Kolkata Airport: ల్యాండింగ్ వేళ లేజర్ లైట్ల కలకలం.. గాల్లోనే విమానం చక్కర్లు
ఈ వార్తాకథనం ఏంటి
కోల్కతా అంతర్జాతీయ విమానాశ్రయంలో శనివారం రాత్రి ఓ విమానానికి ప్రమాదకర పరిస్థితి ఎదురైంది. ల్యాండింగ్కు సిద్ధమవుతున్న సమయంలో పైలట్ కాక్పిట్ వైపు అకస్మాత్తుగా లేజర్ కాంతులు రావడంతో.. విమానాన్ని వెంటనే ల్యాండ్ చేయకుండా కొద్దిసేపు గాల్లోనే చక్కర్లు కొట్టించారు. అనంతరం రెండో ప్రయత్నంలో విమానాన్ని సురక్షితంగా ల్యాండ్ చేశారు. విమానాశ్రయ వర్గాల వివరాల ప్రకారం.. మలేషియా ఎయిర్లైన్స్కు చెందిన విమానం 159 మంది ప్రయాణికులతో కౌలాలంపుర్ నుంచి కోల్కతాకు బయలుదేరింది. గమ్యస్థానానికి చేరువైన తర్వాత పైలట్లు ల్యాండింగ్కు సిద్ధమయ్యారు. అయితే రన్వేకు సుమారు ఎనిమిది నాటికల్ మైళ్ల (దాదాపు 15 కిలోమీటర్లు) దూరంలో ఉండగా.. మధ్యమ్గ్రామ్-బరసాత్ వైపు నుంచి విమానం కాక్పిట్ దిశగా ఒక్కసారిగా ప్రకాశవంతమైన లేజర్ కాంతులు ప్రసరించాయి.
వివరాలు
అప్రమత్తమైన పైలట్
అనుకోకుండా ఎదురైన ఈ పరిణామంతో పైలట్ అప్రమత్తమయ్యారు. లేజర్ కాంతుల కారణంగా విమానాన్ని వెంటనే ల్యాండ్ చేయకుండా.. కొంతసేపు గాల్లో చక్కర్లు కొట్టించారు. పరిస్థితి అనుకూలించిన తర్వాత రెండో ప్రయత్నంలో విమానాన్ని సురక్షితంగా రన్వేపై దించారు.
దీంతో విమానంలోని ప్రయాణికులు, సిబ్బంది ఊపిరి పీల్చుకున్నారు. ల్యాండింగ్ పూర్తయిన అనంతరం మలేషియా ఎయిర్లైన్స్ ఈ ఘటనను కోల్కతా విమానాశ్రయ అధికారుల దృష్టికి తీసుకెళ్లింది.
విమానానికి లేజర్ కాంతులు ప్రసరించిన ఘటనపై స్థానిక పోలీస్ స్టేషన్లో ఫిర్యాదు చేసినట్లు కోల్కతా విమానాశ్రయ డైరెక్టర్ విక్రమ్ సింగ్ తెలిపారు.
విమానాలు ల్యాండింగ్, టేకాఫ్ సమయంలో లేజర్ కాంతులు పైలట్ల దృష్టిని ప్రభావితం చేసే ప్రమాదం ఉండటంతో.. ఇలాంటి ఘటనలు తీవ్ర ఆందోళనకు కారణమవుతున్నాయి.