'హిందువుగా పుట్టాను, హిందువుగానే చనిపోతాను'; కేఏ పాల్ ఆసక్తికర కామెంట్స్
ఈ వార్తాకథనం ఏంటి
క్రైస్తవ మత ప్రచారకుడు, ప్రజాశాంతి పార్టీ వ్యవస్థాపకుడు కేఎ పాల్ ఆసక్తిక వ్యాఖ్యలు చేశారు. తాను హిందువుగా పుట్టానని, హిందువుగానే చనిపోతానని ప్రకటించారు. అయితే తాను చివరి వరకు ఏసుక్రీస్తు అనుచరుడిగా ఉంటానని వెల్లడించారు. కొండగట్టు ఆలయ అభివృద్ధికి తెలంగాణ సీఎం కేసీఆర్ రూ.600 కోట్లు ప్రకటించడంపై పాల్ తీవ్రంగా స్పందించారు. ఆలయ అభివృద్ధికి రూ.600 కోట్ల పన్ను చెల్లింపుదారుల సొమ్మును ప్రకటించడం ద్వారా కేసీఆర్ పరోక్షంగా ఆర్‌ఎస్‌ఎస్‌ అజెండాను అమలు చేస్తున్నారని మండి పడ్డారు.
కేఏ పాల్
బీఆర్‌ఎస్‌ అంటే బీజేపీ బీ-టీమ్‌ : పాల్
బీఆర్‌ఎస్‌ అంటే బీజేపీ బీ-టీమ్‌ తప్ప మరొకటి కాదన్నారు కేఏ పాల్. దిల్లీ మద్యం కుంభకోణంలో ఆరోపణలు ఎదుర్కొంటున్న ఆయన కుమార్తె, ఎమ్మెల్సీ కల్వకుంట్ల కవితారావును అరెస్ట్ చేయకుండా కేసీఆర్ వ్యూహాత్మకంగా తప్పించారన్నారు. కొండగట్టు అభివృద్ధికి రూ.600 కోట్లు కేటాయించిన సీఎం కేసీఆర్‌పై తెలంగాణ హైకోర్టులో పిటిషన్ వేస్తామని పాల్ తెలిపారు. కేసీఆర్ సెక్యులర్ వ్యక్తి అయితే తెలంగాణలో చర్చిలు, మసీదుల అభివృద్ధికి, పునరుద్ధరణకు నిధులు ఎందుకు ప్రకటించడం లేదు? అని పాల్ ప్రశ్నించారు. ఫిబ్రవరి 17న జరగాల్సిన తెలంగాణ నూతన సచివాలయ ప్రారంభోత్సవాన్ని కేసీఆర్ ప్రభుత్వం వాయిదా వేయడంతో తెలంగాణలో కలెక్టరేట్ల ముట్టడిని ఉపసంహరించుకుంటున్నట్లు ప్రజాశాంతి పార్టీ అధినేత పాల్ ప్రకటించారు.