Naan Mudhalvan scheme: నాన్ ముదల్వన్ పథకం పేరును దాచారంటూ సీఎం విజయ్‌పై ఉదయనిధి స్టాలిన్ విమర్శలు
ఈ వార్తాకథనం ఏంటి
తమిళనాడు ముఖ్యమంత్రి విజయ్‌పై ఆ రాష్ట్ర ప్రతిపక్ష నేత ఉదయనిధి స్టాలిన్ విమర్శలు గుప్పించారు. కోయంబత్తూరులో కొత్తగా ప్రారంభించిన పెరియార్ నాలెడ్జ్ వరల్డ్, సైన్స్ సెంటర్‌లో 'నాన్ ముదల్వన్' పథకం పేరును ఉద్దేశపూర్వకంగా కనిపించకుండా చేశారని ఆరోపించారు. 'నేనే మొదటి వ్యక్తిని' లేదా 'నేనే నాయకుడిని' అనే అర్థం వచ్చే నాన్ ముదల్వన్ పథకాన్ని గతంలో డీఎంకే ప్రభుత్వం ప్రారంభించింది. డీఎంకే ప్రభుత్వ 'ద్రావిడ మోడల్'లో భాగంగా రూ.290 కోట్ల వ్యయంతో ఈ కేంద్రాన్ని నిర్మించారు. పెరియార్ అరివులగం పేరుతో కూడా పిలిచే ఈ కేంద్రాన్ని సీఎం విజయ్ ప్రారంభించారు. ఈ ప్రారంభోత్సవాన్ని స్వాగతించిన ఉదయనిధి స్టాలిన్.. తమ ప్రభుత్వం ప్రవేశపెట్టిన పథకం పేరును కనిపించకుండా చేశారని ఆరోపించారు.
వివరాలు
గత ప్రభుత్వ పథకాలకు ప్రస్తుత ప్రభుత్వం క్రెడిట్ తీసుకుంటోందని స్టాలిన్ ఆరోపణ
గత ప్రభుత్వం ప్రవేశపెట్టిన పథకాలకు ప్రస్తుత ప్రభుత్వం తనదిగా ప్రచారం చేసుకుంటోందని ఉదయనిధి స్టాలిన్ ఆరోపించారు.
అంతటితో ఆగకుండా పెరియార్ నాలెడ్జ్ వరల్డ్‌లో నాన్ ముదల్వన్ పథకం పేరును కూడా కప్పిపుచ్చారని విమర్శించారు.
ఈ మేరకు ఆయన సామాజిక మాధ్యమం ఎక్స్‌లో పోస్టు చేశారు.
''మా ప్రభుత్వం ప్రవేశపెట్టిన పథకాలకు తమ పేర్లను తగిలించుకోవడం అలవాటుగా చేసుకున్నవారు.. ఈసారి పెరియార్ నాలెడ్జ్ వరల్డ్‌లో 'నాన్ ముదల్వన్' పేరును కప్పిపుచ్చే స్థాయికి వెళ్లారు'' అని స్టాలిన్ పేర్కొన్నారు.
వివరాలు
'ముదల్వన్' అనే పదంపై ప్రభుత్వానికి ఎందుకంత వ్యతిరేకత?
నాన్ ముదల్వన్ పథకం పేరును కనిపించకుండా చేయడం వెనుక ప్రభుత్వ ఉద్దేశమేంటని ఉదయనిధి స్టాలిన్ ప్రశ్నించారు.
'ముదల్వన్' అనే పదం వినగానే వారికి తమ పార్టీ నాయకుడే గుర్తుకొస్తారా? లేక విద్యార్థులు తమ తమ రంగాల్లో నాయకులుగా ఎదగడం వారికి ఇష్టం లేదా? అని నిలదీశారు.
పథకాలను రద్దు చేయడం, గత నిర్ణయాలను వెనక్కి తీసుకోవడంపైనా ప్రభుత్వాన్ని విమర్శించారు.
ఇలాంటి 'సర్కస్‌' కార్యక్రమాలకు బదులుగా పాలనపై దృష్టి పెట్టాలని హితవు పలికారు.
కోయంబత్తూరులో సీఎం విజయ్ ప్రారంభించిన పెరియార్ అరివులగం ఒక గ్రంథాలయం, సైన్స్ కేంద్రం.
ఇందులో డిజిటల్ లైబ్రరీతో పాటు ప్లానిటోరియం కూడా ఏర్పాటు చేశారు.