ఆరోగ్యం: నాన్ వెజ్ అలవాటు లేని వాళ్ళకు కావాల్సినంత ప్రోటీన్ అందించే ఆహరాలు
మాంసంలో ప్రోటీన్ ఎక్కువగా ఉంటుందన్న సంగతి అందరికీ తెలిసిందే. చికెన్, గుడ్లు, సాల్మన్ చేపల్లో ప్రోటీన్ ఎక్కువగా ఉంటుంది. ప్రోటీన్ వల్ల శరీరంలోని కణాలు వృద్ధి చెంది శరీరాన్ని పుష్టిగా ఉంచుతుంది. ప్రస్తుతం ఆహారం, ఆరోగ్యం పట్ల అందరికీ శ్రద్ధ పెరిగిపోయింది కాబట్టి క్వాలిటీ ఆహారాన్నే తీసుకోవాలని చూస్తున్నారు. అందుకే ఆరోగ్యాన్ని అందించే ప్రోటీన్ ఉన్న ఆహారాల వైపు అడుగులు వేస్తున్నారు. ఐతే ఇక్కడ ఒక విషయం తెలుసుకోవాలి. మనకు కావాల్సిన ప్రోటీన్లు ఒకే ఆహారం నుండి లభించవు. ఒక్కో ఆహారంలో ఒక్కో రకమైన ప్రోటీన్ కనిపిస్తుంది. ప్రోటీన్లు కేవలం మాంసాహారంలోనే ఎక్కువగా దొరుకుతాయని చాలామంది అనుకుంటారు. కానీ అది నిజం కాదు. మొక్కల నుండి వచ్చే ఆహారాల్లోనూ ఇవి కావాల్సినంత లభిస్తాయి.
పప్పులు, పచ్చబఠాణీలు, టోఫుల్లో ప్రోటీన్ లభ్యం
మాంసహారంతో పోలికలను పక్కన పెడితే వెజ్ లో కూడా శరీరానికి కావల్సినంత ప్రోటీన్ ని అందించే ఆహారాలు ఉన్నాయి. గింజలు, పప్పులు, పచ్చ బఠాణీలు, సోయాపాలతో తయారయ్యే టోఫు, పీనట్ బట్టర్ లాంటి వాటిల్లో మంచి ప్రోటీన్ ఉంటుంది. శరీరానికి కావాల్సినంత ప్రోటీన్ దొరక్కపోతే అనేక అనారోగ్యాలు ఎదురవుతాయి. శరీరం ముడతలు పడటం మొదలవుతుంది. ఎముకలు బలహీనంగా మారతాయి. గోర్లు, వెంట్రుకలు, చర్మానికి సంబంధించిన సమస్యలు తలెత్తుతాయి. వీటి నిర్మాణం, నిర్వహణ పూర్తిగా ప్రోటీన్ తో ముడిపడి ఉంటుంది. చిన్నపిల్లల్లో ఐతే పెరుగుదల ఆగిపోతుంది. ఇంకా కాలేయం పనితీరు దెబ్బతింటుంది. అందుకే శరీరానికి సరిపడా ప్రోటీన్ అందుతుందో లేదో చూసుకుంటూ తగినంత ప్రోటీన్ ఆహారాలను తీసుకోండి.
