Kondagattu: కొండగట్టులో భారీ అగ్నిప్రమాదం.. 32 షాపులు దగ్ధం
ఈ వార్తాకథనం ఏంటి
తెలుగు రాష్ట్రాల్లో ఇటీవల అగ్నిప్రమాదాలు ప్రజలను ఆందోళనకు గురిచేస్తున్నాయి. ఇదే క్రమంలో శనివారం రాత్రి కరీంనగర్ జిల్లా కొండగట్టులో భారీ అగ్నిప్రమాదం సంభవించింది. రాత్రి 11గంటల సమయంలో పట్టణంలోని ఒక బొమ్మల దుకాణంలో మంటలు చెలరేగాయి. క్షణాల్లనే మంటలు పక్కన ఉన్న ఇతర దుకాణాలకు వ్యాపించడంతో మొత్తం 32 బొమ్మల షాపులు పూర్తిగా దగ్ధమయ్యాయి. భారీగా ఎగిసిన మంటలు, దట్టమైన పొగతో ప్రాంతమంతా నిండిపోయింది. అప్రమత్తమైన స్థానికులు వెంటనే అగ్నిమాపక శాఖకు సమాచారం ఇవ్వగా, ఫైర్ సిబ్బంది ఘటనాస్థలానికి చేరుకుని ఫైర్ ఇంజిన్ల సాయంతో మంటలను అదుపులోకి తెచ్చేందుకు ప్రయత్నించారు. అయితే అప్పటికి దుకాణాలు పూర్తిగా కాలిపోయి బూడిదైనట్లు అధికారులు వెల్లడించారు. అదృష్టవశాత్తు ఈ ప్రమాదంలో ఎలాంటి ప్రాణనష్టం జరగకపోవడంతో స్థానికులు ఊపిరిపీల్చుకున్నారు.
Details
రూ.కోటి వరకూ ప్రాణనష్టం
కొండగట్టు స్టేజీ వద్ద—హనుమాన్ విగ్రహం నుంచి కరీంనగర్-జగిత్యాల ప్రధాన రహదారి వరకూ ఉన్న మొత్తం 32 బొమ్మల షాపులు మంటల్లో చిక్కుకున్నాయి. ఒక్కో షాపులో రూ.8లక్షల నుంచి రూ.10లక్షల వరకు విలువైన సరుకు పూర్తిగా నాశనమైందని అధికారులు అంచనా వేస్తున్నారు. మొత్తం మీద ఈ అగ్నిప్రమాదం వల్ల దాదాపు కోటి రూపాయల మేర ఆస్తినష్టం జరిగినట్లు సమాచారం. మంటలకు గల కారణాలపై విచారణ జరిపిన అధికారులు, ఒక షాపులో జరిగిన షార్ట్‌సర్క్యూట్‌ వల్లే అగ్నిప్రమాదం సంభవించినట్లు గుర్తించారు. ఘటన గురించి తెలియగానే మల్యాల సీఐ రవి, ధర్మపురి సీఐ రాంనర్సింహారెడ్డి అక్కడికి చేరుకుని సహాయక చర్యలు చేపట్టారు. ఈ సంఘటనపై కేసు నమోదు చేసి, పూర్తి స్థాయి దర్యాప్తును కొనసాగిస్తున్నట్లు వారు తెలిపారు.