హనీమాన్ కి ఇండోనేషియా వెళ్లిన తమిళ వైద్యజంట.. ప్రమాదవశాత్తు సముద్రంలో పడి మృతి
పెళ్లై పట్టుమని 10 రోజులైనా కాలేదు, అప్పుడే ఈ నవ డాక్టర్ దంపతుల విషయంలో విధి కన్నెర చేసింది. కళ్ల ముందే ప్రజలకు సేవలు చేస్తూ ఆదర్శంగా నిలుస్తున్న యంగ్ కపుల్ పై యమపాశాలను ప్రయోగించింది. తమిళనాడుకు చెందిన డాక్టర్ దంపతులు జాలీగా గడిపేందుకు ఇండోనేషియా టూర్ కి వెళ్లారు. అక్కడ ప్రమాదవశాత్తు సముద్రంలో పడిన ఈ వైద్యజంట ప్రాణాలు కోల్పోవడం స్వరాష్ట్రంలో కలకలం సృష్టించింది. ఈ నెల 1న వైద్యురాలు విభూషిణియాకు, వైద్యుడు లోకేశ్వరన్‌తో పెద్దలు ఘనంగా పెళ్లి జరిపించారు. నవ వరుడు లోకేశ్వరన్ ది చెన్నె కాగా నవవధువు తిరువళ్లూరు జిల్లా పూనమల్లి సమీపంలోని సెన్సీర్‌ కుప్పానికి చెందినవారిగా గుర్తించారు.
బోట్ బోల్తాపడి ప్రాణాలు కోల్పోయిన డాక్టర్ కపుల్
కొత్తగా పెళ్లైన నేపథ్యంలో డాక్టర్ కపుల్ ఇండోనేషియాలోని బాలి దీవికి హనీమాన్ నిమిత్తం వెళ్లింది. అయితే ఈ నెల 9న ఆ దేశపు సముద్రంలో బోటు షికారుకెళ్లారు దంపతులు. బోటింగ్ చేస్తున్న క్రమంలో ప్రమాదవశాత్తు పడవ బోల్తాపడటంతో భార్యభర్తలిద్దరూ సముద్రంలో పడి మరణించారు. ప్రమాదం అనంతరం లోకేశ్వరన్ మృతదేహం లభ్యమైంది. నవవధువు విభూషిణియా మృతదేహం మాత్రం శనివారం గుర్తించినట్లు తెలుస్తోంది. ఈ నేపథ్యంలో మృతదేహాలను చెన్నైలోని వరుడి ఇంటికి తరలించేందుకు ప్రభుత్వం ఏర్పాట్లు చేసినట్లు సమాచారం. మరోవైపు హనీమాన్ కోసం వెళ్లిన వైద్య జంట, ఇలా విగతజీవులుగా మారడం పట్ల వారి బంధువులు, కాలనీ వాసులు తీవ్ర విచారం వ్యక్తం చేస్తున్నారు.
