Budget 2025: వచ్చే నెల 1న కేంద్ర బడ్జెట్‌.. కొత్త రైల్వే మార్గాల ప్రాజెక్టులకు నిధులు దక్కేనా..!
ఈ వార్తాకథనం ఏంటి
వచ్చే నెల ఒకటిన కేంద్ర బడ్జెట్‌లో భాగంగా రైల్వేకు కేటాయించే నిధుల్లో రాష్ట్రానికి ఎంత మేరకు అందజేస్తారనేది ప్రశ్నార్థకంగా మారింది.
రాష్ట్రానికి ప్రాధాన్యత కలిగిన కొత్త రైల్వే మార్గాలు, అదనంగా లైన్ల నిర్మాణం, రైళ్లు వంటి ప్రాజెక్టులకు ప్రస్తుతం రూ. 83,543 కోట్లు అవసరం ఉంది.
ఈ ప్రాజెక్టులతో పాటు మరిన్ని రైలు మార్గాలు, ప్రాజెక్టులను కేటాయించాలని రాష్ట్ర ప్రభుత్వం జోరుగా కోరుతోంది.
తెలంగాణకు సంబంధించిన రైల్వే ప్రాజెక్టులకు అధిక నిధులు కేటాయించాలని కేంద్రానికి రాష్ట్ర ప్రభుత్వం ఇప్పటికే విన్నవించింది.
రాష్ట్రంలో అనుసంధానం లేని తొమ్మిది జిల్లా కేంద్రాలకు రైలు మార్గాల నిర్మాణానికి నిధులు కేటాయించాలని ఆయా జిల్లాల ప్రజాప్రతినిధులు కూడా డిమాండ్ చేస్తున్నారు.
వివరాలు
హైదరాబాద్ నుంచి యాదాద్రికి ఎంఎంటీఎస్ రైలు మార్గానికి నిధుల మంజూరు
తెలంగాణలో భద్రాచలం, మేడారం, రామప్ప వంటి ప్రముఖ పుణ్యక్షేత్రాలు, వనపర్తి, నాగర్‌కర్నూల్, సూర్యాపేట, నిర్మల్, సంగారెడ్డి, భూపాలపల్లి, ములుగు వంటి జిల్లా కేంద్రాలకు ఇప్పటికీ రైల్వే మార్గాలు లేవు.
హైదరాబాద్ మెట్రో రైల్వే విస్తరణ ప్రాజెక్టులకు నిధుల కోసం రాష్ట్ర ప్రభుత్వం కేంద్రానికి విజ్ఞప్తి చేసింది.
అలాగే,ప్రస్తుతం హైదరాబాద్ నుంచి మంగళూరుకు ఉన్న రైలు తమిళనాడు,కేరళ మీదుగా ప్రయాణిస్తోంది.
బెంగళూరు, కుక్కే సుబ్రహ్మణ్య స్టేషన్ల మీదుగా సూపర్‌ఫాస్ట్ రైలు నడిపితే ప్రయాణ దూరం,సమయం గణనీయంగా తగ్గుతుంది.
హైదరాబాద్ నుంచి యాదాద్రికి ఎంఎంటీఎస్ రైలు మార్గం అభివృద్ధి చేయడానికి నిధుల మంజూరు ఇంకా పెండింగ్‌లో ఉంది.
అసెంబ్లీ ఎన్నికల ముందు దీన్ని కేంద్రం స్వయంగా చేపడతామని చెప్పినా, ఇప్పటి వరకు పనులు ప్రారంభం కాలేదు.
వివరాలు
తగ్గనున్న హైదరాబాద్ నుంచి గోవాకు ప్రయాణ దూరం
సికింద్రాబాద్-కాజీపేట మూడో లైన్ నిర్మాణం 2014లో సర్వేకు అనుమతించినా, 2018లో రైల్వే బోర్డుకు నివేదిక సమర్పించినప్పటికీ పనులు ఇంకా పూర్తి కాలేదు.
రీజినల్ రింగు రోడ్డుకు అనుబంధంగా రైల్వే లైన్ నిర్మాణం చేపడతామని కేంద్రం ప్రకటించినా, ఈ ప్రాజెక్టుకు రూ. 12,408 కోట్లు అవసరం అనే అంచనా ఉంది.
వికారాబాద్ నుంచి కొడంగల్ మీదుగా కృష్ణా వరకూ 122 కిలోమీటర్ల రైలుమార్గానికి 2010లోనే సర్వే చేపట్టినా, నిర్మాణ వ్యయం రూ. 787 కోట్లుగా అంచనా వేసినా, ఇప్పటివరకు ఈ ప్రాజెక్టు పురోగతి సాధించలేదు. ఇది పూర్తి అయితే హైదరాబాద్ నుంచి గోవాకు ప్రయాణ దూరం తగ్గుతుంది.
వివరాలు
62 కిలోమీటర్ల కొత్త ట్రాక్ నిర్మాణానికి 2011లోనే సర్వే
శంషాబాద్ విమానాశ్రయం నుంచి విజయవాడకు 220 కిలోమీటర్ల వేగంతో వెళ్లే సెమీ హైస్పీడ్ రైల్వే ప్రాజెక్టుకు గతేడాది రైల్వే బోర్డు ఆమోదం తెలిపింది.
ఈ ప్రాజెక్టు సర్వే ఇప్పటికీ కొనసాగుతోంది. కరీంనగర్-హసన్‌పర్తి మధ్య 62 కిలోమీటర్ల కొత్త ట్రాక్ నిర్మాణానికి 2011లోనే సర్వే జరిగింది.
దీని నిర్మాణానికి రూ. 464 కోట్లు అవసరమని అంచనా వేశారు. ప్రస్తుతం వ్యయం రూ. 1,116 కోట్లకు పెరిగినా పనులు ఇంకా ప్రారంభం కాలేదు.
హసన్‌పర్తి నుంచి భూపాలపల్లి వరకు రైలుమార్గం ఇంకా పెండింగ్‌లో ఉంది.
మణుగూరు నుంచి మేడారం మీదుగా రామగుండం వరకూ కొత్త రైల్వే మార్గం కోసం అటవీ ప్రాంత గ్రామాల ప్రజలు దశాబ్దాలుగా వేచి చూస్తున్నారు.