ప్రేరణ: నిన్ను చూసి నవ్వే వాళ్లే నిన్ను ఎదిగేలా చేసేది
ఈ వార్తాకథనం ఏంటి
నువ్వొక పని మొదలు పెట్టావ్, ఆ పని గురించి నీకేమీ తెలియదు. అయినా సరే ప్రారంభించావ్. పనిమీద అవగాహన లేకపోవడం వల్ల నువ్వు ఆ పనిని సరిగ్గా చేయట్లేదు.
అది చూసి నీ పక్కనున్న వాళ్ళందరూ నవ్వుతున్నారు. హేళన చేస్తున్నారు. ఛీ ఛీ అని నీ పరువు తీస్తున్నారు. ఇలాంటి టైమ్ లో నువ్వు వాళ్ళ మాటలకు భయపడి పనిని మానేసావనుకో, నీకెప్పటికీ ఆ పని గురించి తెలియకుండానే పోతుంది.
వాళ్ళ మాటలను స్వీకరించు. నీకు తెలియదన్న నిజాన్ని ఒప్పుకో. కానీ ఓటమిని ఒప్పుకోకు. తెలుసుకోవాలన్న కోరికను వదులుకోకు. నీకు ఏ విషయాల్లోనైతే చేతకాదని వాళ్లంటున్నారో, ఆ విషయాల మీదే దృష్టి పెట్టు.
ప్రేరణ
ఏమీ చేయకుండా వచ్చిన విజయం కిక్ ఇవ్వదు
నిన్ను ఎవరైతే హేళన చేస్తున్నారో వాళ్ళు ఒకరకంగా నీకు మేలు చేస్తున్నట్లే లెక్క. ఎందుకంటే నువ్వు చేసే పనిలో నీకేం రాదో నీకు తెలియజేస్తున్నారు. అంటే, అది నువ్వు నేర్చుకోవాలని సూచిస్తున్నారు.
ఆ సూచనలను నువ్వు జాగ్రత్తగా స్వీకరించు. నువ్వు ఖచ్చితంగా ఎదుగుతావ్. మొదట్లో ఓడిపోతావేమో కానీ చిట్టచివరికి నువ్వే గెలుస్తావ్. అప్పుడు నిన్ను హేళన చేసిన వారు నిన్ను చూసి నోరెళ్ళ బెడతారు.
అందుకే, ఏదైనా పనిచేస్తున్నప్పుడు ముందుగా ఓటమి ఎదురవుతుంది. అవమానమే ఎదురవుతుంది. నువ్వు అనుకోగానే విజయం అమాంతం వచ్చేయదు. ఒకవేళ అలా వచ్చినా నీకంత పెద్దగా కిక్ ఉండదు.
అవమానాలు రావాలి, సవాళ్ళు రావాలి. వాటిని ఎదుర్కోవడంలో నువ్వు రాటు దేలాలి. అప్పుడే విజయంలో అసలైన కిక్కుంటుంది.