Galaxy: అంతరిక్షంలో మరో గెలాక్సీకి దారి చూపిన 'నక్షత్రాల జాడ'.. ఖగోళ శాస్త్రవేత్తల కీలక గుర్తింపు
ఈ వార్తాకథనం ఏంటి
దూరంగా ఉన్న ఓ గెలాక్సీలో కనిపించిన అత్యంత మసకబారిన నక్షత్రాల సమూహం ఖగోళ శాస్త్రవేత్తలకు కీలకమైన ఆధారాన్ని అందించింది. విశ్వంలోని అతిపెద్ద రహస్యాల్లో ఒకటైన గెలాక్సీల ఆవిర్భావం, పరిణామంపై మరిన్ని వివరాలు తెలుసుకునేందుకు ఈ ఆవిష్కరణ ఉపయోగపడే అవకాశం ఉంది. హబుల్ స్పేస్ టెలిస్కోప్ ఆర్కైవ్ డేటాను పరిశీలించిన పరిశోధకులు.. దాదాపుగా కనిపించనంత మసకగా ఉన్న నక్షత్రాల ఓ జాడను గుర్తించారు. పాలపుంత వెలుపల గుర్తించిన తొలి గ్లోబ్యులర్ క్లస్టర్ నక్షత్ర ప్రవాహం ఇదేనని శాస్త్రవేత్తలు చెబుతున్నారు. భూమికి సుమారు 11.5 కోట్ల కాంతి సంవత్సరాల దూరంలో ఉన్న ఓ గెలాక్సీలో ఈ ఖగోళ దృగ్విషయం కనిపించింది.
వివరాలు
దట్టమైన నక్షత్రాల గోళంలా ఉన్న సమూహం..
ఇది ఒకప్పుడు దట్టమైన నక్షత్రాల గోళంలా ఉన్న సమూహం.. దాని చుట్టూ ఉన్న గెలాక్సీ గురుత్వాకర్షణ ప్రభావంతో క్రమంగా విడిపోతుండగా మిగిలిన నక్షత్రాలతో ఏర్పడిన పొడవైన, సన్నని ప్రవాహం.
ఆ క్లస్టర్ నుంచి నక్షత్రాలు ఒక్కొక్కటిగా విడిపోతున్న కొద్దీ అవి ఇలాంటి పొడవైన జాడను ఏర్పరుస్తాయి.
ఖగోళ శాస్త్రవేత్తలు పాలపుంతలో ఇప్పటికే ఇలాంటి డజన్ల కొద్దీ నక్షత్ర ప్రవాహాలను గుర్తించారు.
అయితే ఇవి చాలా మసకగా ఉండటంతో గుర్తించడం కష్టం. అందువల్ల ఇంకా ఎన్నో నక్షత్ర ప్రవాహాలు గుర్తించాల్సి ఉండొచ్చని శాస్త్రవేత్తలు భావిస్తున్నారు.
ఇతర గెలాక్సీల్లో కూడా ఉంటాయని ఆధారాలు లభించడంతో.. గెలాక్సీలు ఎలా ఏర్పడతాయి, కాలక్రమంలో ఎలా పరిణామం చెందుతాయో అర్థం చేసుకునేందుకు వీటిని 'కాస్మిక్ ట్రేసర్స్'గా ఉపయోగించవచ్చని పరిశోధకులు చెబుతున్నారు.
వివరాలు
మోడలింగ్ ద్వారా గెలాక్సీ మొత్తం ద్రవ్యరాశిని కూడా అంచనా..
ఈ పరిశోధనకు సంబంధించిన వివరాలు బుధవారం నేచర్ జర్నల్లో ప్రచురితమైన అధ్యయనంలో వెల్లడయ్యాయి.
ఈ నక్షత్ర ప్రవాహాన్ని నమూనాగా తీసుకుని UGC 9050-Dw1గా పిలిచే గెలాక్సీని, దాని గురుత్వాకర్షణ క్షేత్రాన్ని కూడా పరిశోధకుల బృందం మ్యాప్ చేయగలిగింది.
గెలాక్సీ గురుత్వాకర్షణ ఆ నక్షత్ర ప్రవాహం ఆకారం, కదలికలపై ప్రభావం చూపుతుంది.
దీంతో నక్షత్రాల ఆ జాడను ఆధారంగా చేసుకుని గెలాక్సీ గురుత్వాకర్షణ క్షేత్రాన్ని శాస్త్రవేత్తలు గుర్తించారు.
ఈ మోడలింగ్ ద్వారా గెలాక్సీ మొత్తం ద్రవ్యరాశిని కూడా అంచనా వేశారు.
అందులో నక్షత్రాల వంటి మనకు కనిపించే వస్తువులు ఎంత భాగం ఉన్నాయో, అలాగే కనిపించని డార్క్ మ్యాటర్ ఎంత ఉందో అంచనా వేశారు.
వివరాలు
నక్షత్ర ప్రవాహాన్ని గుర్తించిన పరిశోధకుల బృందం..
తమ గెలాక్సీ వెలుపలే ఓ నక్షత్ర ప్రవాహాన్ని గుర్తించినట్లు పరిశోధకుల బృందం తెలుసుకున్నప్పుడు ఎంతో ఉత్సాహంగా అనిపించిందని సహ పరిశోధన నాయకురాలు జూలీ కీల్ హోల్మ్ తెలిపారు.
ఆమె డెన్మార్క్లోని కోపెన్హేగన్ విశ్వవిద్యాలయంలోని నీల్స్ బోర్ ఇన్స్టిట్యూట్లో డాక్టరల్ ఫెలోగా ఉన్నారు.
ఆమె గ్లోబ్యులర్ క్లస్టర్లు, నక్షత్ర ప్రవాహాల ఏర్పాటుపై పరిశోధనలు చేస్తున్నారు.
"అప్పుడు మేమంతా ఒకరినొకరం చూసుకుని.. 'ఇక మనం ఎక్కడి నుంచి ముందుకు సాగాలి?' అని ప్రశ్నించుకున్నాం" అని జూలీ కీల్ హోల్మ్ పేర్కొన్నారు.