Airbus: ఎయిర్‌బస్‌ ఏ320లకు 'సన్‌ స్ట్రోక్‌'.. సోలార్‌ రేడియేషన్‌ను ఎలా దెబ్బతీసిందంటే?
ఈ వార్తాకథనం ఏంటి
భానుడి ప్రతాపం ప్రపంచ పౌరవిమానయానాన్ని ఒక్కసారిగా కుదిపేసింది. సూర్యుడి సోలార్‌ రేడియేషన్‌ ప్రభావంతో ఎయిర్‌ బస్‌ (Airbus) తయారీకి చెందిన వేలాది విమానాల్లో సాంకేతిక సమస్యలు తలెత్తే ప్రమాదం ఉందని గుర్తించడంతో ప్రపంచవ్యాప్తంగా ఆందోళన నెలకొంది. దాదాపు 6 వేల ఏ320 విమానాలకు అత్యవసర సాఫ్ట్‌వేర్‌ అప్డేట్ తప్పనిసరి అని ఎయిర్‌బస్‌ ప్రకటించడంతో ఈ ఇష్యూ హాట్‌టాపిక్‌ అయింది. ఇంత పెద్ద రిస్క్‌ ఎలా వచ్చిందో తెలుసుకునే ప్రయత్నం మొదలైంది.
Details
ఉన్నట్టుండి కిందకు దూసుకెళ్లిన ఏ320
అక్టోబర్‌ 30న మెక్సికోలోని కాన్‌కన్‌ నుంచి అమెరికా న్యూయార్క్‌కు బయల్దేరిన జెట్‌బ్లూ ఏ320 విమానం (Airbus A320) విమానయాన చరిత్రలో అరుదైన సాంకేతిక సమస్యను ఎదురుకుంది. ప్రయాణమధ్యంలో ఉన్నట్టుండి విమానం ఎత్తు తీవ్రంగా పడిపోయింది. పైలట్లు వెంటనే అప్రమత్తమై తంపా ఎయిర్‌పోర్ట్‌కు అత్యవసర ల్యాండింగ్ చేశారు. ఈ అకస్మాత్తు పతనంతో 15-20 మంది ప్రయాణికులు గాయపడ్డారు. దర్యాప్తులో ఎలివేటర్‌ అండ్‌ ఎలిరాన్‌ కంప్యూటర్‌ (ELAC) సిస్టమ్‌లో డేటా ఎరేజ్‌ కావడం వల్ల ఈ ఘటన జరిగిందని, దీనికి 'సోలార్‌ రేడియేషన్‌' కారణమని ఫెడరల్‌ ఏవియేషన్‌ అడ్మినిస్ట్రేషన్‌ నిర్ధారించింది.
Details
సూర్యుడు పంపే శక్తివంతమైన కణాలే కారణం
సూర్యుడి నుండి వెలువడే అతినీలలోహిత కిరణాలు, ప్రోటాన్లు, ఎలక్ట్రాన్లు వంటి శక్తివంతమైన కణాల ప్రవాహమే సోలార్‌ రేడియేషన్‌. ఇవి ఒక్కోసారి విమానంలోని అత్యంత సున్నితమైన ఎలక్ట్రానిక్‌ వ్యవస్థలను ప్రభావితం చేస్తాయి. ముఖ్యంగా సౌర జ్వాలలు, కరోనా ఎమిషన్స్‌ వంటి సందర్భాల్లో రేడియేషన్‌ తీవ్రత మరింత పెరుగుతుంది. ఈ రేడియేషన్‌ కారణంగా నావిగేషన్‌, ఫ్లైట్‌ కంట్రోల్‌ డేటా వంటి కీలక సమాచారంలో గందరగోళం ఏర్పడే ప్రమాదం ఉంది. డేటా చెరిగిపోయితే విమానం తోక నియంత్రణను నిర్వహించే ఎలివేటర్లకు తప్పు సిగ్నల్స్‌ చేరే అవకాశం ఉంది. దీంతో విమానం అకస్మాత్తుగా కిందికి దిగిపోవచ్చు.
Details
ఎయిర్‌బస్‌ ఎమర్జెన్సీ అలర్ట్
జెట్‌బ్లూ ఘటన అనంతరం ఎయిర్‌బస్‌ ప్రపంచవ్యాప్తంగా ఉన్న అన్ని ఏ320 సిరీస్‌ విమానాలకు హెచ్చరికలు జారీ చేసింది. ELACయూనిట్‌లోని డేటా సోలార్‌ రేడియేషన్‌ కారణంగా కోల్పోయే ప్రమాదం ఉన్నందున తక్షణమే ప్రత్యేకమైన సాఫ్ట్‌వేర్‌ అప్డేట్ చేయాలని సూచించింది. సుమారు 6,000 విమానాలకు ఈ అప్డేట్ అవసరమని పేర్కొనగా, వీటిలో దాదాపు 1,000పాతవిగా ఉండటం వల్ల వాటిలో హార్డ్‌వేర్‌ అప్‌గ్రేడ్‌ కూడా చేయాల్సి ఉంటుంది. విమానాలు ఏమి చేయాలి? ఎమర్జెన్సీ అలర్ట్ తర్వాత ప్రపంచ వ్యాప్తంగా ఏ320లను నిర్వహిస్తున్న ప్రతి ఎయిర్‌లైన్‌ సాఫ్ట్‌వేర్‌ అప్డేట్ ప్రక్రియను వేగవంతం చేసింది. సరైనELACవెర్షన్‌ ఉండేలా కంప్యూటర్‌ను అప్డేట్ చేయడం కొన్ని గంటల్లో పూర్తవుతుందనగా, హార్డ్‌వేర్‌ మార్పులు ఉంటే అది కొద్ది రోజులు పడే అవకాశం ఉంది.
Details
భారత్‌లో పరిస్థితి
భారతలో అత్యధిక ఏ320 విమానాలు ఇండిగో ఎయిర్‌లైన్స్‌ వద్ద ఉన్నాయి. ఎయిరిండియా, విస్తారా కూడా ఈ మోడల్‌ను విస్తృతంగా వినియోగిస్తున్నాయి. డీజీసీఏ ప్రకారం, భారత్‌లో ప్రభావితమైన 300కు పైగా విమానాలకు ఇప్పటికే అప్డేట్ పూర్తయింది. ఆదివారం నాటికి అన్నీ పూర్తవుతాయని అంచనా. కొత్త ELAC మోడల్‌ ఉన్న విమానాలకు ప్రమాదం లేకపోవడంతో అన్ని ఏ320లకు అప్డేట్ అవసరం లేదని ఎయిర్‌బస్‌ స్పష్టం చేసింది. అయితే అప్డేట్ వర్క్‌ కారణంగా ఇండిగో, ఎయిరిండియాకు చెందిన పలు సర్వీసులు ఆలస్యమవుతున్నాయని తెలుస్తోంది.