NASA: విశ్వ రహస్యానికి కొత్త క్లూ.. అరుదైన ఎక్స్-రే డాట్ను గుర్తించిన శాస్త్రవేత్తలు!
ఈ వార్తాకథనం ఏంటి
అంతరిక్ష పరిశోధనల్లో మరో సంచలన ఆవిష్కరణ వెలుగులోకి వచ్చింది. విశ్వ ఆది దశకు సంబంధించిన అతిపెద్ద రహస్యాల్లో ఒకదానికి సమాధానం దొరికే అవకాశాన్ని శాస్త్రవేత్తలు గుర్తించారు. నాసాకు చెందిన చంద్ర ఎక్స్-రే అబ్జర్వేటరీ గుర్తించిన ఓ విచిత్రమైన 'ఎక్స్-రే డాట్' ఖగోళ శాస్త్రవేత్తల్లో ఆసక్తి రేపుతోంది. ఈ కొత్త ఆబ్జెక్ట్ ద్వారా ఇప్పటివరకు మిస్టరీగా ఉన్న 'లిటిల్ రెడ్ డాట్స్' (LRDs) అసలు స్వరూపం బయటపడే అవకాశం ఉందని శాస్త్రవేత్తలు భావిస్తున్నారు. ఈ పరిశోధన ఫలితాలు ప్రముఖ శాస్త్రీయ జర్నల్ ది ఆస్ట్రోఫిజికల్ జర్నల్ లెటర్స్లో ప్రచురితమయ్యాయి. ఈ అధ్యయనానికి జేమ్స్ వెబ్ స్పేస్ టెలిస్కోప్, చంద్ర ఎక్స్-రే అబ్జర్వేటరీ సేకరించిన డేటాను ఉపయోగించారు.
వివరాలు
ఆ ఆబ్జెక్ట్లు 'లిటిల్ రెడ్ డాట్స్'గా గుర్తింపు
జేమ్స్ వెబ్ టెలిస్కోప్ పరిశీలనలు ప్రారంభమైన కొద్ది కాలానికే ఖగోళ శాస్త్రవేత్తలు విశ్వంలోని అత్యంత దూర ప్రాంతాల్లో చిన్న, ఎరుపు రంగులో కనిపించే కొన్ని విచిత్రమైన వస్తువులను గుర్తించారు. భూమికి దాదాపు 12 బిలియన్ కాంతి సంవత్సరాల దూరంలో ఉన్న ఈ ఆబ్జెక్ట్లను 'లిటిల్ రెడ్ డాట్స్'గా పిలుస్తున్నారు. ఈ వస్తువుల మధ్యలో భారీ సూపర్మాసివ్ బ్లాక్ హోల్స్ ఉండి, అవి దట్టమైన వాయు మేఘాల్లో దాగి ఉన్నాయని శాస్త్రవేత్తలు భావిస్తున్నారు. ఈ వాయు మేఘాలు బ్లాక్ హోల్స్ నుంచి వెలువడే సాధారణ సంకేతాలను, ముఖ్యంగా ఎక్స్-రేలను అడ్డుకుంటున్నాయని తెలిపారు.
వివరాలు
ఇది భూమికి సుమారు 11.8 బిలియన్ కాంతి సంవత్సరాల దూరం
ఈ సిద్ధాంతాన్ని 'బ్లాక్ హోల్ స్టార్' మోడల్గా పేర్కొంటున్నారు. ఇప్పుడు తాజాగా గుర్తించిన 'ఎక్స్-రే డాట్' కు అధికారికంగా 3DHST-AEGIS-12014 అనే పేరు పెట్టారు. ఇది భూమికి సుమారు 11.8బిలియన్ కాంతి సంవత్సరాల దూరంలో ఉంది. పరిశోధకుల ప్రకారం ఇది కూడా లిటిల్ రెడ్ డాట్స్లాగే చిన్నదిగా, ఎరుపు రంగులో, అత్యంత దూరంలో ఉన్నప్పటికీ ఒక ముఖ్యమైన తేడా ఉంది — ఇది ఎక్స్-రేలను విడుదల చేస్తోంది. జర్మనీలోని మాక్స్ ప్లాంక్ ఇన్స్టిట్యూట్ ఫర్ ఆస్ట్రానమీకి చెందిన ప్రధాన పరిశోధకుడు రాఫెల్ హ్విడింగ్ మాట్లాడుతూ, లిటిల్ రెడ్ డాట్స్ రహస్యాన్ని అర్థం చేసుకునేందుకు శాస్త్రవేత్తలు చాలా ఏళ్లుగా ప్రయత్నిస్తున్నారని, ఈ ఒక్క ఎక్స్-రే డాట్ ఆ పజిల్కు కీలక ఆధారంగా మారవచ్చని చెప్పారు.
