వీరికి ప్రతిభ, జయంత్ అనే ఇద్దరు పిల్లలు ఉన్నారు. ఏప్రిల్ 1970: రాజ్యసభకు ఎంపికై.. తొలిసారి చట్టసభలో అడుగుపెట్టారు. డిసెంబర్ 1972: భారతీయ జనసంఘ్ (BJS) అధ్యక్షుడిగా ఎన్నికయ్యారు. జూన్ 1975: ఎమర్జెన్సీ సమయంలో బెంగుళూరులో అరెస్ట్ అయ్యారు. కొంతకాలం ఆయన్ను బెంగుళూరు సెంట్రల్ జైళ్లోనే ఉంచారు. మార్చి 1977 - జూలై 1979 వరకు: జనతా ప్రభుత్వంలో సమాచార, ప్రసార మంత్రి పదవిని నిర్వహించారు. 1980-86: బీజేపీ ప్రధాన కార్యదర్శిగా నియామకం అయ్యారు.
వాజ్‌పేయి ప్రభుత్వంలో కేంద్ర హోమంత్రి, ఉప ప్రధానిగా..
మే 1986: బీజేపీ అధ్యక్షుడిగా ఎన్నికయ్యారు. మార్చి 1988: బీజేపీ అధ్యక్షుడిగా తిరిగి ఎన్నికయ్యారు. 1988: బీజేపీ ప్రభుత్వంలో హోం మంత్రి పదవిని నిర్వహించారు. 1990: సోమనాథ్ నుంచి అయోధ్య వరకు రామరథ యాత్రకు శ్రీకారం చుట్టారు. 1997: భారతదేశ స్వాతంత్ర్య స్వర్ణోత్సవ వేడుకలను పురస్కరించుకొని స్వర్ణ జయంతి రథయాత్రను ప్రారంభించారు. అక్టోబర్ 1999-మే 2004: వాజ్‌పేయి నేతృత్వంలో ఎన్డీఏ ప్రభుత్వంలో కేంద్ర హోమంత్రిగా పని చేశారు. జూన్ 2002-మే 2004: వాజ్‌పేయి నేతృత్వంలోనే రెండేళ్ల పాటు ఉప ప్రధాన మంత్రిగా పదవీ బాధ్యతలను నిర్వహించారు.
