Watershed 3.0 Project: వాటర్షెడ్ 3.0కు రాష్ట్రం భారీ ప్రతిపాదనలు.. రూ.3,520 కోట్ల ప్రణాళిక
ఈ వార్తాకథనం ఏంటి
వర్షాభావ ప్రాంతాల్లో భూసారాన్ని మెరుగుపరచడం,నీటి వనరులను సంరక్షించడం,దీర్ఘకాలిక నీటి భద్రత కల్పించడం లక్ష్యంగా కేంద్ర ప్రభుత్వం అమలు చేయనున్న ప్రధానమంత్రి కృషి సంచాయీ యోజన-వాటర్షెడ్ డెవలప్మెంట్ కాంపొనెంట్ (WDC) 3.0 కోసం రాష్ట్ర ప్రభుత్వం భారీ ప్రతిపాదనలు సిద్ధం చేసింది. మొత్తం రూ.3,520 కోట్ల వ్యయంతో 406 వాటర్షెడ్ ప్రాజెక్టులను చేపట్టాలని కేంద్ర ప్రభుత్వానికి నివేదించింది. ఈ ప్రతిపాదనల ప్రకారం 19 జిల్లాలు, నాలుగు ఐటీడీఏల పరిధిలో ఐదేళ్ల వ్యవధిలో 16.10 లక్షల హెక్టార్లలో వాటర్షెడ్ అభివృద్ధి పనులు చేపట్టేలా ప్రణాళిక రూపొందించారు. ప్రస్తుతం ఈ ప్రతిపాదనలు కేంద్ర ప్రభుత్వ పరిశీలనలో ఉన్నాయి.
వివరాలు
రూ.555 కోట్లతో 50 వాటర్షెడ్ ప్రాజెక్టులు
ప్రస్తుతం అమలవుతున్న వాటర్షెడ్ డెవలప్మెంట్ కాంపొనెంట్ 2.0 కార్యక్రమం త్వరలో ముగియనున్న నేపథ్యంలో కేంద్రం 3.0 కార్యక్రమాన్ని ప్రారంభించేందుకు సిద్ధమవుతోంది.
ఈ క్రమంలో 2.0 అమలు చేస్తున్న రాష్ట్రాల నుంచి కొత్త ప్రాజెక్టుల ప్రతిపాదనలు కోరగా, రాష్ట్ర ప్రభుత్వం తన కార్యాచరణ ప్రణాళికను సమర్పించింది.
రాష్ట్రంలో ఇప్పటికే 2021-22 నుంచి రూ.555 కోట్లతో 50 వాటర్షెడ్ ప్రాజెక్టులు అమలవుతున్నాయి.
వీటి ద్వారా 2.44 లక్షల హెక్టార్లలో అభివృద్ధి పనులు కొనసాగుతున్నాయి. ఈ ప్రాజెక్టుల అమలు మరో రెండు నెలల్లో పూర్తికానుంది.
వివరాలు
వాటర్షెడ్ 3.0లో ప్రధాన లక్ష్యాలు
కొత్త దశలో వర్షపు నీటిని గరిష్ఠంగా వినియోగించుకునేలా నీటి సంరక్షణ, నిల్వ, పంపిణీ వ్యవస్థలను బలోపేతం చేయడంపై ప్రత్యేక దృష్టి సారించనున్నారు.
అలాగే నదుల పునరుద్ధరణ, చెరువులు, కుంటలు వంటి సంప్రదాయ జలవనరుల పునరుజ్జీవన కార్యక్రమాలను ఈ పథకంతో అనుసంధానించనున్నారు.
కొండ ప్రాంతాలు, ఎత్తైన ప్రాంతాల్లో ఉన్న సహజ నీటి ఊటలను పునరుద్ధరించడంతో పాటు వాటి పరీవాహక ప్రాంతాలను అభివృద్ధి చేసి, దీర్ఘకాలిక నీటి లభ్యతను పెంచే చర్యలు చేపట్టనున్నారు.
అలాగే సమగ్ర వ్యవసాయ విధానాలు, వ్యవసాయ వాతావరణ సూచనల ఆధారంగా రైతులకు సాంకేతిక మార్గనిర్దేశం అందించి, వాతావరణ మార్పుల వల్ల కలిగే నష్టాలను తగ్గించేందుకు చర్యలు తీసుకోనున్నారు.
వివరాలు
గ్రామస్థాయిలోనే ప్రణాళికలు
వాటర్షెడ్ పనుల ప్రణాళికను గ్రామస్థాయిలోనే రూపొందించే విధానాన్ని అమలు చేయనున్నారు.
ప్రాజెక్టుల అమలు, నిర్వహణలో గ్రామపంచాయతీలు, వాటర్షెడ్ రైతు సంఘాలను భాగస్వాములుగా చేర్చనున్నారు.
దీంతో అభివృద్ధి పనులు దీర్ఘకాలం సమర్థంగా కొనసాగుతాయని కేంద్ర ప్రభుత్వం భావిస్తోంది.
వివరాలు
డ్రోన్లు, ఉపగ్రహ సాంకేతికతకు ప్రాధాన్యం
వాటర్షెడ్ 3.0 అమలులో డ్రోన్లు, ఉపగ్రహ సాంకేతికతను విస్తృతంగా వినియోగించాలని కేంద్రం రాష్ట్రాలకు సూచించింది.
వీటి ద్వారా భూభాగ స్వరూపం, నీటి ప్రవాహ మార్గాలు, నీటి నిల్వ సామర్థ్యం వంటి అంశాలపై ఖచ్చితమైన అంచనాలు వేయడం సులభమవుతుంది.
అలాగే ప్రాజెక్టుల పురోగతిని రియల్టైమ్లో పర్యవేక్షించే అవకాశం కూడా కలుగుతుందని కేంద్రం స్పష్టం చేసింది.