'ఇండియా' కూటమిపై మోదీ ధ్వజం.. మరోసారి కేంద్రంలో బీజేపీదే అధికారమని ధీమా
ఈ వార్తాకథనం ఏంటి
ప్రధాన మంత్రి నరేంద్ర మోదీ విపక్షాలపై తీవ్ర విమర్శలు గుప్పించారు. మంగళవారం దిల్లీలో జరిగిన బీజేపీ పార్లమెంటరీ పార్టీ సమావేశంలో మోదీ పాల్గొన్నారు. ఈ క్రమంలోనే ప్రతిపక్షాలకు చెందిన పార్లమెంట్ సభ్యులు నిరసనలతో చట్టసభల కార్యకలాపాలకు విఘాతం కలిగిస్తున్నారని ఆయన మండిపడ్డారు.
ఎలాంటి లక్ష్యం, దిశ లేకుండానే ఆయా పార్టీల సభ్యులు ముందుకెళ్తున్నారని ఎద్దేవా చేశారు. అసలు లక్ష్యం లేకుండా ముందుకెళ్లే విపక్షాలను తాను ఇంతవరకు చూడలేదని మోదీ అసహం వ్యక్తం చేశారు.
ఆయా పార్టీలు ఎలాగైనా అధికారంలోకి రావాలని కోరుకోవట్లేదన్న మోదీ, తమ తీరుతో ఎప్పటికీ విపక్షంలోనే ఉండాలని కోరుకుంటున్నట్లుగా అభివర్ణించారు.
విపక్షాల కూటమి పేరులో ఇండియా (INDIA)ఉంటే సరిపోదని, ఈస్ట్‌ ఇండియా కంపెనీ, ఇండియన్ ముజాహిదీన్ పేర్లలోనూ ఇండియా ఉందన్నారు.
DETAILS
విపక్షాల వల్లే సభలు జరగడం లేదు: మోదీ
ఇండియా అనే పదం ద్వారా విపక్షాలు దేశ ప్రజలను తప్పుదోవ పట్టించేందుకు యత్నిస్తున్నారని మోదీ అన్నారు.
ప్రస్తుత వర్షాకాల పార్లమెంట్ సమావేశాల్లో సభ కార్యకలాపాలు ఏ ఒక్కరోజూ సజావుగా సాగలేదని, దీనికి కారణం విపక్షాల తీరేనని మోదీ విరుచుకుపడ్డారు.
మరోవైపు 2024 సార్వత్రిక ఎన్నికల్లో భాజపా అఖండ విజయంపై ప్రధాని విశ్వాసం వ్యక్తం చేశారు.
మణిపుర్‌ రాష్ట్రంలో నెలకొన్న ఉద్రిక్తత వాతావరణం నేపథ్యంలో ప్రధాని మోదీ పార్లమెంట్ లో ప్రకటన చేయాలని విపక్షాలు పట్టుబడుతున్నాయి. ఈ నేపథ్యంలోనే ఉభయసభల్లో ప్రతిష్టంభన నెలకొంటోంది. గందరళగోళ పరిస్థితుల నడుమ సభలు వాయిదాలు పడుతున్నాయి.