YS Jagan Mohan Reddy: పులివెందులలో ఓటు వేయకుండానే వెనుదిరిగిన జగన్.. రీపోలింగ్‌కు డిమాండ్
ఈ వార్తాకథనం ఏంటి
పులివెందుల నియోజకవర్గంలో జరిగిన స్థానిక సంస్థల ఎన్నికలు, పోలింగ్ సరళి తీవ్ర ఉద్రిక్తతలు, వివాదాలకు దారితీశాయి. ఎన్నికల్లో అధికార పక్షం భారీ ఎత్తున అక్రమాలకు పాల్పడిందని, ప్రజాస్వామ్యాన్ని అపహాస్యం చేసిందని మాజీ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి ఆరోపించారు. ఈ నేపథ్యంలో ఆయన సంచలన నిర్ణయం తీసుకున్నారు. స్వయంగా ఓటు హక్కు వినియోగించుకునేందుకు పోలింగ్ కేంద్రానికి వెళ్లినప్పటికీ.. అక్కడ జరుగుతున్న పరిణామాలను చూసి తీవ్ర అసంతృప్తి వ్యక్తం చేస్తూ ఓటు వేయకుండానే వెనుదిరిగారు.
వివరాలు
ఓటు వేయడం కంటే అక్రమాలను ప్రశ్నించడమే ముఖ్యం
ఈ సందర్భంగా మీడియాతో మాట్లాడిన వైఎస్ జగన్.. పులివెందులలో జరుగుతున్న పరిణామాలపై తీవ్రస్థాయిలో మండిపడ్డారు.
అక్కడి పరిస్థితులను చూస్తుంటే తాను కూడా ఓటు వేస్తే ప్రజాస్వామ్యాన్ని ఖూనీ చేసినట్లేనని ఒక ఓటరుగా భావిస్తున్నట్లు ఆవేదన వ్యక్తం చేశారు.
కేవలం తన ఓటు హక్కును వినియోగించుకుని వెళ్లిపోవడం కంటే.. అక్కడ జరుగుతున్న అన్యాయాన్ని తీవ్రంగా వ్యతిరేకించడమే ముఖ్యమని భావించినట్లు వివరించారు.
వివరాలు
ఎన్నికల సంఘంపై జగన్ విమర్శలు
ఎన్నికల సంఘం పూర్తిగా ప్రభుత్వ కనుసన్నల్లో పనిచేస్తోందని జగన్ ఆరోపించారు.
రాష్ట్ర ఎన్నికల సంఘం (SEC) వ్యవహరిస్తున్న తీరు చూస్తుంటే చంద్రబాబు మనిషిలా పనిచేస్తున్నట్లు ఉందని విమర్శించారు.
అధికారులు సైతం అధికార పార్టీ చేతిలో తోలుబొమ్మలుగా మారిపోయారని, ఎన్నికల నిబంధనలను పూర్తిగా గాలికి వదిలేశారని ధ్వజమెత్తారు.
వివరాలు
పులివెందులలో రీపోలింగ్ నిర్వహించాలని డిమాండ్
పులివెందులలో జరిగిన దాడులు, దొంగ ఓట్ల నమోదు, రిగ్గింగ్‌పై ఇప్పటికే ఎన్నికల అధికారులకు, రిటర్నింగ్ అధికారికి స్పష్టమైన ఫిర్యాదులు అందజేసినట్లు జగన్ గుర్తుచేశారు.
అయితే అధికారుల నుంచి సరైన స్పందన రాలేదని, అక్రమాలు నిరాటంకంగా కొనసాగాయని ఆరోపించారు.
ఈ కారణంగానే తాను ఓటు వేయకుండా వెనుదిరగాలని నిర్ణయించుకున్నట్లు తెలిపారు.
తాము అందించిన ఫిర్యాదులపై ఎన్నికల సంఘం వెంటనే స్పందించాలని జగన్ డిమాండ్ చేశారు.
పులివెందులలో తక్షణమే రీపోలింగ్ నిర్వహించాలని కోరారు. రీపోలింగ్ తేదీని ప్రకటించిన తర్వాతే తాను తిరిగి వచ్చి ఓటు హక్కును వినియోగించుకుంటానని స్పష్టం చేశారు.