Halwa Ceremony: నేడు కేంద్ర ఆర్థిక మంత్రి నేతృత్వంలో హల్వా వేడుక.. ఫిబ్రవరి 1న కేంద్ర బడ్జెట్
ఈ వార్తాకథనం ఏంటి
కేంద్ర బడ్జెట్ 2025-26 (Budget 2025-26) తయారీ ప్రక్రియ చివరి దశకు చేరుకోగా, ఆర్థిక మంత్రిత్వ శాఖ (Finance Ministry) సంప్రదాయ హల్వా వేడుకను నేడు నిర్వహించనుంది. ఈ వేడుకలు నార్త్ బ్లాక్‌లోని ఆర్థిక మంత్రిత్వ శాఖ కార్యాలయంలో సాయంత్రం 5 గంటలకు జరుగుతాయి. ఈ కార్యక్రమానికి ఆర్థిక మంత్రి నిర్మలా సీతారామన్ నేతృత్వం వహిస్తారు. బడ్జెట్ తయారీ ప్రక్రియలో భాగమైన అధికారులు, సిబ్బంది ఈ వేడుకలో పాల్గొంటారు. పార్లమెంటులో బడ్జెట్ ప్రవేశపెట్టే వరకు ఈ అధికారులు, సిబ్బంది మంత్రిత్వ శాఖ కార్యాలయం ప్రాంగణానికి మాత్రమే పరిమితం అవుతారు.
వివరాలు
హల్వా వేడుక ఎలా జరుపుకుంటారు?
భారతీయ సంప్రదాయ తీపి వంటకం హల్వాను నార్త్ బ్లాక్‌లో ఒక పెద్ద కడాయిలో సిద్ధం చేస్తారు. ఆర్థిక మంత్రి సంప్రదాయబద్ధంగా కడాయి వెలిగించి హల్వా వడ్డిస్తారు. ఈ వేడుక ద్వారా బడ్జెట్ తయారీలో భాగమైన అధికారుల కృషిని గుర్తించి, వారికి ప్రత్యేకంగా ఆత్మీయతను చాటుతారు. అంతేకాదు, ఇది బడ్జెట్ పత్రాల ముద్రణ ప్రారంభానికి నాంది అవుతుంది. ఈ వేడుకకు ఎవరు హాజరవుతారు? హల్వా వేడుకలో ఈసారి కేంద్ర సహాయ మంత్రి పంకజ్ చౌదరి, వివిధ శాఖల కార్యదర్శులు, బడ్జెట్ రూపకల్పన, సంకలన ప్రక్రియలో పాల్గొన్న అధికారులు, సిబ్బంది పాల్గొంటారు. ఈ సందర్భంగా ఆర్థిక మంత్రిత్వ శాఖ కార్యాలయ ప్రాంతంలో వారందరూ గోప్యతను పాటించేందుకు కట్టుబడి ఉంటారు.
వివరాలు
1980 నుంచి ప్రారంభమైన సంప్రదాయం
పార్లమెంట్ బడ్జెట్ సమావేశాలు జనవరి 31 నుంచి ప్రారంభమై ఏప్రిల్ 4 వరకు కొనసాగుతాయి. ఫిబ్రవరి 1న ఆర్థిక మంత్రి బడ్జెట్‌ను ప్రవేశపెట్టనున్నారు. 1980 నుండి హల్వా వేడుక బడ్జెట్ తయారీ గోప్యతకు ప్రతీకగా నిర్వహించబడుతోంది. ఈసారి నిర్మలా సీతారామన్ తన ఏడవ పూర్తికాల బడ్జెట్ ప్రవేశపెట్టబోతున్నారు. మాజీ ప్రధాని మొరార్జీ దేశాయ్ నెలకొల్పిన రికార్డును అధిగమించిన నిర్మలా సీతారామన్, మోదీ 3.0 పాలనలో ముఖ్యమైన ఆర్థిక నిర్ణయాలు, మార్గదర్శకాలు అందించనున్నారు. దేశం ఆసక్తిగా ఈ ప్రకటనల కోసం ఎదురు చూస్తుండగా, ఆర్థిక మంత్రిత్వ శాఖ అధికారుల అంకితభావం, కృషికి హల్వా వేడుక చిహ్నంగా నిలుస్తోంది.