Rajnath Singh: బంగ్లాదేశ్‌ తరహాలో పాలన మార్పునకు కాంగ్రెస్‌ కుట్ర: రాజ్‌నాథ్‌ సింగ్
ఈ వార్తాకథనం ఏంటి
బంగ్లాదేశ్‌ తరహాలో భారత్‌లోనూ పాలన మార్పునకు కాంగ్రెస్‌ కుట్ర చేస్తోందని రక్షణ మంత్రి రాజ్‌నాథ్‌ సింగ్ ఆరోపించారు. ప్రజాస్వామ్యాన్ని కాపాడుతున్నామనే పేరుతో దేశంలో గందరగోళం సృష్టించేందుకు కాంగ్రెస్‌ నేతలు ప్రయత్నిస్తున్నారని విమర్శించారు. రాజ్యాంగ సంస్థలను బలహీనపరచడమే వారి లక్ష్యమని ఆరోపించారు. శుక్రవారం ఉత్తర్‌ప్రదేశ్‌ రాజధాని లఖ్‌నవూలో నిర్వహించిన మీడియా సమావేశంలో కాంగ్రెస్‌ అగ్రనేత రాహుల్‌ గాంధీపై ఆయన తీవ్ర విమర్శలు చేశారు. దేశంలో ఇటీవల చోటుచేసుకుంటున్న పరిణామాలు ఎన్నో ప్రశ్నలను లేవనెత్తుతున్నాయని రాజ్‌నాథ్‌ సింగ్ అన్నారు. యువత శక్తిని దేశ అభివృద్ధికి వినియోగించాల్సింది పోయి, రాజకీయ అస్థిరత సృష్టించేందుకు కాంగ్రెస్‌ ప్రయత్నిస్తోందని ఆరోపించారు. బంగ్లాదేశ్‌లో జరిగిన తరహాలో భారత్‌లోనూ పాలన మార్పు తీసుకురావాలంటూ కాంగ్రెస్‌ నేతలు బహిరంగంగా మాట్లాడుతున్నారని విమర్శించారు.
వివరాలు
అధికారం కోసమే అరాచకమా?
వారి వ్యాఖ్యలను పరిశీలిస్తే ప్రజాస్వామ్య సంస్థలను బలహీనపరచడమే ప్రధాన ఉద్దేశంగా కనిపిస్తోందని అన్నారు.
ఎన్నికల సంఘం, ఓటర్ల జాబితా ప్రత్యేక సమగ్ర సవరణ (ఎస్‌ఐఆర్‌), ప్రధాన ఎన్నికల కమిషనర్‌ జ్ఞానేశ్‌ కుమార్‌కు వ్యతిరేకంగా పోరాడుతున్నామని కాంగ్రెస్‌ చెబుతోందని రాజ్‌నాథ్‌ సింగ్ పేర్కొన్నారు.
అయితే, ఆ పార్టీ అసలు లక్ష్యం అధికారాన్ని చేజిక్కించుకోవడమేనని ఆరోపించారు.
'పాలన మార్పు' వంటి పదాలను ఉపయోగించడం వెనుక ఉద్దేశం స్పష్టంగా అర్థమవుతోందని వ్యాఖ్యానించారు.
రాజకీయ స్వార్థం కోసం దేశ ప్రయోజనాలను పక్కనపెడితే ప్రజాస్వామ్య చర్చలు వాస్తవాల ఆధారంగా కాకుండా మొండివైఖరికి, దుష్ప్రచారానికి వేదికలుగా మారతాయని అన్నారు.
వివరాలు
అధికారం కోసమే అరాచకమా?
ప్రజాస్వామ్యం పేరుతో అరాచకం సృష్టించడం, రాజ్యాంగ సంస్థలపై దాడులకు దిగడం, దేశాభివృద్ధికి ఆటంకాలు కలిగించడం ఎవరికీ తగదని రాహుల్‌ గాంధీని ఉద్దేశించి రాజ్‌నాథ్‌ వ్యాఖ్యానించారు.
చట్టాలను గౌరవిస్తూ శాంతిభద్రతలను కాపాడుకోవాలని సూచించారు.
రాజకీయ ప్రయోజనాల కోసం రాజ్యాంగ వ్యవస్థలను బలహీనపరచకూడదని హితవు పలికారు.
ప్రజల తీర్పును గౌరవించాలని, ప్రజాస్వామ్యాన్ని కాపాడుతున్నామనే పేరుతో రాజకీయ గందరగోళాన్ని సృష్టించడం మానుకోవాలని రాహుల్‌ గాంధీకి సూచించారు.
వివరాలు
ఇందిరాగాంధీ ఎమర్జెన్సీని గుర్తుచేస్తూ విమర్శలు
కాంగ్రెస్‌ గతంలోనూ ప్రజాస్వామ్య, రాజ్యాంగ విలువలకు విఘాతం కలిగించిందని రాజ్‌నాథ్‌ సింగ్ విమర్శించారు.
1975లో అప్పటి ప్రధాని ఇందిరాగాంధీ విధించిన ఎమర్జెన్సీ, 1984లో సిక్కులపై జరిగిన హింస, 1990లో కరసేవకుల హత్యలకు సంబంధించిన పరిణామాలను ఆయన ప్రస్తావించారు.
అప్పటి నుంచి ఇప్పటివరకు కాంగ్రెస్‌ వైఖరిలో ఎలాంటి మార్పు రాలేదని ఆరోపించారు.
''1975లో ఇందిరాగాంధీ ప్రజాస్వామ్యాన్ని జైల్లో పెట్టారు. ఇప్పుడు రాహుల్‌ గాంధీ జేబులో రాజ్యాంగాన్ని పెట్టుకుని అరాచకం సృష్టించేందుకు ప్రయత్నిస్తున్నారు'' అని రాజ్‌నాథ్‌ సింగ్ వ్యాఖ్యానించారు.
వివరాలు
ఎన్నికల సంఘం వ్యవహారంలోనూ కాంగ్రెస్‌పై ఆరోపణలు
ఎన్నికల సంఘాన్ని కాంగ్రెస్‌ తన రాజకీయ ప్రయోజనాల కోసం ఉపయోగించుకుందని రాజ్‌నాథ్‌ సింగ్ ఆరోపించారు.
1993లో ఎన్నికల కమిషనర్ల నియామకం, అప్పటి ప్రధాన ఎన్నికల కమిషనర్‌ టీఎన్‌ శేషన్‌.. ఎన్నికల కమిషనర్‌ నవీన్‌ చావ్లాపై చేసిన ఆరోపణలను ప్రస్తావించారు.
ఎన్నికల సంఘానికి సంబంధించిన రహస్య సమాచారాన్ని నవీన్‌ చావ్లా కాంగ్రెస్‌ నేతలకు చేరవేశారని శేషన్‌ ఆరోపించినట్లు పేర్కొన్నారు.
చావ్లాను పదవి నుంచి తొలగించకుండా కాంగ్రెస్‌ అడ్డుకుందని, ఆ తర్వాత ఆయనను ప్రధాన ఎన్నికల కమిషనర్‌గా నియమించిందని రాజ్‌నాథ్‌ సింగ్ విమర్శించారు.