HYDRA: హైడ్రాకు విస్తృత అధికారాలు.. ఆర్డినెన్స్ జారీ చేయనున్న ప్రభుత్వం
ఈ వార్తాకథనం ఏంటి
తెలంగాణ ప్రభుత్వం నీటి వనరుల్లో ఆక్రమణలు, అక్రమ కట్టడాల తొలగింపుకు హైడ్రా (హైదరాబాద్ డిజాస్టర్ రెస్పాన్స్ అండ్ అసెట్స్ ప్రొటెక్షన్ ఏజెన్సీ)కి విస్తృత అధికారాలు కల్పించే కసరత్తు చేస్తోంది. ఇందుకోసం ప్రత్యేక చట్టాన్ని రూపొందిస్తోంది. 1905 నాటి తెలంగాణ భూ ఆక్రమణ చట్టాన్ని సవరించి, కొత్త చట్టం తీసుకురావాలని యోచిస్తోంది. ప్రస్తుతం ఉన్న భూ ఆక్రమణ చట్టంలోని 1ఏ, 7ఏ సెక్షన్లను సవరించాలని నిర్ణయించింది. అసెంబ్లీ సమావేశాలు లేని కారణంగా, ఈ చట్ట సవరణను ఎమెండ్మెంట్ ఆర్డినెన్స్ రూపంలో 2024లో ప్రవేశపెట్టనుంది.
వివరాలు
భారీ వర్షాలు వచ్చినప్పుడు ట్రాఫిక్‌ పోలీసులతో సమన్వయం
రెవెన్యూ, నీటిపారుదల, పురపాలక శాఖలు, జీహెచ్‌ఎంసీ, బీపాస్, వాల్టా, ఫైర్ సర్వీసులు వంటి పలు శాఖలకు ఇప్పటికే ఉన్న కొన్ని అధికారాలను, కొత్త ఆర్డినెన్స్ ద్వారా హైడ్రాకు అప్పగించనున్నారు. చెరువులు, కుంటలు, నాలాలు, ప్రభుత్వ స్థలాలు వంటి ఆస్తులను సంరక్షించడం, ప్రకృతి వైపరీత్యాల సమయంలో రక్షణ చర్యలు చేపట్టడం, భారీ వర్షాలు వచ్చినప్పుడు ట్రాఫిక్‌ పోలీసులతో సమన్వయం చేయడం వంటి బాధ్యతలను హైడ్రా నిర్వహించనుంది. జీహెచ్‌ఎంసీ పరిధిలోని హైదరాబాద్, రంగారెడ్డి, మేడ్చల్-మల్కాజిగిరి, సంగారెడ్డి జిల్లాల్లో ఓఆర్‌ఆర్ వరకు ఈ సంస్థ పనిచేయనుంది.
వివరాలు
హైడ్రాకు అధికారాలు ఎవరికెవరికీ?
హైడ్రాకు అధిక పరిధి కల్పిస్తూ, తెలంగాణ భూ ఆక్రమణ చట్టం-1905లో సవరణలు చేయాలని ప్రభుత్వం సిద్ధమవుతోంది. ఈ సవరణల ద్వారా ఇప్పటికే వివిధ శాఖలకు ఉన్న అధికారాలు బదిలీ కానున్నాయి. దీనికి అనుసంధానంగా: జీహెచ్‌ఎంసీ చట్టం-1955 ప్రకారం, భూ ఆక్రమణలు పరిశీలించడం, నోటీసులు జారీ చేయడం, ప్రభుత్వ స్థలాల్లో అనధీకృత కట్టడాలను తొలగించడం, అలాగే జరిమానాలు విధించడానికి జీహెచ్‌ఎంసీ కమిషనర్‌కి ఉన్న అధికారాలు. తెలంగాణ పురపాలక చట్టం-2019 ప్రకారం, కార్పొరేషన్‌ మరియు మున్సిపాలిటీ కమిషనర్లకు కూడా వీటికి సంబంధించిన అధికారాలు ఉన్నాయి. బీపాస్ చట్టం-2020 ప్రకారం, జోనల్‌ కమిషనర్‌ ఆధ్వర్యంలోని జోనల్‌ టాస్క్‌ఫోర్స్, జిల్లా కలెక్టర్‌ నేతృత్వంలోని జిల్లా టాస్క్‌ఫోర్స్‌కు కూడా అధికారాలు ఇవ్వబడ్డాయి.
వివరాలు
హైడ్రాకు అధికారాలు ఎవరికెవరికీ?
హెచ్‌ఎండీఏ చట్టం-2008లో 8, 23ఏ సెక్షన్ల కింద హెచ్‌ఎండీఏ కమిషనర్‌కి కట్టుబడిన అధికారాలు. తెలంగాణ భూ ఆదాయ చట్టం 1317ఎఫ్‌ ప్రకారం, ఆర్డీవో మరియు జిల్లా కలెక్టర్లకు ఆక్రమణల తొలగింపు, ఆస్తుల సంరక్షణ వంటి అంశాల్లో అధికారాలు ఉన్నాయి. తెలంగాణ ఇరిగేషన్‌ యాక్ట్‌ 1357ఎఫ్‌ ప్రకారం, నీటిపారుదల శాఖాధికారికి, జిల్లా కలెక్టర్లకు అప్పగించిన అధికారాలు ఉన్నాయి. జీవోఎంఎస్‌-67 (2002) ప్రకారం యు.డి.ఎ/ఎగ్జిక్యూటివ్‌ అధికారికీ కొన్ని అధికారాలు ఉన్నాయి.
వివరాలు
చట్ట సవరణలు పూర్తయిన తర్వాతే హైడ్రాకు అధికారాల బదిలీ
తెలంగాణ భూ ఆక్రమణ చట్టం-1905 సెక్షన్లు 3, 6, 7, 7ఏ కింద జిల్లా కలెక్టర్‌,తహసీల్దార్‌, డిప్యూటీ తహసీల్దార్‌కు అధికారాలు కేటాయించబడ్డాయి. వాల్టా చట్టం-2002,జీవోఎంఎస్‌-168 ద్వారా తెలంగాణ బిల్డింగ్‌ నిబంధనలు,తెలంగాణ ఫైర్ సర్వీసెస్‌ యాక్ట్‌-1999 చట్టాల అధికారాలు తొలగించి హైడ్రాకు ఇవ్వడానికి ప్రతిపాదించారు. ఈ ప్రతిపాదనలు న్యాయ విభాగం పరిశీలనలో ఉన్నా, తెలంగాణ పురపాలక చట్టం, బీపాస్ చట్టం, హెచ్‌ఎండీఏ చట్టం, వాల్టా చట్టాల్లోని అధికారాలను హైడ్రా కమిషనర్‌కు అప్పగించాలని సూచించింది. చట్ట సవరణలు పూర్తయిన తర్వాతే హైడ్రాకు అధికారాల బదిలీ సులభం అవుతుంది.