Manipur: దిల్లీలో విషాదం.. తాగుబోతుల దాడిలో ప్రముఖ మణిపురి గిటారిస్ట్ విక్రమ్ సింగ్ మృతి
ఈ వార్తాకథనం ఏంటి
దిల్లీలోని ఓ శివారు ప్రాంతంలో నివాసం ఉంటున్న ప్రముఖ గిటార్ కళాకారుడు చోంగ్తమ్ విక్రమ్ సింగ్‌పై తాగుబోతుల గుంపు దాడికి పాల్పడింది. ఇంటి ఎదుట అర్ధరాత్రి హంగామా చేస్తున్న వారిని అక్కడి నుంచి వెళ్లిపోవాలని విక్రమ్ సూచించడంతో.. వారు ఆయనపై విచక్షణారహితంగా దాడి చేశారు. ఈ ఘటనలో తీవ్రంగా గాయపడిన 55 ఏళ్ల విక్రమ్ సింగ్ చికిత్స పొందుతూ సోమవారం ప్రాణాలు కోల్పోయారు. ఆదివారం రాత్రి 11 గంటల సమయంలో ఎనిమిది మంది వ్యక్తులు విక్రమ్ సింగ్ ఇంటి ముందు మద్యం మత్తులో హంగామా చేశారు. వారిని అక్కడి నుంచి వెళ్లిపోవాలని విక్రమ్ కోరారు. దీంతో ఆగ్రహించిన వారు ఆయనపై దాడి చేశారు. విచక్షణారహితంగా కొట్టడంతో విక్రమ్ తీవ్రంగా గాయపడ్డారు.
వివరాలు
ఇంఫాల్ నుంచి దిల్లీ వరకు సంగీత ప్రస్థానం
దాడి జరిగిన వెంటనే విక్రమ్ 20 ఏళ్ల కుమారుడు తండ్రిని సమీపంలోని హోలీ ఫ్యామిలీ ఆస్పత్రికి తీసుకెళ్లాడు.
అయితే ఆయన రక్తపోటు తీవ్రంగా పడిపోవడంతో వైద్యులు శస్త్రచికిత్స చేయడం కష్టంగా మారింది.
పరిస్థితి విషమించడంతో చికిత్స పొందుతూ సోమవారం విక్రమ్ తుదిశ్వాస విడిచారు.
మణిపూర్‌లోని ఇంఫాల్‌కు చెందిన విక్రమ్ సింగ్ దిల్లీలో ఓ మ్యూజిక్ స్కూల్‌ను నిర్వహిస్తున్నారు.
తన ఇంటితో పాటు ఢిల్లీ స్కూల్ ఆఫ్ మ్యూజిక్‌లోనూ విద్యార్థులకు గిటార్, సంగీత శిక్షణ అందించేవారు. 'రాక్స్ అండ్ రూట్స్' ప్రాజెక్టులోనూ ఆయన భాగస్వామిగా పనిచేశారు.
వివరాలు
ప్రముఖ కళాకారులతో కలిసి ఆల్బమ్‌లు
రాజస్థానీ జానపద గాయకుడు మామే ఖాన్‌తో కలిసి విక్రమ్ సింగ్ ఓ ఆల్బమ్‌లో పనిచేశారు.
అంతేకాకుండా అనేక సాంస్కృతిక కార్యక్రమాలు, సంగీత కచేరీలను నిర్వహించారు. సంగీత రంగంలో తనకంటూ ప్రత్యేక గుర్తింపు తెచ్చుకున్నారు.
విక్రమ్ సింగ్‌కు ప్రముఖ మణిపురి దర్శకురాలు లక్ష్మీప్రియా దేవితో బంధుత్వం ఉంది.
ఆయన భార్య 54 ఏళ్ల జ్యోత్న్సా ఓ బహుళజాతి సంస్థలో సీనియర్ కన్సల్టెంట్‌గా పనిచేస్తున్నారు.
విక్రమ్ తల్లి చోంగ్తమ్ ఓంగ్బీ కమలాదేవి కూడా ప్రసిద్ధ మణిపురి గాయని. ఆమె మణిపురి శాస్త్రీయ సంగీతంతో పాటు ఆధునిక సంగీతంలోనూ పేరుపొందారు.