Nitin Gadkari: గోదావరి నీరు వృథా ఎందుకు..? తెలుగు రాష్ట్రాలపై గడ్కరీ అసహనం!
ఈ వార్తాకథనం ఏంటి
ఆంధ్రప్రదేశ్‌లో కేంద్ర రోడ్లు, రవాణా శాఖ మంత్రి నితిన్ గడ్కరీ పర్యటన నిర్వహించారు. ఈ సందర్భంగా రాష్ట్రానికి చెందిన రూ.5,233 కోట్ల విలువైన జాతీయ రహదారులకు శంకుస్థాపనలు, ప్రారంభోత్సవాలు చేశారు. ఈ కార్యక్రమంలో మాట్లాడిన గడ్కరీ దేశ అభివృద్ధిలో నీరు, విద్యుత్‌, రవాణా, కమ్యూనికేషన్‌ రంగాలు కీలక పాత్ర పోషిస్తున్నాయని పేర్కొన్నారు. అలాగే ఆంధ్రప్రదేశ్ అభివృద్ధిలో నౌకాయాన శాఖ కీలకంగా పనిచేస్తోందని స్పష్టం చేశారు. షిప్పింగ్‌, పోర్టులు, రోడ్ల అభివృద్ధి జరిగితే దేశం వేగంగా ఎదుగుతుందని అభిప్రాయపడ్డారు.
Details
పరోక్షంగా స్పందించిన నితిన్ గడ్కరీ
ఇక తెలుగు రాష్ట్రాల మధ్య కొనసాగుతున్న నీటి వివాదంపై గడ్కరీ పరోక్షంగా స్పందించారు. సముద్రంలోకి వెళ్లే నీటిపై గొడవలు ఎందుకు?" అని ప్రశ్నిస్తూ, ప్రతేడాది సుమారు 1400 టీఎంసీల గోదావరి నీరు సముద్రంలో వృథాగా చేరుతోందని పేర్కొన్నారు. ఈ నీటిని ఉపయోగించేందుకు ఇరువురు రాష్ట్రాలు సరైన చర్యలు తీసుకోవడం లేదు, కానీ పరస్పరం ఆరోపణలే కొనసాగిస్తున్నాయని ఆగ్రహం వ్యక్తం చేశారు. ఇప్పటికైనా రెండు రాష్ట్రాలు కూర్చొని సమస్యను పరిష్కరించుకోవాలని సూచిస్తూ, నీటిని ఒడిసిపట్టి భవిష్యత్ తరాలకు రక్షణ కల్పించాలని ఆయన పిలుపునిచ్చారు.