IIT Bombay suicide case: ఐఐటీ బాంబేలో విద్యార్థుల ఆందోళన.. 18 డిమాండ్లపై యాజమాన్యం చర్చలు
ఈ వార్తాకథనం ఏంటి
ఐఐటీ బాంబేలో విద్యార్థి సాహిల్ వాకోడే ఆత్మహత్య ఘటనపై ఆందోళనలు కొనసాగుతున్నాయి. మూడు రోజులుగా నిరసన చేస్తున్న విద్యార్థులతో ఐఐటీ బాంబే డైరెక్టర్ ప్రొఫెసర్ షిరీష్ కేదారే ఆదివారం రాత్రి సుదీర్ఘంగా సమావేశమయ్యారు. విద్యార్థులు అందజేసిన 18 డిమాండ్లపై దాదాపు మూడు గంటలపాటు చర్చించారు. విద్యార్థుల 18 డిమాండ్లలో అకడమిక్ కమిటీల్లో విద్యార్థులకు ప్రాతినిధ్యం కల్పించడం, క్యాంపస్లో జరిగిన నాలుగు ఆత్మహత్యలపై స్వతంత్ర విచారణ చేపట్టడం, ప్రొఫెసర్ల మానసిక ఆరోగ్యంపై వర్క్షాప్లు నిర్వహించడం వంటి అంశాలు ఉన్నాయి. ఈ డిమాండ్లపై ఐఐటీ బాంబే యాజమాన్యం అధికారిక ప్రకటనను సోమవారం విడుదల చేసే అవకాశం ఉన్నట్లు తెలుస్తోంది.
వివరాలు
ప్రొఫెసర్ పై ఎస్సీ, ఎస్టీ అట్రాసిటీ చట్టం కింద కేసు నమోదు
సాహిల్ వాకోడే (22) మృతితో క్యాంపస్లో ఆందోళనలు తీవ్రతరమయ్యాయి.
విద్యార్థుల నిరసనల నేపథ్యంలో యాజమాన్యం వారితో చర్చలు జరిపింది.
ఇదే సమయంలో సాహిల్ తల్లిదండ్రులు చేసిన ఫిర్యాదు ఆధారంగా ముంబైలోని పవాయి పోలీసులు ప్రొఫెసర్ సూర్యనారాయణ్ దుల్లాపై ఎస్సీ, ఎస్టీ అట్రాసిటీ చట్టం కింద కేసు నమోదు చేశారు.
అలాగే ఆత్మహత్యకు ప్రేరేపించారనే ఆరోపణలపై భారతీయ న్యాయ సంహిత (BNS)లోని సెక్షన్ 108 కింద మరో కేసు కూడా నమోదైంది.
సాహిల్ మరణానికి దారితీసిన పరిస్థితులు, విద్యార్థులు చేసిన ఆరోపణలు, ఐఐటీ బాంబే యాజమాన్యం వివరణ తదితర అంశాలపై పవాయి పోలీసులు దర్యాప్తు కొనసాగిస్తున్నారు.