Bengaluru: చీరకట్టులో బామ్మ జిమ్ వీడియో వైరల్.. ఓపెన్ జిమ్ భద్రతపై చర్చ
ఈ వార్తాకథనం ఏంటి
బెంగళూరులోని ఓ పార్కులో చీరకట్టులో ఉన్న ఓ వృద్ధురాలు ఓపెన్ జిమ్లోని వ్యాయామ పరికరాన్ని వేగంగా ఉపయోగిస్తున్న వీడియో సోషల్ మీడియాలో వైరల్గా మారింది. ఈ వీడియోతో పాటు పబ్లిక్ పార్కుల్లో ఏర్పాటు చేసిన ఓపెన్ జిమ్ పరికరాల వినియోగం,వాటి భద్రతపై కొత్త చర్చ మొదలైంది. ముఖ్యంగా ఇలాంటి పరికరాల వద్ద స్పష్టమైన భద్రతా సూచనలు,వినియోగ మార్గదర్శకాలు తప్పనిసరిగా ఉండాలన్న డిమాండ్ వినిపిస్తోంది. సుమారు 10 సెకన్ల నిడివి ఉన్న ఈ వైరల్ వీడియోలో చీరకట్టులో ఉన్న ఓ వృద్ధురాలు ఎయిర్ స్వింగ్ మెషీన్పై అత్యంత వేగంగా వ్యాయామం చేస్తూ కనిపించారు. ఆమె అటూ ఇటూ వేగంగా ఊగుతుండగా, సమీపంలో ఉన్న చిన్నారులు, ఇతర సందర్శకులు ఆసక్తిగా గమనించారు.
వివరాలు
సోషల్ మీడియాలో వీడియో షేర్ చేసిన 'ఎక్స్' యూజర్ సందీప్
ఈ వీడియోను బెంగళూరుకు చెందిన 'ఎక్స్' యూజర్ సందీప్ పర్సనాథ్ సోషల్ మీడియాలో పంచుకున్నారు. వీడియోను షేర్ చేస్తూ సందీప్ పర్సనాథ్ పలు ప్రశ్నలు లేవనెత్తారు. పర్యవేక్షణ లేకుండా ఇలాంటి వ్యాయామ పరికరాలను ఉపయోగించడం సురక్షితమేనా? ఏదైనా ప్రమాదం జరిగితే దానికి బాధ్యత ఎవరు తీసుకుంటారు? అని ఆయన ప్రశ్నించారు. అలాగే బృహత్ బెంగళూరు మహానగర పాలికే (బీబీఎంపీ) నగరంలోని ప్రతి ఓపెన్ జిమ్ వద్ద పరికరాలను ఎలా ఉపయోగించాలో వివరించే సూచనలు, భద్రతా నిబంధనలను తెలిపే బోర్డులు ఏర్పాటు చేయాలని కోరారు.
వివరాలు
భద్రతా సూచనల బోర్డులు ఏర్పాటు చేయాలని బీబీఎంపీకి నెటిజన్ల డిమాండ్
ముఖ్యంగా వృద్ధులు, పిల్లలు లేదా తొలిసారి ఈ పరికరాలను ఉపయోగించే వారు సరైన అవగాహన లేకుండా వినియోగిస్తే ప్రమాదాలు జరిగే అవకాశం ఉందని ఆయన అభిప్రాయపడ్డారు. అందుకే ప్రతి పార్కులో స్పష్టమైన హెచ్చరికలు, వినియోగ సూచనలు అందుబాటులో ఉండాల్సిన అవసరం ఉందని పేర్కొన్నారు. ఈ వీడియో వైరల్ కావడంతో నెటిజన్లు భిన్నాభిప్రాయాలు వ్యక్తం చేస్తున్నారు. కొందరు పబ్లిక్ ఓపెన్ జిమ్ల వద్ద భద్రతా మార్గదర్శకాలు తప్పనిసరిగా ఏర్పాటు చేయాలని, దీనిపై బీబీఎంపీ వెంటనే చర్యలు తీసుకోవాలని కోరుతున్నారు. మరికొందరు మాత్రం ఎన్ని సూచనల బోర్డులు ఏర్పాటు చేసినా వ్యక్తిగత జాగ్రత్త, కామన్ సెన్స్కు ప్రత్యామ్నాయం ఉండదని అభిప్రాయపడుతున్నారు. పరికరాలను ఉపయోగించే ప్రతి ఒక్కరూ తమ భద్రతను దృష్టిలో పెట్టుకుని వ్యవహరించాలని సూచిస్తున్నారు.
ట్విట్టర్ పోస్ట్ చేయండి
బెంగళూరు పార్కులో వృద్ధురాలు వ్యాయామం చేస్తున్న వీడియో వైరల్
Is this not dangerous without supervision! Who will take responsibility if something happens. BBMP should install clear usage guidelines and safety instructions on boards next to each outdoor gym equipment in parks. pic.twitter.com/iUvFUI50tJ
— Sandeep Parswanath (@sarpame) July 6, 2026