IIT Kanpur: సీటు రాలేదని ఐఐటీ వెబ్సైట్లు హ్యాక్ చేసిన విద్యార్థి.. చివరికి ఊహించని ట్విస్ట్!
ఈ వార్తాకథనం ఏంటి
ఐఐటీ కాన్పూర్లో కొత్తగా ప్రారంభించిన బ్యాచిలర్ ఆఫ్ సైబర్ సెక్యూరిటీ కోర్సులో ప్రవేశం లభించకపోవడంతో ఓ విద్యార్థి సంచలన నిర్ణయం తీసుకున్నాడు. తన సాంకేతిక నైపుణ్యాన్ని నిరూపించాలనే ఉద్దేశంతో ఐఐటీ కాన్పూర్,ఐఐటీ మద్రాస్ వెబ్సైట్లలోని కొన్ని భాగాలను హ్యాక్ చేశాడు. వెబ్సైట్లో "Site is hacked. All I need is just a fair chance"అనే సందేశాన్ని ఉంచి అందరి దృష్టిని ఆకర్షించాడు. అయితే ఈ ఘటనలో క్రిమినల్ కేసు నమోదు చేయకుండా, అతడికి తన సాంకేతిక నైపుణ్యాన్ని నిరూపించుకునే అవకాశం ఇవ్వాలని ఐఐటీ కాన్పూర్ నిర్ణయించింది. విద్యార్థి తన చర్యలను సోషల్ మీడియా వేదికలైన ఎక్స్ (X),రెడిట్లో స్వయంగా వెల్లడించాడు.
వివరాలు
రెండు విద్యాసంస్థల వెబ్సైట్లలోకి ప్రవేశం
రెండు విద్యాసంస్థల వెబ్సైట్లలోకి ప్రవేశించినట్లు తెలిపిన అతడు,వాటికి ఎలాంటి నష్టం కలిగించే ఉద్దేశం తనకు లేదని, కేవలం తన సైబర్ సెక్యూరిటీ నైపుణ్యాన్ని చూపించాలనేదే లక్ష్యమని పేర్కొన్నాడు.
ఇందుకు సంబంధించిన స్క్రీన్షాట్లను కూడా సోషల్ మీడియాలో పంచుకున్నాడు.
అడ్మిషన్ కోసం అవసరమైన ఫీజు చెల్లించడంతో పాటు దరఖాస్తు పూర్తి చేసి, అన్ని పత్రాలు సమర్పించానని విద్యార్థి తెలిపాడు.
సైబర్ సెక్యూరిటీకి సంబంధించిన తన ప్రాజెక్టులు, పనుల వివరాలను కూడా అందించానని చెప్పాడు.
అయినప్పటికీ అడ్మిషన్ ప్రక్రియలో భాగమైన హ్యాకథాన్కు తనను షార్ట్లిస్ట్ చేయకపోవడంతో తీవ్ర నిరాశకు గురైనట్లు వెల్లడించాడు.
వివరాలు
సాంకేతిక నైపుణ్యాన్ని ప్రత్యేక పరీక్ష ద్వారా అంచనా
ఈ ఘటనపై స్పందించిన ఐఐటీ కాన్పూర్ డైరెక్టర్ మనీంద్ర అగర్వాల్ మాట్లాడుతూ, విద్యార్థి వెబ్సైట్లోని కొన్ని భాగాలకు అనధికారికంగా ప్రవేశించిన విషయం నిజమేనని తెలిపారు.
అయితే సైబర్ సెక్యూరిటీ రంగంలో తగిన అనుభవం లేకపోవడం వల్లే అతడిని ఎంపిక చేయలేదని వివరించారు.
ఇంకో అధికారి మాట్లాడుతూ, విద్యార్థి చెప్పిన విషయాలను పరిశీలించి, అతని సాంకేతిక నైపుణ్యాన్ని ప్రత్యేక పరీక్ష ద్వారా అంచనా వేయనున్నట్లు తెలిపారు.
వివరాలు
వచ్చే విద్యా సంవత్సరంలో అడ్మిషన్కు అవకాశం
ప్రస్తుత విద్యా సంవత్సరానికి అడ్మిషన్ ప్రక్రియ ఇప్పటికే పూర్తయినందున ఇప్పుడు సీటు ఇవ్వడం సాధ్యం కాదని స్పష్టం చేశారు.
అయితే విద్యార్థిని ఐఐటీ కాన్పూర్కు ఆహ్వానించి, సాంకేతిక పరీక్ష నిర్వహించి, అతని ప్రతిభను నిరూపించగలిగితే వచ్చే విద్యా సంవత్సరంలో అడ్మిషన్కు అవకాశం కల్పిస్తామని తెలిపారు.
అలాగే సీనియర్ అధ్యాపకులు, ఇంజినీర్లు అతడితో మాట్లాడి, అనుమతి లేకుండా వెబ్సైట్లలోకి చొరబడటం చట్టవిరుద్ధమని, భవిష్యత్తులో ఇలాంటి చర్యలకు పాల్పడకూడదని అవగాహన కల్పించనున్నట్లు ఐఐటీ కాన్పూర్ వెల్లడించింది.