Telangana: తెలంగాణలో కరవు 365 మండలాలు.. 31 జిల్లాల్లో ఈ పరిస్థితులు ఉన్నట్లు ప్రభుత్వ ప్రకటన

వ్రాసిన వారు Sirish Praharaju

Oct 28, 2026

08:14 am

ఈ వార్తాకథనం ఏంటి

తెలంగాణలో కరవు పరిస్థితులు నెలకొన్న 365 మండలాలను ప్రభుత్వం అధికారికంగా ప్రకటించింది. రాష్ట్రంలోని మొత్తం 33 జిల్లాల్లో హైదరాబాద్‌,పెద్దపల్లి మినహా మిగిలిన 31 జిల్లాలను కరవు ప్రభావిత జిల్లాల జాబితాలో చేర్చింది. వీటిలో 111 మండలాల్లో తీవ్ర కరవు, మరో 254 మండలాల్లో మధ్యస్థ కరవు పరిస్థితులు ఉన్నట్లు వెల్లడించింది. ఆయా ప్రాంతాల్లో వెంటనే ఉపశమన చర్యలు చేపట్టాలని జిల్లా కలెక్టర్లను ఆదేశిస్తూ ప్రభుత్వ ప్రధాన కార్యదర్శి (సీఎస్‌) సంజయ్‌ జాజు మంగళవారం ఉత్తర్వులు జారీ చేశారు. ఎల్‌నినో ప్రభావంతో జూన్‌ నుంచి సెప్టెంబరు వరకు సాగిన వానాకాలంలో రాష్ట్రానికి సాధారణంగా కురవాల్సిన వర్షాల కంటే 17శాతం తక్కువ వర్షపాతం నమోదైనట్లు ప్రభుత్వం తెలిపింది.

వివరాలు

ఎల్‌నినో ప్రభావంతో తగ్గిన వర్షాలు

వానాకాలం పంటల సీజన్‌ అక్టోబరు 30తో ముగియనున్న నేపథ్యంలో విపత్తుల నిర్వహణ చట్టం-2005 ప్రకారం కరవు ప్రకటన విడుదల చేసింది.

ఈ ప్రకటనలో కరవు పరిస్థితులు, వ్యవసాయంపై వాటి ప్రభావం, బాధితులకు అందించాల్సిన సహాయ చర్యలకు సంబంధించిన వివరాలను పేర్కొంది.

తెలంగాణలో సాధారణ వర్షపాతం 740.6 మిల్లీమీటర్లు కాగా, ఈ వానాకాలంలో 615.5 మిల్లీమీటర్లు మాత్రమే నమోదైంది.

జూన్‌ నుంచి సెప్టెంబరు మధ్య 17 శాతం వర్షపాతం లోటు ఏర్పడటంతో వ్యవసాయంతోపాటు ఇతర రంగాలపైనా ప్రభావం పడింది.

రాష్ట్రంలోని 18 జిల్లాల్లో సాగు విస్తీర్ణం తగ్గిపోయింది. సాధారణంగా 139.28 లక్షల ఎకరాల్లో సాగు జరిగే రాష్ట్రంలో ఈసారి విస్తీర్ణం 126.06 లక్షల ఎకరాలకు పరిమితమైంది.

వివరాలు

ఎల్‌నినో ప్రభావంతో తగ్గిన వర్షాలు

వరి సాగు కూడా గణనీయంగా తగ్గింది. గతంలో 69.19 లక్షల ఎకరాల్లో వరి సాగు కాగా, ఈసారి 57 లక్షల ఎకరాలకు పడిపోయింది.

అంటే వరి సాగు విస్తీర్ణంలో 18 శాతం తగ్గుదల నమోదైంది. వర్షాలు తగ్గడంతో సాగునీటి లభ్యతపైనా ప్రభావం పడింది.

భారీ, మధ్యతరహా ప్రాజెక్టుల్లో మొత్తం 585 టీఎంసీల నీటిని నిల్వ చేసే సామర్థ్యం ఉండగా, ప్రస్తుతం 179.63 టీఎంసీల నీరు మాత్రమే అందుబాటులో ఉంది.

