ఆహారం: గుండెకు మేలు చేసే బీట్ రూట్ గురించి తెలుసుకోండి
బీట్ రూట్ ని పెద్దగా పట్టించుకోని వారు దానివల్ల ఆరోగ్యానికి కలిగే లాభాల గురించి ఇప్పుడే తెలుసుకోండి. బీట్ రూట్ లో ఫోలేట్ అనే పోషకం ఉంటుంది. ఇది గుండెను ఆరోగ్యంగా ఉంచడంలో సాయపడుతుంది. అంతేకాదు ఇందులో మాంగనీస్ అనే ఖనిజ పోషకం ఉంటుంది. దానివల్ల ఇన్సులిన్ ఉత్పత్తి అవుతుంది. రక్తంలో చక్కెర స్థాయిలను నియంత్రించడంలో ఇది సాయపడుతుంది. ఇందులో కార్బోహైడ్రేట్లు తక్కువగా ఉంటాయి. కాబట్టి చక్కెర వ్యాధితో బాధపడే వారు దీన్ని తమ ఆహారంలో చేర్చుకోవచ్చు. కావాల్సినంత ఫైబర్ ఉండడం వల్ల రక్తంలో చక్కెర స్థాయిలను అమాంతం పెరగకుండా చూసుకుంటుంది. ప్రోటీన్ ఎక్కువగా ఉండే పెరుగు, పప్పులు, విత్తనాలతో కలిపి బీట్ రూట్ ని తింటే భోజనంలో గ్లిసమిక్ ఇండెక్స్ తగ్గుతుంది.
బీట్ రూట్ వల్ల కలిగే ఆరోగ్య ప్రయోజనాలు
గ్లిసమిక్ ఇండెక్స్ తగ్గడం వల్ల రక్తంలో చక్కెర స్థాయిలు పెరగవు. బీటాలైన్స్ అనే యాంటీఆక్సిడెంట్లు సమృద్ధిగా ఉండడం వల్ల శరీరంలో అనవసర నొప్పులు, వాపులు ఏర్పడవు. ఇంకా ఇందులోని ఫైబర్ కారణంగా జీర్ణాశయ పనితీరు మెరుగుపడుతుంది. ఇందులోని నైట్రేట్ అనే పోషకం వల్ల మెదడును చేరే రక్తప్రవాహం పెరుగుతుంది. రక్తనాళాల్లో ఎలాంటి అడ్డంకులు రాకుండా విస్తారంగా మారతాయి. కొవ్వులు, కేలరీలు తక్కువగా ఉంటాయి కాబట్టి బరువు తగ్గాలనుకునే వారు తమ ఆహారంలో బీట్ రూట్ ని చేర్చుకుంటే మంచి ఫలితాలు పొందుతారు. బీట్ రూట్ ని డైరెక్ట్ గా తినవచ్చు. లేదా జ్యూస్ తాగినా బాగుంటుంది. ఇంకా వీటిని ఎంచకా పెనం మీద వేయించి, రుచికోసం కొంత ఉప్పు వేసి కూడా తినవచ్చు.
