Sonam Wangchuk: దీక్ష విరమణపై సోనమ్ వాంగ్చుక్ కీలక వ్యాఖ్యలు.. అసలు కారణం ఇదే!
ఈ వార్తాకథనం ఏంటి
కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలన్న డిమాండ్పై తాను ఎందుకు వెనక్కి తగ్గాల్సి వచ్చిందో సామాజిక కార్యకర్త సోనం వాంగ్చుక్ వివరించారు. ప్రభుత్వంతో జరిగిన చర్చల్లో నిరసనల్లో పాల్గొన్న విద్యార్థులపై ఎలాంటి న్యాయపరమైన చర్యలు తీసుకోకూడదన్న హామీకి తాను అత్యంత ప్రాధాన్యం ఇచ్చినట్లు చెప్పారు. ఈవిషయంలో ఎట్టి పరిస్థితుల్లోనూ రాజీపడకూడదన్నదే తన ప్రధాన షరతని స్పష్టం చేశారు. పీజీఎక్స్ పాడ్కాస్ట్లో ప్రఖర్ గుప్తాతో మాట్లాడిన వాంగ్చుక్.. జులై 22నాటికి నిరసనలు ఇతర నగరాలకూ విస్తరించే పరిస్థితి కనిపించిందని తెలిపారు. అదే సమయంలో హింసాత్మక ఘటనలు చోటుచేసుకునే ప్రమాదం ఉందని ఆందోళన చెందినట్లు చెప్పారు. ఈ నేపథ్యంలో మంత్రి రాజీనామా కంటే విద్యార్థుల భద్రతకే ఎక్కువ ప్రాధాన్యం ఇవ్వాలని నిర్ణయించుకున్నట్లు వివరించారు.
వివరాలు
లిఖితపూర్వక హామీ కోసం పట్టుబట్టా
2025 సెప్టెంబరులో లడఖ్లో చోటుచేసుకున్న హింసాత్మక ఘటనలను కూడా ఆయన ప్రస్తావించారు.
ఆ ఘటనల తర్వాత 80కి పైగా కేసులు నమోదయ్యాయని, హింసను నిలువరించేందుకు ప్రయత్నించిన వారిలో కొందరు కూడా జైలుకు వెళ్లాల్సి వచ్చిందని గుర్తుచేశారు.
ఢిల్లీలోనూ ఇలాంటి పరిస్థితి మరోసారి తలెత్తకూడదనే ఉద్దేశంతోనే తాను దీక్ష విరమణకు అంగీకరించినట్లు వాంగ్చుక్ తెలిపారు.
విద్యార్థులపై కేసులు నమోదు చేయబోమని ప్రభుత్వం తొలుత మౌఖికంగా హామీ ఇవ్వడానికి ప్రయత్నించిందని వాంగ్చుక్ చెప్పారు.
అయితే దానిని తాను అంగీకరించలేదని తెలిపారు. మౌఖిక హామీకి బదులుగా లిఖితపూర్వక హామీ ఇవ్వాలని పట్టుబట్టినట్లు వెల్లడించారు.
జులై 23 రాత్రి సుమారు 11:30 గంటల సమయంలో ప్రభుత్వం లిఖితపూర్వక హామీ ఇచ్చేందుకు అంగీకరించిందని ఆయన పేర్కొన్నారు.
వివరాలు
దీక్ష విరమించినప్పటికీ కొనసాగిన ఆందోళన
అంతకుముందు జులై 21 రాత్రి కేంద్ర మంత్రులు జేపీ నడ్డా, జితేంద్ర సింగ్ ఆసుపత్రికి వచ్చి తనను కలిసి నిరాహార దీక్ష విరమించాలని కోరినట్లు తెలిపారు.
ప్రభుత్వం నుంచి లిఖితపూర్వక హామీ లభించిన తర్వాత వాంగ్చుక్ తన నిరాహార దీక్షను విరమించారు.
అయితే కాక్రోచ్ జనతా పార్టీ (సీజేపీ) నేతలు మాత్రం కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలన్న డిమాండ్తో తమ ఆందోళనను కొనసాగించారు.
ఈ పరిణామంపై వాంగ్చుక్ స్పందిస్తూ.. బాధ్యతారాహిత్యానికి జవాబుదారీతనం ఉండాలన్న ఉద్దేశంతో మంత్రి రాజీనామాను డిమాండ్ చేయడాన్ని తాను సమర్థిస్తున్నట్లు చెప్పారు.
బాధ్యత వహించాల్సిన పరిస్థితుల్లో రాజీనామా కోరడం సరైనదేనని ఆయన అభిప్రాయపడ్డారు.