యోగి ఆదిత్యనాథ్ వర్సెస్ అఖిలేష్ యాదవ్: యూపీలో శాంతిభద్రతలపై అసెంబ్లీలో డైలాగ్ వార్
ఈ వార్తాకథనం ఏంటి
2005లో హత్యకు గురైన బహుజన్ సమాజ్ పార్టీ ఎమ్మెల్యే రాజుపాల్ కేసులో ప్రధాన సాక్షి ఉమేష్ పాల్‌ను ప్రయాగ్‌రాజ్‌లో శుక్రవారం దుండగులు హతమార్చారు. ఈ అంశంపై ఉత్తరప్రదేశ్ అసెంబ్లీలో సీఎం యోగి ఆదిత్యనాథ్, సమాజ్‌వాదీ పార్టీ అధినేత అఖిలేష్ యాదవ్ మధ్య డైలాగ్ వార్ నడిచింది.
మాజీ ఎంపీ అతిక్ అహ్మద్ తమ్ముడు ఖలీద్ అజీమ్‌ను ఓడించి అలహాబాద్ (పశ్చిమ) అసెంబ్లీ స్థానం నుంచి తొలిసారి రాజు పాల్ ఎమ్మెల్యేగా గెలిచారు. కొన్ని నెలలకే రాజు పాల్ హత్యకు గురయ్యారు రాజుపాల్ హత్య కేసులో అతిక్ అహ్మద్, అతని సోదరుడు, మాజీ ఎమ్మెల్యే అష్రఫ్ ప్రధాన నిందితులుగా ఉన్నారు. నిందితులంతా ప్రస్తుతం జైలులో ఉన్నారు.
ఉత్తర్‌ప్రదేశ్
సమాజ్‌వాదీ పార్టీ నేరస్థులను ప్రోత్సహిస్తోంది: సీఎం యోగి
ఇప్పుడు ఈ కేసులో ప్రధాన సాక్షి అయిన ఉమేష్ పాల్‌ను కాల్చి చంపడంపై యోగి ఆదిత్యనాథ్ ప్రభుత్వం చాలా సీరియస్‌గా పరిగణిస్తోంది. ఈ కాల్పుల ఘటన నేపథ్యంలో రాష్ట్రంలో శాంతిభద్రతలపై అసెంబ్లీలో అఖిలేష్ ప్రశ్నించారు.
ఈ మేరకు స్పందించిన సీఎం ఆదిత్యనాథ్, ఎస్పీపై తీవ్రస్థాయిలో విరుచుకుపడ్డారు. సమాజ్‌వాదీ పార్టీ నేరస్థులను ప్రోత్సహిస్తోందన్నారు. వారికి పూలమాలలతో స్వాగతం పలుకున్నారని దుయ్యబట్టారు. ఆపై రాష్ట్రంలో శాంతిభద్రతల పరిస్థితిపై డ్రామా సృష్టిస్తున్నారని ఆగ్రహం వ్యక్తం చేశారు.
మాజీ ఎంపీ అతిక్ అహ్మద్‌కు ఎస్పీ మద్దతిచ్చిన మాట వాస్తవం కాదా? అని ప్రశ్నించారు సీఎం యోగి రాష్ట్రంలోని అన్ని మాఫియాలను తమ ప్రభుత్వం అంతం చేస్తుందన్నారు.