Indian Railways tightens rules: రైళ్లలో భిక్షాటన,అనధికార విక్రయాలకు చెక్.. రూ.2,000 జరిమానాతో కొత్త రైల్వే నిబంధనలు
ఈ వార్తాకథనం ఏంటి
రైలు ప్రయాణికుల భద్రతను మరింత బలోపేతం చేయడంతో పాటు ప్రయాణ అనుభవాన్ని మెరుగుపర్చే లక్ష్యంతో భారతీయ రైల్వే కీలక నిర్ణయం తీసుకుంది. 'జన్ విశ్వాస్ (నిబంధనల సవరణ) చట్టం-2026' పరిధిలో రైల్వే నిబంధనలను కఠినతరం చేస్తూ కేంద్ర ప్రభుత్వం తాజా గెజిట్ నోటిఫికేషన్ జారీ చేసింది. ఈ నిబంధనల ప్రకారం రైళ్లలో లేదా రైల్వే స్టేషన్ల పరిధిలో ధూమపానం, అనుమతి లేకుండా వస్తువుల విక్రయం, భిక్షాటన వంటి కార్యకలాపాలను తీవ్రమైన ఉల్లంఘనలుగా పరిగణించనున్నారు. ఈ నెల 19న విడుదలైన మార్గదర్శకాలు వెంటనే అమల్లోకి వచ్చినట్లు రైల్వే శాఖ వెల్లడించింది.
వివరాలు
ధూమపానానికి భారీ జరిమానా
రైల్వే చట్టం-1989లోని సెక్షన్ 167 ప్రకారం ఇప్పటి వరకు ధూమపానానికి విధిస్తున్న రూ.100 జరిమానాను ఏకంగా రూ.2,000కు పెంచారు. అంతేకాకుండా రైళ్లలో ధూమపానం చేస్తూ పట్టుబడిన ప్రయాణికుల టికెట్ లేదా పాస్ను వెంటనే రద్దు చేసే అధికారం రైల్వే సిబ్బందికి కల్పించారు. అవసరమైతే తదుపరి స్టేషన్లో ఆ ప్రయాణికుడిని రైలు నుంచి దించివేయవచ్చు. అదేవిధంగా, జరిమానాను అక్కడికక్కడే చెల్లించకపోతే కేసును కోర్టుకు తరలిస్తారు. కోర్టులో నేరం రుజువైతే గరిష్టంగా రూ.5,000 వరకు జరిమానా విధించే అవకాశం ఉంటుంది. రైళ్లలో అగ్ని ప్రమాదాల ప్రమాదాన్ని తగ్గించడం, ఇతర ప్రయాణికులకు అసౌకర్యం కలగకుండా చూడడం ఈ నిర్ణయానికి ప్రధాన కారణమని రైల్వే బోర్డు తెలిపింది.
వివరాలు
అనధికార విక్రయాలు, భిక్షాటనపై పూర్తి నిషేధం
సెక్షన్ 144 కింద రైల్వే అనుమతి లేదా లైసెన్స్ లేకుండా రైళ్లలో వస్తువులు విక్రయించే హాకర్లు, అలాగే భిక్షాటన చేసే వ్యక్తులపై కఠిన చర్యలు తీసుకోనున్నారు. వీరిపై కూడా రూ.2,000 జరిమానా విధించనున్నారు. ఒకవేళ జరిమానా చెల్లించకపోతే కోర్టు ద్వారా మూడు నెలల వరకు జైలు శిక్ష, రూ.5,000 వరకు జరిమానా లేదా రెండూ విధించే అవకాశం ఉంటుంది. దీంతో రైళ్లలో అనధికారిక కార్యకలాపాలను పూర్తిగా అరికట్టాలని రైల్వే శాఖ లక్ష్యంగా పెట్టుకుంది.
వివరాలు
పదేపదే నిబంధనలు ఉల్లంఘిస్తే కఠిన శిక్ష
కొత్త నిబంధనల ప్రకారం నాలుగోసారి లేదా అంతకంటే ఎక్కువసార్లు ఇదే తరహా ఉల్లంఘనలకు పాల్పడిన వ్యక్తులపై మరింత కఠిన చర్యలు తీసుకోనున్నారు. అలాంటి వారికి కనీసం మూడు నెలల నుంచి గరిష్టంగా ఒక సంవత్సరం వరకు జైలు శిక్ష విధించే అవకాశం ఉంది. ఇకపై కేవలం క్రిమినల్ కేసులపై ఆధారపడకుండా, సివిల్,పరిపాలనా చర్యల ద్వారా వేగంగా జరిమానాలు వసూలు చేసే అధికారాన్ని రైల్వే అధికారులకు కల్పించారు. దీంతో రాబోయే రోజుల్లో రైళ్లు, స్టేషన్లలో తనిఖీలు మరింత విస్తృతంగా నిర్వహించే అవకాశముంది.