'చంద్రయాన్-3 మిషన్' విఫలమవుతుందని కన్నడ లెక్చరర్ పోస్టు; వివరణ కోరిన ప్రభుత్వం
ఈ వార్తాకథనం ఏంటి
చంద్రయాన్-3 మిషన్‌ను అపహాస్యం చేస్తూ సోషల్ మీడియాలో ఓ కర్ణాటక లెక్చరర్ పోస్టులు పెట్టడం తీవ్ర దుమారాన్ని రేపింది.
బెంగళూరులోని మల్లేశ్వరానికి చెందిన కన్నడ ప్రీ-యూనివర్శిటీ (పీయూ) కళాశాల లెక్చరర్ హులికుంటె మూర్తి ఇస్రో చేపట్టిన చంద్రయాన్-3 మిషన్ విఫలం అవుతుందని సోషల్ మీడయాలో పోస్టు పెట్టారు.
జులై 14న చంద్రయాన్ 3 ప్రయోగానికి ముందు పూజలు చేసేందుకు ఆంధ్రప్రదేశ్‌లోని తిరుపతి ఆలయాన్ని సందర్శించిన ఇస్రో శాస్త్రవేత్తలను ఉద్దేశించి అవహేళన చేస్తూ హులికుంటె మూర్తి పోస్టు పెట్టారు.
కర్ణాటక ప్రీ-యూనివర్శిటీ ఎడ్యుకేషన్ డిపార్ట్‌మెంట్ ఈ విషయాన్ని గుర్తించింది. ప్రభుత్వం ఆేదేశాల మేరకు హులికుంటె మూర్తి నుంచి వివరణ కోరింది.
ఇస్రో
లెక్చరర్ హులికుంటె మూర్తి పోస్టుపై స్పందించిన పీయూ డిప్యూటీ డైరెక్టర్
చంద్రయాన్-3పై మూర్తి పెట్టిన సోషల్ మీడియా పోస్ట్ విషయం తన దృష్టికి వచ్చినట్లు పీయూ (బెంగళూరు నార్త్) డిప్యూటీ డైరెక్టర్ తెలిపారు.
అతను ఎందుకు పోస్ట్ చేశాడనే దానిపై తాము వివరణ కోరినట్లు చెప్పారు. బుధవారంలోపు సమాధానం ఇవ్వాలని మూర్తికి నోటీసులు జారీ చేసినట్లు తెలిపారు. అతను చెప్పే సమాధానం ఆధారంగా చర్యలు తీసుకుంటామని డిప్యూటీ డైరెక్టర్ పేర్కొన్నారు.
హులికుంటె మూర్తి పోస్టుపై అటు ప్రభుత్వంతో పాటు ప్రతిపక్షాలు కూడా తీవ్రస్థాయిలో మండిపడుతున్నాయి.
మరోవైపు కర్ణాటక మాజీ విద్యాశాఖ మంత్రి, భారతీయ జనతా పార్టీ (బీజేపీ) నాయకుడు ఎస్.సురేష్ కుమార్ లెక్చరర్ వ్యవహారంపై పాఠశాల విద్యాశాఖ మంత్రి మధు బంగారప్పకు లేఖ రాశారు. అతనిపై చర్యలు తీసుకోవాలని డిమాండ్ చేశారు.