వివరాలు
వాయు మేఘాలు పూర్తిగా మాయమైతే "బ్లాక్ హోల్ స్టార్" దశ ముగుస్తుంది
కొత్తగా వచ్చిన వెబ్ టెలిస్కోప్ డేటాను, చంద్ర అబ్జర్వేటరీ గతంలో నిర్వహించిన డీప్ సర్వేతో పోల్చిన తర్వాత ఈ ఆబ్జెక్ట్ను గుర్తించినట్లు పరిశోధకులు తెలిపారు. శాస్త్రవేత్తల అభిప్రాయం ప్రకారం, ఈ ఎక్స్-రే డాట్ అనేది లిటిల్ రెడ్ డాట్ నుంచి సాధారణ సూపర్మాసివ్ బ్లాక్ హోల్గా మారుతున్న మధ్యంతర దశ కావచ్చు. బ్లాక్ హోల్ చుట్టూ ఉన్న వాయువును క్రమంగా గ్రహిస్తుండటంతో ఆ వాయు మేఘాల్లో ఖాళీలు ఏర్పడతాయి. ఆ గ్యాప్ల ద్వారా బ్లాక్ హోల్ నుంచి వెలువడే ఎక్స్-రేలు బయటకు వచ్చి చంద్ర అబ్జర్వేటరీకి కనిపిస్తున్నాయని పేర్కొన్నారు. చివరికి ఆ వాయు మేఘాలు పూర్తిగా మాయమైతే "బ్లాక్ హోల్ స్టార్" దశ ముగుస్తుందని తెలిపారు.
వివరాలు
తొలి ఆబ్జెక్ట్ అయ్యే అవకాశం
అదే సమయంలో, ఈ ఆబ్జెక్ట్ నుంచి వెలువడే ఎక్స్-రే కాంతి తీవ్రత కాలక్రమంలో మారుతున్నట్లు కూడా చంద్ర డేటాలో గుర్తించారు. ఇది బ్లాక్ హోల్ను కొంతవరకు దాచిపెట్టిన గ్యాస్ మేఘాలు తిరుగుతూ ఉండటమే కారణమై ఉండవచ్చని శాస్త్రవేత్తలు భావిస్తున్నారు. ప్రిన్స్టన్ యూనివర్సిటీకి చెందిన సహ పరిశోధకుడు హన్పు లియు మాట్లాడుతూ, ఈ ఎక్స్-రే డాట్ నిజంగా మార్పు దశలో ఉన్న లిటిల్ రెడ్ డాట్గా నిర్ధారణ అయితే ఇప్పటివరకు తెలిసిన తొలి ఆబ్జెక్ట్ ఇదే అవుతుందని చెప్పారు. అంతేకాదు లిటిల్ రెడ్ డాట్ అంతర్గత నిర్మాణాన్ని తొలిసారిగా పరిశీలించే అవకాశం కూడా ఇదే కావచ్చని పేర్కొన్నారు.
వివరాలు
మరో అవకాశాన్ని పరిశీలిస్తున్న శాస్త్రవేత్తలు
అయితే శాస్త్రవేత్తలు మరో అవకాశాన్ని కూడా పరిశీలిస్తున్నారు. ఈ ఎక్స్-రే డాట్ సాధారణంగా కనిపించే సూపర్మాసివ్ బ్లాక్ హోల్ అయి ఉండొచ్చని, కానీ దానిని ఇప్పటివరకు చూడని ప్రత్యేక రకం ధూళి కప్పి ఉండవచ్చని భావిస్తున్నారు. ఈ మిస్టరీని పూర్తిగా ఛేదించేందుకు భవిష్యత్తులో మరిన్ని పరిశీలనలు చేపట్టనున్నట్లు పరిశోధకులు వెల్లడించారు.