Water: నీటి రంగు ఎందుకు మారుతుంది? శాస్త్రీయ కారణాలు ఇవే!
ఈ వార్తాకథనం ఏంటి
మనకు సాధారణంగా నీరు పూర్తిగా రంగులేనిదిగా అనిపిస్తుంది. కానీ వాస్తవానికి నీటికి స్వభావతః చాలా లేత నీలం రంగు ఉంటుంది. సూర్యకాంతి నీటిపై పడినప్పుడు, నీటి అణువులు అందులోని ఎరుపు (రెడ్) కిరణాలను శోషించుకుని, నీలం(బ్లూ) కిరణాలను ప్రతిఫలిస్తాయి. అందుకే పెద్ద నీటి వనరులు నీలం రంగులో కనిపిస్తాయి. గ్లాసులో ఉన్న నీరు పారదర్శకంగా కనిపించినా, సముద్రాలు మరియు సరస్సుల్లో మాత్రం ఆ నీలం వర్ణం స్పష్టంగా గమనించవచ్చు. ప్రకృతిలో నీటి రంగు ఆ ప్రాంత పర్యావరణ పరిస్థితులను తెలియజేసే ఒక సూచికలా పనిచేస్తుంది. అంటే, నీటి వర్ణం అక్కడి పరిసరాల ఆరోగ్యంపై ఒక రిపోర్ట్ కార్డ్లా భావించవచ్చు. నీరు ఆకుపచ్చగా కనిపిస్తే, అందులో ఆల్గే లేదా నాచు పెరిగి ఉన్నట్టు అర్థం.
Details
ముదురు పచ్చ రంగు కాలుష్యానికి సంకేతం
లేత ఆకుపచ్చ నీరు సాధారణంగా హానికరం కాకపోయినా, ముదురు పచ్చ రంగు కాలుష్యానికి సంకేతంగా పరిగణించబడుతుంది. గోధుమరంగు లేదా టీ రంగులో నీరు కనిపిస్తే, అదిటానిన్స్ లేదా వరదలతో వచ్చిన మట్టికణాల ప్రభావం కావచ్చు. వర్షాల అనంతరం నీరు ముదురు రంగులోకి మారడం సహజమే. అలాంటి నీరు మొక్కల పెరుగుదలకు ఇబ్బంది కలిగించే అవకాశం ఉంటుంది. ఎర్రగా లేదా తుప్పు రంగులో నీరు ఉంటే, భూగర్భజలాల్లో ఐరన్ శాతం అధికంగా ఉన్నట్టు సూచిస్తుంది. పింక్ లేదా బ్లూ-గ్రీన్ వర్ణం కొన్ని రకాల బ్యాక్టీరియా లేదా ప్రమాదకర ఆల్గే వల్ల రావచ్చు. నలుపు లేదా మబ్బులాంటి గాఢ వర్ణంలో నీరు కనిపిస్తే, అది తీవ్రమైన కాలుష్యం లేదా ఆక్సిజన్ కొరతను సూచించే హెచ్చరికగా భావించాలి.