A320 Family Planes: భారత ఎయిర్‌లైన్స్‌ వేగవంతమైన స్పందన.. ఏ320 విమానాల సాఫ్ట్వేర్ సమస్య పరిష్కారం
ఈ వార్తాకథనం ఏంటి
భారత్ ఎయిర్ లైన్స్‌ వినియోగిస్తున్న ఎయిర్బస్ ఏ320 విమానాల్లో గుర్తించిన సాఫ్ట్వేర్ సమస్యను పూర్తిగా పరిష్కరించినట్లు పౌర విమానయాన నియంత్రణ సంస్థ డీజీసీఏ ఆదివారం ప్రకటించింది. దేశంలో ఉన్న మొత్తం 323 విమానాల్లో సాఫ్ట్వేర్ అప్‌డేట్ పూర్తయిందని వెల్లడించింది. భారత్ ఎయిర్‌బస్‌కు చెందిన ఏ320 మోడల్‌కు మొత్తం 338 విమానాలున్నాయి. ఇవి ప్రధానంగా ఇండిగో, ఎయిర్ ఇండియా, ఇండియా ఎక్స్‌ప్రెస్‌ వంటి విమానయాన సంస్థలు నడుపుతున్నాయి. ప్రస్తుతం 323 విమానాలు సేవల్లో ఉండగా, ఆరు విమానాలు మెయింటెనెన్స్‌లో ఉన్నాయని, మరో తొమ్మిది విమానాలకు అప్‌గ్రేడ్ అవసరం లేదని అధికారులు వివరించారు. సూర్యుడి తీవ్రమైన వేడి, సోలార్‌ రేడియేషన్ ప్రభావం కారణంగా ఏ320 మోడల్‌ విమానాల్లో సాఫ్ట్వేర్ వ్యవస్థ దెబ్బతింటున్నట్లు అధికారులు తెలిపారు.
Details
సోలార్‌ రేడియేషన్ ప్రభావమే కారణం
ఇటీవల ఎయిర్‌బస్‌కు చెందిన జెట్‌బ్లూ ఏ320 విమానంలో ఇదే సమస్య ఎదురైన విషయం గుర్తుచేశారు. కీలక నియంత్రణ డేటా దెబ్బతినడంతో సాఫ్ట్‌వేర్‌లో మార్పులు చేయాలని ఎయిర్బస్ అత్యవసర హెచ్చరికలు జారీ చేసింది. సాంకేతికంగా ఇది తీవ్రమైన సోలార్‌ రేడియేషన్ ప్రభావమే కారణమని పరిశీలనలో తేలింది. ఏ320 మోడల్‌తో పాటు ప్రపంచవ్యాప్తంగా సుమారు 6వేల ఎయిర్బస్ విమానాలకు కూడా ఇలాంటి అప్‌గ్రేడేషన్‌ అవసరమని సంస్థ ప్రకటించింది. ఈ పరిస్థితుల ప్రభావంతో ఏ320 విమానాల రాకపోకల్లో అంతరాయం ఏర్పడింది. దీనితో భారత్‌లోని అన్ని విమానయాన సంస్థలు వెంటనే చర్యలు చేపట్టాలని డీజీసీఏ ఆదేశాలు జారీచేసింది. ఎయిర్బస్ సూచనల నేపథ్యంలో ముందస్తుగా అవసరమైన మార్పులు చేపట్టామని ఇండిగో, ఎయిర్ ఇండియా, ఎయిర్ ఇండియా ఎక్స్‌ప్రెస్‌ సంస్థలు ప్రకటించాయి.