Tourist places: లైఫ్లో ఒకసారి అయినా వెళ్లాల్సిన రిసార్ట్.. ఎందుకంటే?
ఈ వార్తాకథనం ఏంటి
పర్యాటక ప్రపంచంలో బాలి ఒక కలల గమ్యం. అయితే ఆ కలల మధ్య కూడా ఊహించలేని విలాసాన్ని అనుభవించాలంటే మండప రిసార్ట్ను సందర్శించాల్సిందే. ప్రకృతి సోయగాల మధ్య, సౌకర్యాలతో గడపాలంటే ఖర్చు కూడా అంతే ఎక్కువ అవుతుంది. ఇండోనేషియాలోని ఉబుద్ ప్రాంతంలో ఉన్న ఈ మండప రిసార్ట్, రిట్జ్-కార్ల్టన్ రిజర్వ్ గ్రూప్కు చెందినది. చుట్టూ దట్టమైన అడవులు, పచ్చని వరి పొలాలు, ప్రవహించే అయంగ్ నది — ఇవన్నీ కలిసి ఒక ప్రత్యేక లోకంలో ఉన్నట్టు అనిపిస్తాయి. నగర జీవితపు పరుగుల నుంచి దూరంగా, ప్రశాంతమైన గ్రామీణ వాతావరణంలో ఇక్కడ విలాసవంతమైన జీవనాన్ని ఆస్వాదించవచ్చు.
వివరాలు
ఒక్క రాత్రికి ఎంత ఖర్చవుతుందంటే..
అవును, ఇది నిజమే. ఇక్కడ ఒక రాత్రి బస చేయాలంటే సుమారు రూ. 1.2 లక్షల నుంచి ధర ప్రారంభమవుతుంది. సీజన్, అలాగే మీరు ఎంచుకునే విల్లా ఆధారంగా ఈ ఖర్చు మరింత పెరిగే అవకాశం ఉంది.
కేవలం నిద్ర కోసం ఇంత ఖర్చా అని అనిపించవచ్చు, కానీ అందించే సేవలు మాత్రం ఆ స్థాయిలోనే ఉంటాయి.
ఇక్కడి సూట్లు, విల్లాలు సాధారణ హోటల్ గదుల్లా కాకుండా, ఒక విలాసవంతమైన ఇంటిలా రూపుదిద్దుకున్నాయి.
లివింగ్ రూమ్, బెడ్రూమ్, విస్తృతమైన బాల్కనీలతో మరింత ఆకర్షణీయంగా ఉంటాయి. ప్రత్యేకంగా వెదురుతో రూపొందించిన బాత్టబ్లు ఇక్కడి బాత్రూమ్లకు ప్రత్యేకతను తీసుకొస్తాయి.
ఇక్కడ అందించే సంప్రదాయ బాలి వంటకాలు కూడా ఎంతో ప్రసిద్ధి చెందాయి.
వివరాలు
రొమాంటిక్ డిన్నర్ చేసే అవకాశం..
సాయంత్రం సమయంలో స్థానిక బాలి నృత్యాలు, ప్రత్యక్ష సంగీత ప్రదర్శనలు పర్యాటకులను ఆకట్టుకుంటాయి.
ముఖ్యంగా అయంగ్ నది తీరంలో క్యాండిల్ లైట్ డిన్నర్ అనుభవం జీవితాంతం గుర్తుండిపోయేలా ఉంటుంది.
బాలి ప్రయాణం చేయాలనుకునే భారతీయులకు మరో మంచి విషయం ఏమిటంటే — మన పాస్పోర్ట్తోనే అక్కడ వీసా ఆన్ అరైవల్ సదుపాయం లభిస్తుంది.
సుమారు రూ. 2,600 చెల్లిస్తే 30 రోజులపాటు అక్కడ ఉండవచ్చు. డబ్బు ఉంటే ప్రపంచాన్ని చుట్టొచ్చని అంటారు.
కానీ ఆ డబ్బుతో ఇలాంటి మండప రిసార్ట్లో ఒక్క రోజు గడిపితే నిజమైన రాజసాన్ని అనుభవించవచ్చు.
ఖర్చు కొంచెం ఎక్కువైనా, జీవితంలో ఒక్కసారి అయినా ప్రత్యేక అనుభవం కోరుకునేవారికి ఇది అద్భుతమైన గమ్యం.