Indian Women's Cricket 50 Years:50 ఏళ్ల క్రితం తొలి భారత మహిళా క్రికెట్ జట్టు
ఈ వార్తాకథనం ఏంటి
1976 అక్టోబర్ 31న బెంగళూరులోని చిన్నస్వామి స్టేడియంలో వెస్టిండీస్‌తో జరిగిన టెస్ట్ మ్యాచ్‌తో భారత మహిళల జట్టు అధికారిక అంతర్జాతీయ ప్రయాణం మొదలైంది. శాంతా రంగస్వామి కెప్టెన్సీలో బరిలోకి దిగిన భారత జట్టుకు ప్రేక్షకుల నుంచి అద్భుతమైన స్పందన లభించింది. ఏకంగా 22 వేల మంది అభిమానులు స్టేడియానికి వచ్చి మ్యాచ్‌ను వీక్షించారు. మూడు రోజుల పాటు సాగిన ఈ తొలి టెస్ట్ డ్రాగా ముగిసింది. అయినా భారత మహిళల క్రికెట్ చరిత్రలో అదొక మరపురాని ఆరంభంగా నిలిచిపోయింది.
Details
తొలి జట్టులోని ఆ 11 మంది వీరనారులు
ఆ చారిత్రక మ్యాచ్‌లో భారత తరఫున ఆడిన ఆటగాళ్లు సంధ్యా మజుందార్, శోభా పండిట్, ఫౌజియా ఖలీలీ, సుధా షా, శాంతా రంగస్వామి, ఉజ్వల నికమ్, శుభాంగి కులకర్ణి, డయానా ఎదుల్జీ, షర్మిలా చక్రవర్తి, బెహ్రోజ్ ఎదుల్జీ, సుసన్ ఇట్టిచెరియా.
వీరిలో కొందరు ఆ మ్యాచ్‌లోనే బ్యాటింగ్‌తో, బౌలింగ్‌తో తమ ప్రతిభను చూపించారు.
తొలి టెస్ట్‌లో శాంతా రంగస్వామి 74 పరుగులు చేయగా, శుభాంగి కులకర్ణి ఐదు వికెట్లు పడగొట్టారు. ఆ తరం ఆటగాళ్లు వేసిన పునాదులే తర్వాతి తరాలకు మార్గం చూపించాయి.
Details
తొలి అంతర్జాతీయ విజయం.. డయానా ఎదుల్జీ ప్రత్యేకత
అంతర్జాతీయ క్రికెట్‌లో తొలి విజయం కోసం భారత జట్టు ఎక్కువ కాలం ఎదురుచూడాల్సి రాలేదు.
అదే వెస్టిండీస్‌తో జరిగిన ఆరు టెస్టుల సిరీస్‌లో పాట్నాలో నవంబర్ 17 నుంచి జరిగిన నాలుగో మ్యాచ్‌లో భారత్ ఐదు వికెట్ల తేడాతో గెలిచింది. ఆ విజయానికి డయానా ఎదుల్జీ కొట్టిన విన్నింగ్ రన్స్ ప్రత్యేక గుర్తింపుగా నిలిచాయి.
తొలి మ్యాచ్‌లో అడుగుపెట్టిన జట్టు.. అదే సిరీస్‌లో విజయాన్ని అందుకోవడం భారత మహిళల క్రికెట్‌కు కొత్త ఉత్సాహాన్నిచ్చింది.
Details
ప్రపంచ ఛాంపియన్‌గా ఎదిగిన వుమెన్ ఇన్ బ్లూ
ఆ తర్వాతి ఐదు దశాబ్దాల్లో భారత మహిళల క్రికెట్ రూపురేఖలే మారిపోయాయి. మిథాలీ రాజ్, ఝులన్ గోస్వామి, హర్మన్‌ప్రీత్ కౌర్, స్మృతి మంధాన వంటి ఆటగాళ్లు అంతర్జాతీయ స్థాయిలో తమదైన ముద్ర వేశారు.
2022 ఆసియా క్రీడల్లో స్వర్ణం సాధించిన భారత్, 2025లో హర్మన్‌ప్రీత్ కౌర్ నాయకత్వంలో తొలిసారి మహిళల వన్డే ప్రపంచకప్‌ను గెలుచుకుంది. మహిళల ప్రీమియర్ లీగ్ (WPL) రాకతో కొత్త ప్రతిభకు అవకాశాలు పెరిగాయి.
ఒకప్పుడు ఎన్నో ఇబ్బందుల మధ్య ప్రయాణం సాగించిన మహిళా క్రికెటర్లు.. నేడు దేశానికి ప్రపంచ స్థాయి విజయాలు అందిస్తున్నారు. ఈ 50 ఏళ్ల ప్రయాణం కేవలం క్రికెట్ చరిత్ర మాత్రమే కాదు.. పట్టుదల, పోరాటం, మార్పుకు నిలువెత్తు నిదర్శనం.