Inter Supplementary : మే 22 నుంచి ఇంటర్ సప్లిమెంటరీ పరీక్షలు ప్రారంభం.. ఈ తేదీ నుంచి హాల్ టికెట్లు డౌన్‌లోడ్‌ చేయొచ్చు
ఈ వార్తాకథనం ఏంటి
తెలంగాణ రాష్ట్రంలో ఇంటర్మీడియట్ అడ్వాన్స్‌డ్ సప్లిమెంటరీ పరీక్షలు ఈ నెల 22వ తేదీ నుంచి ప్రారంభం కానున్నాయి. ఈ పరీక్షలకు మొత్తం 4,12,724 మంది విద్యార్థులు హాజరవుతారు. వారిలో ఫస్ట్ ఇయర్ జనరల్ కోర్సులో 2,49,032 మంది, ఒకేషనల్ కోర్సులో 16,994 మంది పరీక్షలకు సిద్ధమవుతున్నారు. అలాగే, రెండవ సంవత్సరం జనరల్ కోర్సుకు 1,34,341 మంది, ఒకేషనల్ కోర్సుకు 12,357 మంది విద్యార్థులు దరఖాస్తు చేశారు. గత నెల ఏప్రిల్ 22న విడుదలైన ఇంటర్ ఫలితాల్లో ఫస్ట్ ఇయర్‌లో సుమారు 1.91 లక్షల మంది మెరుగైన ఫలితాలు కోసం పరీక్షలు రాయనున్నారు. ఇంప్రూవ్‌మెంట్ పరీక్షలకు కూడా దరఖాస్తు చేయడంతో మొత్తం పరీక్ష రాసే వారి సంఖ్య గణనీయంగా పెరిగింది.
Details
పరీక్షలు ముగిసిన 15 రోజుల్లోనే ఫలితాలు
ఇంటర్ బోర్డు ప్రకారం, ఈ సప్లిమెంటరీ పరీక్షలు మే 22 నుంచి మే 29 వరకు రెండు సెషన్లలో నిర్వహించనున్నారు. ఫస్ట్ ఇయర్ పరీక్షలు ఉదయం 9:00 గంటల నుంచి మధ్యాహ్నం 12:00 గంటల వరకు, రెండవ సంవత్సరం పరీక్షలు మధ్యాహ్నం 2:30 గంటల నుంచి సాయంత్రం 5:30 గంటల వరకు జరగనున్నాయి. ఈ పరీక్షల షెడ్యూల్‌ను ఇంటర్మీడియట్ బోర్డు సబ్జెక్టుల వారీగా ఇప్పటికే విడుదల చేసింది. ఇక హాల్‌టికెట్లు పరీక్షలకు రెండు మూడు రోజుల ముందుగా ఇంటర్ బోర్డు అధికారిక వెబ్‌సైట్‌లో అందుబాటులోకి రానున్నాయి. పరీక్షల ముగిసిన 10 నుంచి 15 రోజుల్లో ఫలితాలను విడుదల చేయనున్నట్లు ఇంటర్మీడియట్ బోర్డు వెల్లడించింది.