Imran Khan: ఇమ్రాన్‌ ఖాన్‌కు భారత పౌరసత్వం లేదు.. కేంద్రమంత్రి సంచలన వ్యాఖ్యలు
ఈ వార్తాకథనం ఏంటి
బాలీవుడ్‌ నటుడు ఇమ్రాన్‌ ఖాన్‌ (Imran Khan) భారతీయ పౌరుడు కాదని కేంద్రమంత్రి చిరాగ్‌ పాసవాన్‌ పేర్కొన్నారు. విదేశీ శక్తుల అండతో దేశంలో అరాచకం సృష్టించే ప్రయత్నాలు జరుగుతున్నాయని, అలాంటి 'సర్‌' ఆందోళనలకు ఇమ్రాన్‌ ఖాన్‌ దూరంగా ఉండాలని సూచించారు. భారత్‌ను వీడాలంటూ ఇమ్రాన్‌ ఖాన్‌కు నోటీసు జారీ చేసిన నేపథ్యంలో ఈ అంశంపై చిరాగ్‌ పాసవాన్‌ మీడియా వద్ద స్పందించారు.
వివరాలు
'నటుడిగా అతడి యాక్షన్‌ నాకిష్టం'
ఇమ్రాన్‌ ఖాన్‌ నటనపై తనకు అభిమానం ఉందని చెబుతూనే.. ఆయన భారతీయ పౌరుడు కాదనే విషయాన్ని గుర్తుంచుకోవాలని చిరాగ్‌ పాసవాన్‌ వ్యాఖ్యానించారు.
నటుడిగా అతడి యాక్షన్‌ అంటే నాకు ఇష్టం. అయితే, ఒక వ్యక్తి దేశంలో సుదీర్ఘకాలం పనిచేసినంత మాత్రాన భారతీయుడు కాలేడనే విషయాన్ని ఇమ్రాన్‌ గ్రహించాలి.
ఒకవేళ నిజమైన భారతీయులు ఆ ఆందోళనలో పాల్గొంటే వారిని గౌరవిస్తా. కానీ, విదేశీ పౌరులు అందులో పాల్గొనడం ఆందోళనకరమని ఆయన పేర్కొన్నారు.
వివరాలు
ఆందోళనల వెనుక విదేశీ శక్తులు ఉన్నాయన్న మంత్రి
దేశంలో అరాచకం సృష్టించేందుకు జరుగుతున్న ప్రయత్నాలపై తాను ఆందోళన చెందుతున్నట్లు చిరాగ్‌ పాసవాన్‌ తెలిపారు.
ఈ ప్రయత్నాల వెనుక విదేశీ శక్తులు ఉన్నాయని ఆరోపించారు. ఈ నేపథ్యంలో విదేశీ పౌరులు ఇలాంటి ఆందోళనల్లో పాల్గొనడంపై ఆయన అభ్యంతరం వ్యక్తం చేశారు.
ఇమ్రాన్‌ ఖాన్‌కు అమెరికా పౌరసత్వం
బాలీవుడ్‌ నటుడు ఆమీర్‌ ఖాన్‌కు ఇమ్రాన్‌ ఖాన్‌ మేనల్లుడు. ఇమ్రాన్‌ ఖాన్‌కు అమెరికా పౌరసత్వం ఉంది. ఆయన ఓవర్సీస్‌ సిటిజన్‌ ఆఫ్‌ ఇండియా (OCI) కార్డును కూడా పొందారు.
దాదాపు పదేళ్లుగా బాలీవుడ్‌లో పనిచేస్తున్నారు. అయితే, భారత్‌ను వీడాలంటూ ఇమ్రాన్‌ ఖాన్‌కు నోటీసు జారీ కావడం, దానిపై కేంద్ర మంత్రి చిరాగ్‌ పాసవాన్‌ స్పందించడం ప్రస్తుతం చర్చనీయాంశంగా మారింది.