PM Modi: రేషన్ షాపుల్లో ప్రధాని మోదీ పోస్టర్ల, బ్యానర్లు ఏర్పాటు సరికాదు: కేరళ సీఎం విజయన్
ఈ వార్తాకథనం ఏంటి
కేరళలోని రేషన్ షాపుల్లో ప్రధాని నరేంద్ర మోదీ పోస్టర్లు, బ్యానర్లు పెట్టాలన్న కేంద్రం ఆదేశాలు సరికాదని, అమలు చాలా చేయడం కష్టమని ముఖ్యమంత్రి పినరయి విజయన్ అన్నారు.
కేరళలో కేంద్ర ప్రభుత్వం అలాంటి ఆదేశాలు జారీ చేసిందా? అని ఓ ప్రతిపక్ష ఎమ్మెల్యే ప్రశ్నించడంతో ఆయన ఆ రాష్ట్ర అసెంబ్లీలో ఈ వ్యాఖ్యలు చేశారు.
ఐయూఎంఎల్‌ ఎమ్మెల్యే పి.అబ్దుల్‌ హమీద్‌ అడిగిన ప్రశ్నకు రాష్ట్ర పౌరసరఫరాల శాఖ మంత్రి జీఆర్‌ అనిల్ సమాధానమిస్తూ.. 14,000పీఎం బ్యానర్లు, పోస్టర్లు ఏర్పాటు చేసేందుకు ఎఫ్‌సీఐ, కేరళ ఆహార శాఖకు కేంద్రం బాధ్యతలు అప్పగించిందని చెప్పారు.
కేరళ వ్యాప్తంగా ఎంపిక చేసిన 550రేషన్ షాపుల్లో ప్రధాని సెల్ఫీ పాయింట్లను ఏర్పాటు చేయాలని కేంద్రం ఆదేశించింది.
కేరళ
ఎన్నికల కోసం కేంద్రం సరికొత్త పబ్లిసిటీ: విజయన్
ఆహార పదార్థాల పంపిణీకి కేంద్ర ప్రభుత్వ లోగోలు ఉన్న క్యారీ బ్యాగ్‌లను ఉపయోగించాలని కూడా ఆర్డర్ ఉందని మంత్రి అనిల్ తెలిపారు.
ఉత్తర్వులు అమలులో ఉన్నాయో లేదో తనిఖీ చేయాలని ఎఫ్‌సీఐ అధికారులను కేంద్రం కోరినట్లు ఆయన తెలిపారు.
రేషన్ పంపిణీ వ్యవస్థను ఎన్నికల ప్రచారానికి వినియోగించడం సరికాదని మంత్రి అనిల్ మండిపడ్డారు.
కేరళలో చాలా కాలంగా రేషన్ వ్యవస్థ ఉందని సీఎం విజయన్ తెలిపారు. గతంలో ఎన్నడూ లేని విధంగా కేంద్ర ప్రభుత్వం సరికొత్త పబ్లిసిటీ పద్ధతిని అమలు చేస్తోందన్నారు.
ఇది, రానున్న లోక్‌సభ ఎన్నికలకు ముందు జరుగుతున్న ఎన్నికల ప్రచారమని స్పష్టమవుతోందని ముఖ్యమంత్రి అన్నారు.
రాష్ట్రంలో అమలు చేయడం కష్టమని తమ ప్రభుత్వం కేంద్రానికి తెలియజేస్తుందని విజయన్ చెప్పారు.