TTD: టీటీడీ కీలక నిర్ణయం.. టికెట్ల బుకింగుల్లో దళారులకు చెక్ పెట్టేందుకు అమల్లోకి కొత్త విధానం
ఈ వార్తాకథనం ఏంటి
శ్రీ వేంకటేశ్వర స్వామి వారిని దర్శించుకునేందుకు దేశవిదేశాల నుంచి నిత్యం వేలాది మంది భక్తులు తిరుమలకు చేరుకుంటున్నారు. ఈ క్రమంలో శ్రీవారి దర్శనం, సేవలు, వసతి గదుల బుకింగ్‌ వంటి అంశాల్లో దళారులను నమ్మి అనేక మంది భక్తులు మోసపోతున్నారు. ఈ సమస్యను పరిష్కరించేందుకు టీటీడీ (తిరుమల తిరుపతి దేవస్థానం) కీలక నిర్ణయం తీసుకుంది. టికెట్ల బుకింగ్‌లో దుర్వినియోగం, దళారుల ప్రమేయాన్ని పూర్తిగా అరికట్టేందుకు టీటీడీ ప్రత్యేక విధానాన్ని అమల్లోకి తెచ్చేందుకు సిద్ధమైంది.
Details
ఆన్‌లైన్ బుకింగ్‌లో దళారుల బెడద
శ్రీవారి దర్శనం, వసతి, ఆర్జిత సేవలు, శ్రీవారి సేవ వంటి సేవల కోసం భక్తులు ప్రస్తుతం ఆన్‌లైన్ ద్వారా టికెట్లు బుక్ చేసుకుంటున్నారు. అయితే దీనిలో కూడా దళారుల జోక్యం తగ్గకపోవడంతో టీటీడీ ఈ సమస్యకు శాశ్వత పరిష్కారం చూపాలని నిర్ణయించుకుంది. టికెట్ల దుర్వినియోగం నివారించేందుకు, పారదర్శకతను పెంచేందుకు ఆధార్ ఆథెంటికేషన్ (Aadhaar Authentication), ఈకేవైసీ (e-KYC) విధానాలను అమలు చేయాలని టీటీడీ నిర్ణయించింది.
Details
కేంద్ర ప్రభుత్వం అనుమతి
భక్తుల ఆధార్ ఆథెంటికేషన్ అమలుకు అనుమతి కోసం తిరుమల తిరుపతి దేవస్థానం ఈవో గతేడాది జులైలో దేవాదాయ శాఖకు లేఖ రాశారు. ఆ లేఖను దేవాదాయ శాఖ కేంద్ర ప్రభుత్వానికి పంపించగా, ఆగస్టులో కేంద్రం నుంచి అనుమతి లభించింది. అనంతరం నవంబర్ 18న టీటీడీ బోర్డు దీనిపై తీర్మానం చేసింది. ఈ నిర్ణయం ప్రకారం, ఆధార్ ఆథెంటికేషన్, ఈకేవైసీ విధానాన్ని అధికారికంగా అమలు చేసేందుకు నోటిఫికేషన్‌ను గెజిట్‌లో ప్రచురించారు.
Details
ఆధార్ ధ్రువీకరణతో పారదర్శక సేవలు
ఆధార్ ఆథెంటికేషన్, ఈకేవైసీ విధానాల ద్వారా శ్రీవారి దర్శనానికి వచ్చే భక్తుల గుర్తింపును నిర్ధారించేందుకు అవకాశం లభిస్తుంది. ఒకరి పేరుతో మరొకరు టికెట్ బుక్ చేసుకోవడం నిరోధించడంతో పాటు, సేవలు పొందేటప్పుడు తనిఖీ ప్రక్రియను మరింత క్రమబద్ధీకరించేందుకు వీలవుతుంది. ఈ కొత్త విధానంతో భక్తులకు మరింత సౌకర్యంగా, పారదర్శకంగా సేవలు అందించేందుకు టీటీడీ చర్యలు చేపట్టింది.