Beetroot Face Mask: సహజ గులాబీ కాంతికి బీట్రూట్ మాస్క్ల మ్యాజిక్
ఈ వార్తాకథనం ఏంటి
హోలీ పండుగ దగ్గరపడుతున్న వేళ... రంగుల సంబరాల్లో అందంగా మెరిసిపోవాలని ప్రతి ఒక్కరూ కోరుకుంటారు. ఆకర్షణీయమైన ముఖ కాంతి కోసం చాలామంది ఖరీదైన బ్యూటీ ప్రొడక్ట్స్, పార్లర్ ట్రీట్మెంట్స్పై ఎక్కువగా ఖర్చు చేస్తుంటారు. కానీ అలా డబ్బులు వెచ్చించకుండానే... మన వంటగదిలో దొరికే సహజ పదార్థాలతోనే చర్మాన్ని ఆరోగ్యంగా, కాంతివంతంగా మార్చుకోవచ్చు. అలాంటి పదార్థాల్లో బీట్రూట్ ఒకటి. ఇందులో ఉండే యాంటీఆక్సిడెంట్లు, విటమిన్లు చర్మానికి సహజ గులాబీ వర్ణాన్ని అందించడంలో దోహదపడతాయి. హోలీ సందర్భంగా తక్షణ మెరుపు కోసం ఇంట్లోనే సులభంగా తయారు చేసుకునే నాలుగు బీట్రూట్ ఫేస్ మాస్క్లు ఇవి.
#1
బీట్రూట్ - క్యారెట్ ఫేస్ మాస్క్
బీట్రూట్, క్యారెట్ రసాల కలయిక చర్మానికి చల్లదనాన్ని అందిస్తూ సహజ కాంతిని పెంచుతుంది. సమాన పరిమాణంలో బీట్రూట్ రసం, క్యారెట్ రసం తీసుకుని బాగా కలపాలి. ఈ ద్రావణాన్ని ఐస్ ట్రేలో పోసి ఫ్రీజ్లో ఉంచి ఐస్ క్యూబ్లుగా చేసుకోవచ్చు. ప్రతి ఉదయం ఒక క్యూబ్ను తీసుకుని ముఖంపై మృదువుగా రుద్దాలి. 10-15 నిమిషాల తర్వాత గోరువెచ్చని నీటితో కడిగి, తరువాత మాయిశ్చరైజర్ అప్లై చేయాలి.
#2
బీట్రూట్ - పెరుగు ఫేస్ మాస్క్
చర్మానికి తేమను అందించి మృదుత్వాన్ని పెంచే మాస్క్ ఇది. ఒక మధ్యస్థ పరిమాణంలో బీట్రూట్ను తురిమి, అందులో 2 టేబుల్ స్పూన్ల పెరుగు, కొన్ని చుక్కల బాదం నూనె వేసి కలపాలి. ఈ మిశ్రమాన్ని ముఖం, మెడపై రాసి నెమ్మదిగా మసాజ్ చేయాలి. 15-20 నిమిషాల తర్వాత శుభ్రమైన నీటితో కడగాలి.
#3
బీట్రూట్ - క్రీమ్ ఫేస్ మాస్క్
ఎండలో ఎక్కువసేపు ఉండటం వల్ల ఏర్పడిన ట్యాన్ను తగ్గించడంలో ఇది సహాయపడుతుంది. 1 టీస్పూన్ బీట్రూట్ రసంలో 1 టీస్పూన్ తాజా క్రీమ్ (సోర్ క్రీమ్) కలిపి మిశ్రమం తయారు చేయాలి. ట్యాన్ ఉన్న ప్రాంతాల్లో అప్లై చేసి సుమారు 20 నిమిషాలు ఉంచాలి. తరువాత గోరువెచ్చని నీటితో శుభ్రం చేసుకోవాలి. ఈ మాస్క్ను వారానికి రెండు సార్లు వాడవచ్చు.
#4
బీట్రూట్ - నారింజ తొక్కల ఫేస్ మాస్క్
హోలీ రోజున వెంటనే సహజ మెరుపు కావాలంటే ఇది మంచి ఎంపిక. 2టీస్పూన్ల నారింజ తొక్కల పొడిలో 1టీస్పూన్ బీట్రూట్ రసం కలిపి మందపాటి పేస్ట్గా చేయాలి. దీన్ని ముఖం,మెడపై రాసి పూర్తిగా ఆరిన తర్వాత చల్లటి నీటితో కడగాలి.ప్రతి రెండు రోజులకు ఒకసారి ఉపయోగిస్తే మెరుగైన ఫలితాలు కనిపిస్తాయి. సాధారణంగా బీట్రూట్ చర్మానికి హానికరం కాదు.అయినప్పటికీ ముందుగా చిన్న భాగంలో ప్యాచ్ టెస్ట్ చేయడం ఉత్తమం. సున్నితమైన చర్మం లేదా దీర్ఘకాలిక చర్మసమస్యలు ఉన్నవారు డెర్మటాలజిస్ట్ను సంప్రదించడం మంచిది. ఈసమాచారం కేవలం అవగాహన కోసం మాత్రమే.మీ చర్మ సంరక్షణలో కొత్త మార్పులు చేయడానికి ముందు నిపుణుల సలహా తీసుకోవడం అవసరం. ఈ హోలీలో రంగులతో పాటు సహజ కాంతితో కూడా మెరవండి!