దీంతో తాగునీటి సరఫరా, వ్యవసాయం, విద్యుత్‌ ఉత్పత్తికి నీటి కొరత ఏర్పడింది. పశువులకు మేత అందించడంలోనూ ఇబ్బందులు తలెత్తాయి.

రాష్ట్రంలో నెలకొన్న పరిస్థితులపై ఈ నెల 23న రాష్ట్ర మంత్రివర్గ ఉపసంఘం ప్రత్యేకంగా సమావేశమై కరవు మండలాల ప్రకటనపై నిర్ణయం తీసుకుంది.

వివరాలు

ఎల్‌నినో ప్రభావంతో తగ్గిన వర్షాలు

కరవు తీవ్రతను అంచనా వేసేందుకు ప్రతి మండలంలోని 10 శాతం గ్రామాలను నమూనాగా తీసుకుని అధికారులు పరిశీలన జరిపారు.

వర్షపాతం ఎంత నమోదైంది, వర్షాల మధ్య ఎంత విరామం ఉంది, సాగు విస్తీర్ణం ఎంత తగ్గింది, నేలలో తేమ పరిస్థితులు ఎలా ఉన్నాయి, భూగర్భ జలాలు, ఉపరితల జలవనరులు ఎంతవరకు అందుబాటులో ఉన్నాయనే అంశాలను పరిశీలించారు.

ఈ ప్రమాణాల ఆధారంగా కరవు తీవ్రతను అంచనా వేసి తుది జాబితాను రూపొందించారు.

వివరాలు

కరవు ప్రాంతాల్లో తక్షణ ఉపశమన చర్యలు

కరవు ప్రభావిత ప్రాంతాల్లో వెంటనే సహాయ చర్యలు ప్రారంభించాలని ప్రభుత్వం జిల్లా కలెక్టర్లను ఆదేశించింది.

వ్యవసాయ, ఉద్యాన, పశుసంవర్ధక శాఖలతోపాటు పౌర సరఫరాల కార్పొరేషన్‌ అధికారులు కరవు ప్రాంతాల్లో పర్యటించి బాధితులను గుర్తించాలని సూచించింది.

చేపడుతున్న సహాయ చర్యల పురోగతిని ఎప్పటికప్పుడు విపత్తుల నిర్వహణ శాఖకు తెలియజేయాలని స్పష్టం చేసింది.

కరవుతో నష్టపోయిన రైతుల ఖాతాల్లో నేరుగా పెట్టుబడి రాయితీ జమ చేసేలా చర్యలు తీసుకోవాలని ప్రభుత్వం ఆదేశించింది.

తాగునీటి ఎద్దడి తలెత్తకుండా ముందస్తు ఏర్పాట్లు చేయడంతోపాటు పశువుల కోసం శిబిరాలు ఏర్పాటు చేయాలని, పశుగ్రాసం పంపిణీ చేపట్టాలని సూచించింది.

గ్రామీణ ప్రాంతాల్లో ఉపాధి పనులు కల్పించేందుకు వీబీ జీరాంజీ పథకం కింద చేపట్టగల పనులను గుర్తించాలని పేర్కొంది.

వివరాలు

కరవు ప్రాంతాల్లో తక్షణ ఉపశమన చర్యలు

రైతులకు ఆర్థికంగా కొంత ఊరట కల్పించేందుకు రాష్ట్ర స్థాయి బ్యాంకర్ల కమిటీ (ఎస్‌ఎల్‌బీసీ) సహకారంతో పంట రుణాలను రీషెడ్యూల్‌ చేయాలని ఆదేశించింది.

రుణాల వసూళ్ల కోసం రైతులపై బలవంతపు చర్యలు తీసుకోకుండా చూడాలని కలెక్టర్లకు సూచించింది.

జాతీయ విపత్తు నిర్వహణ నిధి (ఎన్‌డీఆర్‌ఎఫ్‌) నుంచి కరవు ప్రభావిత ప్రాంతాల రైతులకు నేరుగా పెట్టుబడి రాయితీ అందించేలా చర్యలు తీసుకోవాలని వ్యవసాయ, సహకార శాఖలను ప్రభుత్వం ఆదేశించింది.

తీవ్ర కరవు నెలకొన్న మండలాల్లో గ్రామాల వారీగా వివరాలను సేకరించి ఏడు రోజుల్లో కేంద్ర వ్యవసాయ, హోం మంత్రిత్వ శాఖలకు పంపాలని ప్రణాళిక శాఖకు సూచించింది.

వివరాలు

కేంద్రాన్ని రూ.20 వేల కోట్ల ప్యాకేజీ కోరిన ప్రభుత్వం

మున్సిపాలిటీలు, పట్టణ ప్రాంతాల్లోనూ నీటి కొరత ఏర్పడకుండా అవసరమైన ఉపశమన చర్యలు చేపట్టాలని ఉత్తర్వుల్లో పేర్కొంది.

ఈ ప్రాంతాల్లో పరిస్థితులను జిల్లా కలెక్టర్లు ఎప్పటికప్పుడు పరిశీలించి, అవసరమైన చర్యలు తీసుకోవాలని స్పష్టం చేసింది.

రాష్ట్రంలో ఏర్పడిన కరవు పరిస్థితులను ఎదుర్కొనేందుకు ప్రత్యేక ప్యాకేజీ కింద రూ.20 వేల కోట్లు విడుదల చేయాలని కేంద్ర ప్రభుత్వాన్ని కోరినట్లు రాష్ట్ర ప్రభుత్వం ఉత్తర్వుల్లో వెల్లడించింది.

గత నెల 18న శాసనసభ ఏకగ్రీవంగా ఆమోదించిన తీర్మానంలోని అంశాలను కూడా జీవోలో పొందుపరిచింది.

కరవు నష్టాన్ని అంచనా వేసేందుకు కేంద్ర బృందాలను వెంటనే తెలంగాణకు పంపించాలని ప్రభుత్వం కోరింది.

వివరాలు

కేంద్రాన్ని రూ.20 వేల కోట్ల ప్యాకేజీ కోరిన ప్రభుత్వం

రాష్ట్ర విపత్తుల నిర్వహణ నిధికి కేంద్ర విపత్తుల నిర్వహణ నిధి నుంచి ఆర్థిక సాయం విడుదల చేయాలని విజ్ఞప్తి చేసింది.

రైతులకు పంట రుణాలు, పెట్టుబడి రాయితీలు అందించడంతోపాటు తాగునీరు, పశుగ్రాసం, భూగర్భ జలాల అభివృద్ధి, నీటి వనరుల పునరుద్ధరణకు కేంద్రం సహకరించాలని కోరింది.

వీబీ జీరాంజీ పథకంలో భాగంగా అదనంగా 50రోజుల ఉపాధి పనులు కల్పించాలని, వాటి ఖర్చును పూర్తిగా కేంద్రమే భరించాలని విజ్ఞప్తి చేసింది.

రాష్ట్ర అవసరాల కోసం అదనంగా 1,500మెగావాట్ల విద్యుత్‌, అదనపు ఎరువులు కేటాయించాలని కోరింది.

2026-27 ఆర్థిక సంవత్సరానికి సంబంధించి రాష్ట్ర స్థూల దేశీయోత్పత్తి (జీఎస్‌డీపీ)లో భాగంగా ఎఫ్‌ఆర్‌బీఎం రుణ పరిమితిని 3శాతం నుంచి 3.5శాతానికి పెంచాలని పేర్కొంది.

వివరాలు

ఆరు జిల్లాల్లోని అన్ని మండలాలూ కరవు ప్రభావితమే

కేంద్ర ప్రభుత్వ ప్రాయోజిత పథకాల కింద రాష్ట్రానికి అదనపు సహకారం అందించాలని కూడా కోరినట్లు ప్రభుత్వం వివరించింది.

రాష్ట్రంలోని ఆరు జిల్లాల్లో అన్ని మండలాలనూ కరవు ప్రభావిత ప్రాంతాలుగా ప్రకటించారు.

సూర్యాపేట, నారాయణపేట, జోగులాంబ గద్వాల, హనుమకొండ, సంగారెడ్డి, వికారాబాద్‌ జిల్లాల్లోని ప్రతి మండలాన్ని కరవు జాబితాలో చేర్చారు.

దీంతో ఈ జిల్లాల్లోని బాధిత ప్రాంతాలకు అవసరమైన ఉపశమన చర్యలను వేగంగా అమలు చేయాల్సిన బాధ్యత అధికారులపై ఉంది.